Ho ruta thuto ea 'nete
1Ha e le uena, u bolele tse lokelang thuto ea 'nete. 2Banna ba hōlileng ba be le boitšoaro linong, ba itlhomphe, ba be seli. Ba be le tumelo, lerato le tiisetso ea 'nete.
3Ka mokhoa o joalo, basali ba hōlileng ba be le boitšoaro bo lokelang ba halalelang, ba se ke ba bua batho hampe, e se be makhoba a lino, empa ba rute tse lokileng. 4Ka hona ba tla khothaletsa basali ba bacha ho rata banna ba bona le bana ba bona, 5le ho ba le boitlhompho le bohloeki, le ho hlokomela malapa a bona, le ho ba mosa, le ho ikokobeletsa banna ba bona, esere lentsoe la Molimo la nyefoloa.
6Bahlankana le bona u ba khothaletse hore ba be seli. 7Uena ka sebele u ba etsetse mohlala linthong tsohle ka mesebetsi e metle, ka thuto e hloekileng le ka boitlhompho. 8U bolele tsa 'nete, tse ke keng tsa tšoauoa liphoso, hore mohanyetsi a tle a hlajoe ke lihlong ka baka la ho hloka bobe boo a ka re beang bona.
9Makhoba a ikokobeletse beng ba 'ona linthong tsohle, a ba khotsofatse kahohle-hohle, a se ke a arabisana le bona, 10a se ke a ba utsoetsa. Empa a bontše hore a tšepahala kannete, kamehla, hore a tle a etse hore thuto ea Molimo, Mopholosi oa rōna, e khahlehe linthong tsohle.
11Mohau oa Molimo, o pholosang batho bohle, o bonahetse. 12O re ruta ho tela bokhopo le litakatso tsa lefatše, re tle re phele re le seli, re lokile, re e-na le borapeli mehleng ea joale, 13re ntse re lebeletse lehlohonolo leo re le tšepisitsoeng le ponahalo ea tlōtla ea Molimo e Moholo, Jesu Kreste, Mopholosi oa rōna. 14Eena o iteletse rōna, hore a tle a re lopolle bokhopong bohle, a itlhoekisetse sechaba seo e tla ba sa hae, se chesehelang mesebetsi e metle.
15Bolela tsena, u khothatse, u khalemele ka matla 'ohle. Ho se be ea u nyelisang.
