SOLOMONE 10

₁Bohlale bo ile ba haeletsa

mobopuoa oa pele,

ntat'a moloko oohle oa batho,

hoba ho boptjoe eena a inotši.

Eaba bo mo lopolla sebeng sa hae,

₂'me ba mo fa matla a ho busa

lintho tsohle.

₃Eare ha motho ea sa lokang

a bo furalla khalefong ea hae,

a timela hobane bohaleng ba hae

a bolaile ngoan'abo.

₄Ha lefatše le se le apesitsoe ke metsi

ka lebaka la hae,

Bohlale hape ba le pholosa,

ba sesisa motho ea lokileng

ka sekotoana sa sefate.

₅Hape, mohla lichaba li ferekantsoeng

ka baka ka ho utloana bokhopong,

Bohlale ba ananela motho ea lokileng,

'me ba mo boloka a se na koli

ka pele ho Molimo;

ba boela ba mo matlafatsa

hore a se ke a qenehela ngoana oa hae.

₆Hape-hape, mohla ba khopo

ba timetsoang,

Bohlale ba pholosa ea lokileng,

a phonyoha mollong o ileng

oa theohela metseng eane e mehlano.

₇Bopaki ba bokhopo ba eona

bo sa saletse:

ke naha e senyehileng

e ntseng e kubella

le litlama tse beang tholoana

e sa butsoeng,

le tšiea ea letsoai e le seemahale

sa motho ea neng a sa lumele.

₈Batho bao ba ileng ba kheloha

tsela ea Bohlale,

e seng feela ba ile ba sitoa

ho tseba se lokileng,

empa ba siela meloko e tlang

khopotso ea booatla ba bona,

e le hore bokhopo ba bona

bo se hlole bo lebaleha.

₉Empa Bohlale bo ile ba ntša

basebeletsi ba bona likhathatsong.

₁₀Ha motho ea lokileng a balehela

khalefo ea ngoan'abo,

Bohlale ba mo tataisa

litseleng tse otlolohileng,

ba 'montša 'muso oa Molimo,

'me ba mo nea tsebo

ea lintho tse halalelang;

ba mo atlehisa mesebetsing ea hae,

'me ba eketsa tholoana

ea mosebetsi oa hae.

₁₁Mohla batho ba meharo

ba mo tlatlapileng,

Bohlale ba ema le eena,

'me ba mo ruisa.

₁₂Bohlale ba mo sireletsa

lireng tsa hae,

ba mo qobisa maraba

ao li mo chehileng ka 'ona.

Kolokochanong ea hae e boima,

Bohlale ba mo fa tlholo,

e le hore a tle a tsebe hore borapeli

bo matla ho feta tsohle.

₁₃Mohla ea lokileng a rekisoang,

Bohlale ha boa ka ba mo lahla,

empa ba mo phemisa sebe.

Ba theohela le eena ka chankaneng;

₁₄'me ha e le motšoaruoa,

ha boa ka ba mo furalla,

empa ba qetella ka ho mo fumantša

lere la borena,

le taolo holim'a batlatlapi ba hae.

Bohlale ba pepesa boshano

ba baqosi ba hae,

'me ba mo nea tlotla e sa feleng.

₁₅Sechaba se halalelang

le moloko o se nang koli

oa lopolloa ke Bohlale

sechabeng sa bahlorisi.

₁₆Bohlale ba kena moeeng

oa mohlanka oa Morena,

'me ba thiba likhosi tse tšabehang

ka meka le ka mehlolo.

₁₇Ba nea batho ba halalelang

moputso oa mekhathala ea bona,

ba ba tataisa tseleng e hlollang,

ba e-ba tšireletso ea bona motšeare

le leseli le kang la linaleli bosiu.

₁₈Bohlale ba ba tšelisa

Leoatle le Lefubelu,

'me ba ba etella pele botebong

ba maliba a lona.

₁₉Empa ba khamisa

lira tsa Iseraele metsi

'me ba li betsetsa holimo

ho nyoloha botebong ba maliba.

₂₀Ka baka leo

ba lokileng ba hapa

ling tsa ba khopo;

ba binela Lebitso le halalelang la hao

lifela, oho Morena,

ba rorisa ba le pelo-'ngoe matla a hao

a ileng a ba loanela,

₂₁hobane Bohlale bo ile ba bula

limumu melomo,

'me ba rarolla maleme a masea.