SIRAKA 38

₁Hlompha ngaka

ka baka la lithuso tsa eona,

hobane le eona e bopiloe ke Morena.

₂Phekolo e tsoa ho Ea holimo-limo,

joaloka mpho e tsoang ho khosi.

₃Tlhalefo ea ngaka ea e phahamisa,

'me batho ba boemo baa e babatsa.

₄Morena o hlahisitse litlhare

tse tsoang lefatšeng,

'me motho ea nang le kutloisiso

ha a ka ke a li nyelisa.

₅Ana metsi ha aa ka a natefisoa

ka sefate,

hore matla a Morena

a tle a tsebahale?

₆Ke Eena hape

ea fileng batho bohlale,

e le hore ba mo tlotlise

ka baka la limakatso tsa hae.

₇Ka tseo a li bopileng oa phekola,

'me o kokobetsa ho opa;

₈ka tsona se-epa-mere

se etsa metsoako.

Ka hona mesebetsi ea Molimo

ha e sa tla fela,

'me ho eena ho tsoa bophelo

bo aparelang lefatše lohle.

₉Ngoan'a ka, ha u baba,

u se ke ua nyahama pelo,

empa rapela Morena,

'me o tla u phekola.

₁₀Furalla liphoso tsa hao,

u se silafatse liatla tsa hao,

'me u hloekise pelo ea hao

libeng tsohle.

₁₁Nyehela sehlabelo se monko

o monate

le karolo ea phofo e mathumisa

ea khopotso;

'me u etse nyehelo e nonneng

kamoo u ka bang le matla kateng.

₁₂Faa ngaka sebaka sa eona,

hobane le eona e bopiloe ke Morena;

etsa hore e se ke ea u furalla

mohla u e hlokang.

₁₃Nako e teng eo ka eona phekolo

e leng ka har'a liatla tsa lingaka;

₁₄hobane le tsona li tla rapela Morena

hore a li nee katleho

kokobetsong ea mahloko,

le phekolong ea mafu

ho pholosa bophelo.

₁₅Ea etsang sebe

mahlong a 'Mopi oa hae,

eka a ka oela liatleng tsa ngaka!

₁₆Ngoan'a ka, etsa hore

meokho ea hao

e keleketle ka baka la mofu;

'me joaloka motho

ea utloang bohloko haholo,

qala ho bokolla.

Hlopha setopo sa hae ka hlompho

e mo lokelang,

e-ba makhethe lepatong la hae.

₁₇Bokolla habohloko,

poboli ea hao e be e matla,

phetha meetlo ea ho siama

ho ea ka se mo lokelang

ka letsatsi kapa a mabeli,

ho phema litšebo;

'me joale u ke u tšelisehe.

₁₈Masoabi a ka tsoala lefu,

hobane masoabi a pelo

a monya matla a motho.

₁₉Masoabi a hao a fele ka lepato;

bophelo bo futsanehileng bo bakoa

ke masoabi a pelo.

₂₀U se ke ua neela pelo ea hao

masoabing;

u a leleke u nts'u nahana

qetello ea bophelo.

₂₁Se lebale hore ha ho khutluoe;

ha ho molemo oo u o etsetsang mofu,

u mpa u intša kotsi.

₂₂Hopola hore tsela ea hae

e tla ba ea hao:

“kajeno ke 'na, hosane ke uena.”

₂₃Ha mofu a se a le phomolong,

u khaotse ho nahana ka eena,

u tšelisehe ka eena ha moea oa hae

o se o faletse.

₂₄Bohlale ba mongoli

bo itšetlehile ka monyetla

oa ho lokoloha mosebetsing;

'me ea se nang mesebetsi e mengata-

ngata a ka 'na a ba bohlale.

₂₅Ea tšoarang mohoma

a ka hlalefisoa ke'ng,

ea itumelang ka litsenene tsa hae,

ea qhobang likhomo 'me a tšoarehile

ke mosebetsi oa tsona

'me eo lipuo tsa hae li leng

holim'a lipoho?

₂₆Pelo ea hae e lekoteng

leo a le sehang,

'me o qeta nako ea mantsiboea

a fepa marole furu.

₂₇Le bona basebetsi bohle

ka matsoho ba joalo,

ba sebetsang le bosiu le motšeare;

le ba betlang litempe tsa matšoao,

ba ikitlaeletsang ho etsa

mefuta ka mefuta.

E mong le e mong o bea maikutlo

a hae ho ngoloeng ha setšoantšo

'me o phetha mosebetsi oa hae

e se e le bosiu.

₂₈Le lona lelala le joalo

le lutseng haufi le seotlela,

le beile pelo ea lona mosebetsing

oa lona oa tšepe.

Lebatama la mollo le qhibilihisa

nama ea lona,

'me le qetoa ke mocheso oa onto.

Ha le phetse ho mamela

molumo oa noto,

mahlo a lona a holim'a sebopeho

sa ntho eo le e etsang,

le bea maikutlo a lona

ho phetheheng ha mosebetsi,

'me le qeta mokhabo oa eona

e se e le bosiu.

₂₉Le sona sebopi se lutseng

mosebetsing oa sona se joalo,

se bilikisang lebili ka maoto a sona,

se hlokolosi haholo

ka mosebetsi oa sona,

se ntse se latela palo ea lipitsa tsa sona.

₃₀Motho eo o bopa letsopa

ka letsoho la hae,

'me o le nolofatsa ka maoto a hae.

O kenya pelo ea hae mophethong

oa ho bentša,

'me o fiela onto ea hae e se e le bosiu.

₃₁Batho bao bohle ba tšepile

liatla tsa bona,

'me e mong le e mong o bohlale

mosebetsing oa hae.

₃₂Ha ho motse o ka hahoang

ka ntle ho bona,

'me ha ho batho ba ka ahang

kapa ho etela teng.

₃₃Empa basebetsi bao ha ba hopoleloe

boeletsing ba sechaba,

leha e le ho nka litulo tse phahameng

phuthehong tsa sona.

Ha ba lule setulo sa boahloli,

leha e le ho utloisisa

liqeto tsa boahloli.

Hase batho ba rutehileng,

ba tummeng ka bohlale ba bona,

kapa ba ka qapang maele.

₃₄Empa ba tsitsisa boleng

ba lefatše lena,

'me thapelo ea bona

ke mosebetsi oa matsoho a bona.