SIRAKA 35

₁Ho boloka Molao ho tšoana

le ho etsa mahlabelo a mangata;

ho khomarela litaelo tsa oona

ke ho nyehela ka sehlabelo sa khotso.

₂Ho busetsa ketso e molemo

ho ka ho nyehela phofo

e thumisehileng;

ho fana ka mpho tsa mohau

ke ho etsa sehlabelo sa teboho.

₃Ho phema bobe ho khahlisa Morena;

ho phema tse sa lokang ke sehlabelo

sa tefello ea libe.

₄Se hlahe ka pele ho Morena

ka matsoho a sa nkang letho;

₅phetha tsena kaofela

hobane ke taelo ea hae.

₆Ha nyehelo ea ea lokileng

e tšoetšoetha mafura aletareng,

monko o monate oa eona o nyolohela

ho Ea holimo-limo.

₇Sehlabelo sa motho ea lokileng

sea amoheleha,

se ke ke sa lebaleha le khale.

₈Tlotlisa Morena ka pelo eohle ea hao,

se be lekhonatha ha u nyehela

lilopotsia.

₉Kamehla ha u nyehela limpho,

bontša sefahleho se thabileng,

'me u fane ka karolo ea leshome

ea tsohle ka nyakallo.

₁₀Fana ho Ea holimo-limo

ka ho ea kamoo a u fileng kateng;

mo fe ka pelo eohle ea hao

ka ho ea ka matla a hao.

₁₁Morena oa buseletsa,

'me o tla u buseletsa hasupa.

₁₂Se mo ntšetse tjotjo,

kaha a ke ke a e amohela;

u se itšetlehe ka sehlabelo se sa lokang.

Morena ke moahloli,

'me ha a ee ka tšobotsi.

₁₃A ke ke a sekisetsa mofutsana;

empa o tla mamela thapelo

ea ea etsoang hampe.

₁₄Ha a ka ke a khesa thapeli

ea khutsana,

leha e le ea mohlolohali

ea hlahisang sello sa hae.

₁₅Ana meokho ea mohlolohali

ha e keleketle marameng a hae,

a ntse a lla ho qosa

motho ea e bakileng?

₁₆Ea sebeletsang Morena

ka ho phetha thato ea hae

o tla amoheleha;

'me thapelo ea hae

e tla finyella marung.

₁₇Thapelo ea moikokobetsi

e phunyeletsa maru,

'me ha a ka ke a khotsofala

ho fihlela e honyella ho Morena.

Ha a ka ke a khaotsa

ho fihlela Ea holimo-limo a mo thusa,

a ahlolela ba lokileng

'me a phethahatsa kahlolo.

₁₈Morena ha a ka ke a lieha,

leha e le ho iphapanyetsa ba khopo,

ho fihlela a pshatla matheka

a ba se nang mohau,

le ho iphetetsa ho lichaba;

ho fihlela a tlosa bongata ba baikakasi

le ho roba mare a borena

a ba se nang toka;

₁₉ho fihlela a buseletsa motho

ho ea ka liketso tsa hae,

'me a putsa liketso tsohle tsa batho

ho ea ka merero ea bona;

ho fihlela a ahlola taba

ea sechaba sa hae,

'me a se thabisa ka mohau oa hae.

₂₀Nakong ea mathata

mohau oa thabeloa

joaloka maru a pula

nakong ea komello.