Tobiase o tšoara tlhapi
1Moshanyana a tloha le lengeloi, ntjanyana ea mo sala morao, ea tsamaea le bona. Ba tsamaea bobeli 'me phirimaneng ea letsatsi lena la pele ba robaletsa lebopong la noka ea Tigerese. 2Moshanyana a theohela ka nokeng ho itlhatsoa maoto. Ke ha tlhapi e kholo e tlola metsing 'me e leka ho mo kometsa leoto. Tobiase a hoeletsa. 3Lengeloi la re ho eena: “Tšoara tlhapi eo, u se ke ua e tlohela.” Mohlankana a e tšoara ka matla, a ba a e hulela lebopong. 4Lengeloi la tsoela pele la re: “E buhe, u b'u e ntše nyooko, pelo le sebete. Ipolokele tsona; ha e le likahare tse ling, tsona u li lahle. Hobane nyooko, pelo le sebete sa eona li sebelisoa e le moriana.” 5Mohlankana a buha tlhapi, a beella ka thoko nyooko, pelo le sebete. Eaba o besa karolo e 'ngoe ea tlhapi, oa e ja; karolo e 'ngoe, a e noka ka letsoai 'me a e boloka.
Ba itsoella pele leetong hammoho ho fihlela ba atamela Media. 6Mohlankana a botsa lengeloi, a re: “Asariase, ngoan'eso, ke moriana oa'ng o etsoang ka pelo, sebete le nyooko ea tlhapi?” 7La araba, la re: “Ha ho kubetsoa ka pelo le sebete sa tlhapi pel'a monna kapa mosali ea hlaseloang ke modemona kapa moea o mobe, ho hlaseloa hoo ho tla khaotsa tu, ha ho sa tla boea sekoele le khale. 8Ha e le nyooko, eona e ka rothetsoa ka har'a mahlo a nang le matheba a masoeu. Ho s'o saletse ho bulula matheba hore motho a fole.”
Tseleng e eang Ekebatana
9Ba kena Media, ba atamela Ekebatana. 10Eaba Rafaele o re ho mohlankana: “Tobiase, ngoan'eso!” Eena a araba, a re: “Ke 'na enoa.” Lengeloi la tsoela pele, la re: “Bosiung bona re tla robaletsa ha Raguele. Motho eo ke mong ka uena; o na le morali ea bitsoang Sara. Ha a na mora kapa morali e mong, haese Sara. 11Uena u amana le Sara ho feta bohle; ka hoo u na le tokelo ea ho mo nyala le ho ba mojalefa oa leruo la ntat'ae. 12Ke ngoanana ea seli, ea sebete, e motle haholo. Ntat'ae le eena ke motho ea hlomphehang.” La boela la re: “U na le tokelo ea ho mo nyala. 'Mamele, ngoan'eso, phirimaneng eona ena ke tla bua le ntat'a ngoanana, ke u qelle eena. Etlere ha re khutla Ragese, ho etsoe mokete oa lenyalo la lona le eena. Ke tseba ka ho tlala hore Raguele o sitoa ho u hanela ka eena kapa ho mo lebeletsa ho e mong, ho seng joalo a ka tšoaneloa ke kotlo ea lefu ka ho ea ka taelo e bukeng ea Moshe; hobane o tseba hore, ka baka la tsoalano, ke uena ea nang le tokelo ea ho nyala morali oa hae ho feta mang kapa mang. Joale 'mamele, ngoan'eso. Re tla buisana ka ngoanana phirimaneng eona ena, re u qelle eena. Mohla re khutlang Ragese re tla tsamaea le eena, re ee le eena ha eno.”
13Tobiase a araba Rafaele, a re: “Asariase, ngoan'eso, ke utloile hore o se a ile a nyaloa ke banna ba supileng, empa e mong le e mong oa bona o ile a shoela kamoreng eo ba suthetsoeng ho eona; a shoa bosiung bona boo a keneng kamoreng ea hae ka bona. 14Ke utloile ka bo-bare hore ke modemona o ba bolaeang. Joale le 'na kea tšaba. Moroetsana eena ha a ntšoe kotsi; empa ha feela e mong a leka ho mo atamela, modemona oa 'molaea. 'Na ke mora a inotši oa ntate. Ha nka shoa, ke tla potlakisetsa ntate le 'mè lebitleng ka baka la masoabi a ho ntelela. Ha ba na mora e mong ea tla ba pata.”
15Rafaele a re ho eena: “Ebe u se u lebetse litaelo tsa ntat'ao? O u laetse ho nyala mosali oa lelapa la heno. Joale 'mamele, ngoan'eso. Mo nyale. Se tsotelle modemona oo. Ke tseba hantle hore phirimaneng eona ena u tla mo neoa, e be mosali oa hao. 16Feela ha le se le kene kamoreng eo le tla sutheloa ho eona, u qothe sebete le pelo ea tlhapi, 'me u li akhele mashaleng moo ho kubetsoang teng. 17Monko o tla tlala kahohle. Ha modemona o utloa monko o tla baleha, 'me o ke ke oa hlola o le bea pel'a ngoanana le khale. Ha e se e le nako ea hore le robale, bobeli ba lona le eme, le qale ka ho rapela. Le ikopele ho Morena oa leholimo hore a le hauhele, a be a le sireletse. Se tšabe, haesale u mo abetsoe; ke uena ea tla mo pholosa. O tla u sala morao, ebile ha ho pelaelo, u tla ba le bana ka eena, 'me ba tla rateha ho uena. Se tšohe letho.”
Ha Tobiase a utloa mantsoe a Rafaele 'me a tsebisitsoe hore Sara ke khaitseli ea hae, oa leloko le oa ntlo ea ntat'ae, a qala ho mo rata haholo 'me pelo ea hae ea mo khomarela.
