Joshua
1Joshua mora oa Nune
o ne a le matla ntoeng,
'me ea e-ba mohlahlami oa Moshe
boemong ba boporofeta.
Ho latela lebitso la hae
ea e-ba mopholosi e moholo
oa bakhethuoa ba Molimo,
ho iphetetsa ho lira
tse neng li ba tsohela matla,
e le hore Iseraele a tle a amohele
lefa la hae.
2O ne a tlotleha hakaakang
ha a ne a phahamisa matsoho a hae,
'me a tsoka sabole ea hae
ho otla metse!
3Ke mang ea 'nileng a ema a tiile
joaloka eena?
Eena ka sebele o ne a loana
lintoa tsa Morena.
4Ana letsatsi ha lea ka la ema themelele
ka taelo ea hae,
'me letsatsi le le leng ha lea ka la e-ba
bolelele ba matsatsi a mabeli?
5A ipiletsa ho Ea holimo-limo,
Ea matla 'ohle,
ha lira li mo patisitse kahohle;
'me Molimo a mo araba
ka ho romela sefako se linaka.
6Joshua a itahlela holim'a sechaba
sa lireng,
a timetsa bafutuheli
metheong ea Bete-Horone,
hore lichaba li tle li tsebe
mohloli oa matla a hae,
le hore o loanne pontšeng ea Morena,
hobane o latela Ea matla ka ho tlala.
Kalebe
7Mehleng ea Moshe
Joshua a bontša botšepehi,
eena le Kalebe mora oa Jefune;
ba hanyetsa phutheho ho thibela
batho ho etsa sebe,
'me ba khutsisa ho luma-luma
ha bona ho khopo.
8Bana ba babeli ba inotši ba phonyoha
har'a ba makholo a tšeletseng a likete
ba litaaso,
ho ea amohela lefa la bona,
naheng e kollang lebese le linotši.
9Morena a nea Kalebe matla,
a neng a be ho eena
ho fihlela boqhekung,
hoo a neng a ba a hloella
naheng ea lihlaba,
eo litloholo tsa hae
li ntseng li e e-ja lefa;
10hore bana bohle ba Israele
ba tle ba lemohe
hore ho latela Morena ho molemo.
Baahloli
11Baahloli le bona,
ka mabitso a bona ho fapana,
ba ileng ba hana ho sebeletsa
melimo ea bohata,
'me ba sa kang ba furalla Morena,
e se eka ba ka hopoloa kamehla
ka hlompho!
12Eka masapo a bona
a ka boela a phela
moo a epetsoeng teng,
'me mabitso a batho bao ba tumileng,
a ka boela a phela litloholong tsa bona.
Samuele
13Samuele ea neng a ratoa
ke Morena oa hae,
moporofeta oa Morena,
a thea bokhosi,
a ba a tlotsa babusi
ho okamela sechaba.
14Ka ho ea ka molao oa Morena
a ahlola phutheho,
'me Morena a phallela
litloholo tsa Jakobo.
15Ka botšepehi ba hae a ipakahatsa
ho ba moporofeta,
'me ka lipolelo tsa hae a tsejoa
e le seboni se tšepahalang.
16A ipiletsa ho Morena, Ea matla 'ohle,
ha lira tsa hae li mo patisitse kahohle,
'me a nyehela ka konyana e nyanyang
ho eena.
17Eaba Morena o thoathoaretsa
a le leholimong,
'me a etsa hore lentsoe la hae
le utloahale ka molumo o tšabehang.
18A ripitla baetapele
ba sechaba sa Tire,
le babusi bohle ba Bafilesita.
19Pele a ithoballa boroko bo sa feleng,
Samuele a ikana ka bopaki ba Morena
le motlotsuoa oa hae a re:
“Ha kea ka ka nkela mang kapa mang
seng sa hae,
leha e le meqathatso ea hae.”
'Me ha ho motho ea ileng a mo qosa.
20Esita le hoba a ithoballe, a porofeta,
a ba a senolela khosi lefu la eona,
'me a phahamisetsa lentsoe la hae
ka ntle ho mobu ka boporofeta
ho hlakola bokhopo ba sechaba.
