SOLOMONE 16

₁Ka baka lena batho bane

ba ne ba otloe ka toka

ka liphoofolo tse joalo,

'me ba tšoenngoa ke boieane

ba libatana.

₂Empa ho fapana le kotlo ena,

u ile ua bontša mosa

ho sechaba sa hao,

'me ua lokisa likoekoe ho jeoa,

monate o khotsofatsang

takatso ea sona ea lijo.

₃Ka tsela ena Baegepeta,

leha ba ne ba lapile hakaalo,

ba lahleheloa ke takatso ea lijo,

ka baka la lihahabi tse nyonyehang

tseo ba li romeletsoeng;

empa sechaba sa hao,

ka mora' nakoana ea tlala

sa abeloa lijo tse monate-nate.

₄E ne e ka khona batlatlapi bao

ba oeloe ke tlala ea bo-ja-likata,

'me sechaba sa hao se bontšoe feela

kamoo lira tsa sona

li neng li hlokofatsoa kateng.

₅Esita le ha lihahabi tse halefileng

tse mahloko

li hlasela batho ba hao,

'me ba felisoa ke ho longoa

ke linoha tse menekang,

khalefo ea hao ha ea ka ea tsoela pele

ho isa qetellong.

₆Ba tšoenngoa motsotsoana

e le tlhokomeliso,

'me ba neoa pontšo ea pholoho,

e ba hopotsang taelo ea Molao oa hao.

₇Ea retelehang ho eona

o ne a pholosoa,

e seng ke seo a se bonang,

empa ke uena, Mopholosi oa bohle.

₈Ka tsela ena u ile ua kholisa

lira tsa rona,

hore ke uena ea ntšang motho

bobeng bohle.

₉Batho bane ba bolaoa ke ho longoa

ke litsie le lintšintši

'me ho se pheko

eo ba ileng ba e fumaneloa,

hobane ba ne ba tšoanela

ho otloa ka lintho tseo.

₁₀Ha e le bana ba hao,

bona ha baa ka ba fenngoa

esita le ke meno a linoha tse mahloko,

hobane mohau oa hao

o ile oa ba phallela 'me oa ba folisa.

₁₁Ho ba hopotsa lipolelo tsa hao,

ba longoa, ba mpa ba pholosoa kapele,

esere ba tšoha ba oela bolebaling

bo tebileng,

eaba ba fetoha litholo

mohaung oa hao.

₁₂Ho ne ho se setlama

leha e le moriana ho ba phekola,

haese Lentsoe la hao feela, Morena,

le folisang batho bohle.

₁₃Ke uena ea nang le matla holim'a

bophelo le lefu,

u theolela batho likhorong

tsa Qalo ea bafu,

u be u ba nyolle teng hape.

₁₄Ka pelo e mpe, motho a ka bolaea,

empa ha a ka ke a khutlisa

moea o faletseng,

leha e le ho lokolla moea

o amohetsoeng Qalong ea bafu.

₁₅Ho baleha matla a hao

hase ntho e ka etsahalang;

₁₆hobane ba khopo,

ka ho hana ho u tseba,

ba ile ba shaptjoa

ke letsoho la hao le matla;

ba lelekoa ke lipula tsa mehlolo

le sefako le lifefo tsa sekhahla,

'me ba e-cha lore ke mollo.

₁₇Ho makatsang ka ho fetisisa ke hore,

metsing a timang tsohle,

mollo o ne o ipha matla ho feta;

hobane lihloliloeng tsohle

li ne li loanela ba lokileng.

₁₈Ka nako e 'ngoe lelakabe

le ne le kokobela,

hore le se ke la chesa libopuoa

tse rometsoeng ho otla ba khopo,

le hore bona ba bontšoe hore kahlolo

ea Molimo e ba setse morao.

₁₉Empa, ka nako e 'ngoe,

esita le ka har'a metsi

le ne le tota ho feta

kamoo mollo o eeng o tuke kateng,

ho senya lijalo tsa lefatše le sa lokang.

₂₀Ho fapana le lintho tsena,

u ile ua nea sechaba sa hao

lijo tsa mangeloi;

'me ua se fa bohobe,

boo se sa bo sebeletsang,

bo tsoang leholimong,

bo seng bo loketse ho jeoa,

bo nang le monate oohle

o nyalanang le tatso ka 'ngoe.

₂₁Phepo ea hao e pakahalitse

lerato la hao ho bana ba hao,

'me lijo tsa hao li ba natefetse

ho ea ka takatso ea ea li jang,

tsa fetoha ho lumellana

le tatso ea motho ka mong.

₂₂Leha li le joaloka lehloa le leqhoa

li ile tsa tiisetsa mollo li sa qhibilihe,

e le ho ba tsebisa hore lijalo tsa lira

li sentsoe

ke mollo o tukang ka har'a sefako,

'me o etsang mahalima ka har'a pula.

₂₃Empa mollo oona oo,

e le hore ba lokileng ba tsebe

ho iphepa,

o ile oa lebala matla a oona a tlhaho.

₂₄Libopuoa tsohle, ka ho sebeletsa

uena Moetsi oa tsona,

li ikemiselitse ka matla

ho otla ba khopo,

empa li khutle li be mohau

molemong oa ba u tšepang.

₂₅Ka ho feto-fetoha joalo ka nako eo,

li ile tsa thusa phano ea hao ho bohle,

ho latela takatso ea ba hlokang.

₂₆Ka tsela ena, bana ba hao,

bao u ba ratileng,

Morena, ba ne ba tla ithuta

hore hase lijo tse kotuloang

tse fepang motho,

empa ke Lentsoe la hao

le phelisang ba u tšepang.

₂₇Tse hanang ho cha ka mollo

li ne li qhibiliha hang ke lebatama

la lehlaseli la letsatsi,

₂₈e le hore ho tle ho tsejoe

hore motho o lokela ho tsoha pele

ho ho chaba ha letsatsi ho u leboha,

le ho u rapela ha mafube a hlaha.

₂₉Empa tšepo ea motho ea hlokang

teboho e tla nyamela

joaloka serame sa mariha se

qhibilihang,

e fete joaloka metsi a phallang

a se nang thuso.