Likeletso tsa Tobite tsa qetello
1Ka mokhoa o joalo Tobite a qeta sefela sa hae sa teboho.
Tobite a ichoella ka khotso ha a le lilemo li lekholo le leshome le metso e 'meli, 'me a patoa Ninife ka hlompho e kholo. 2O ne a e-na le lilemo tse mashome a tšeletseng le metso e 'meli ha a foufala; 'me hoba a boele a bone, a iphelela hamonate. A 'na a tsoela pele ho fana ka limpho tsa mohau, a sa khaotse ho boka Molimo le ho tlotlisa boholo ba hae.
3Ha a le lekhatheng la lefu, a bitsa Tobiase, a mo laea tjena: 4“Ngoan'a ka, nka bana ba hao, u balehele Media; hobane ke lumela lentsoe la Molimo le boletsoeng ke Nahume malebana le Ninife. Tsohle tse boletsoeng ke baporofeta ba Iseraele, ba rometsoeng ke Molimo, li tla phethahala, 'me li oele Asure le Ninife holimo. Ha ho le le leng la mantsoe a bona le tla fokotsoa; tsohle li tla etsahala ka nako e beiloeng. U tla sireletseha Media ho feta Asiria le Babilona. Kea tseba, ebile ke lumela hantle hore tsohle tseo Molimo a li boletseng li tla phethahala, li etsahale, ho se lentsoe le le leng la lipolelo tsa baprofeta le tla fetoha lefeela.
“Bana babo rona ba ahileng naheng ea Iseraele ba tla qhalakanngoa, ba fallisoe lefatšeng le letle la habo bona, ba isoe kholehong. Naha eohle ea Iseraele e tla fetoha lefeella, Samaria le Jerusalema li fetohe lefeella. Ntlo ea Molimo e tla ba bofifing nakong e itseng, e be e chesoe. 5Empa Molimo o tla boela a ba hauhela, a ba khutlisetse naheng ea Iseraele. Ba tla haha Ntlo ea Molimo bocha, empa e seng e ntle joaloka ea pele; e tla sala e le joalo ho fihlela nako e beiloeng e phethahala. Kamorao, bohle ba tla khutla kholehong, ba boele ba hahe Jerusalema bocha ka makhethe; 'me ka har'a eona Ntlo ea Molimo e tla fela e hahoe bocha joalokaha baporofeta ba Iseraele ba boletse. 6Lichaba tsohle tsa lefatše li tla sokoloha kaofela ha tsona, li tšabe Molimo e le ka 'nete. Tsohle li tla furalla melimo ea bohata, e ileng ea 'na ea li khelosa 'me ea li thetsa. 7Li tla boka Molimo oa bosafeleng ka ho ea ka molao. Bana bohle ba Iseraele ba tlang ho pholoha matsatsing ao, ba be ba tšepahale ho Molimo e le ka 'nete, ba tla phutheha hammoho. Ba tla ea Jerusalema, ba rue lefatše la Aborahama, ba ahe ho lona ka mehla ba sa tšabe letho. Ba ratang Molimo ruri ba tla thaba; athe ba etsang sebe le ho sa lokang ba tla fela lefatšeng.
8“Joale, bana ba ka, ke le laea tjena: Sebeletsang Molimo ka botšepehi, le etse se mo khahlisang. 9Rutang le bana ba lona ho etsa tse lokileng, ho fana ka limpho tsa mohau, ho se lebale Molimo, le ho rorisa Lebitso la hae e le ka 'nete, ka matla 'ohle a bona le ka nako tsohle.
10“Joale, ngoan'a ka, tloha Ninife, u se ke ua sala mona. Hang hoba u pate 'm'ao pel'a ka, u tlohe tsatsing lona leo; u se lule tsatsi le leng hape tikolohong ena ea Ninife. Mona ke iponela bokhopo bo bongata feela, le bolotsana bo bongata bo etsoang ho se lihlong. Ngoan'a ka, hopola seo Nadabe a ileng a se etsa ho Ahikare ea neng a ile a mo holisa. Ahikare a n'a tlameha ho ipata mahaheng, ea ka o epetsoe a ntse a phela. Empa qetellong a bona tlontlollo eo e phetetsoa ke Molimo. Ahikare a boela a hlahella leseling la letsatsi, ha Nadabe eena a ea mafifing a sa feleng, hobane o ne a ile a leka ho bolaea Ahikare. Ka baka la limpho tsa mohau tseo Ahikare a li entseng, a phonyoha sefi sa lefu seo Nadabe a neng a mo chehile ka sona; athe Nadabe eena a pitloa ke sefi sa hae, a ipitsetsa lefu. 11Joale, bana ba ka, bonang se tlisoang ke limpho tsa mohau; le ke le bone le se tlisoang ke bokhopo; boa timetsa. Empa joale ke se ke phefumoloha ka thata.”
Ba mo robatsa liphateng tsa hae, eaba oa shoa. A patoa ka hlompho e kholo.
12Eitse ha 'm'ae a hlokahala, Tobiase a mo pata pel'a ntat'ae. Eaba eena hammoho le mosali ba leba Media 'me ba aha Ekebatana, ha Raguele mohoe oa hae. 13A baballa batsoali ba mosali oa hae ka hlompho boqhekung ba bona. Hamorao a ba pata Ekebatana e Media, 'me ea e-ba mojalefa oa lelapa la Raguele, 'moho le la ntat'ae Tobite.
14Tobiase o ile a hlokahala e le motho ea hlonephehang, a le lilemo li lekholo le leshome le metso e supileng. 15Pele ho lefu la hae, e ile ea e-ba paki ea ho ripitloa ha Ninife ke Ahashuerushe, khosi ea Media, 'me a bona baahi ba motse oo ba isoa kholehong Media. Tobiase a boka Molimo ka baka la tsohle tseo a li entseng ho Baninife le Baasiria. Pele ho lefu la hae o ile a thabela tse hlahetseng Ninife, a ba a boka Morena, eo e leng Molimo ka mehla le mehla.
