Pono ea bohlano: Seluloana sa mabone
1Lengeloi le neng le bua le 'na la khutla hape, la ntsosa joalokaha ho tsosoa motho ea khalehileng. 2La mpotsa, la re: “U bona eng?”
Ka le araba, ka re: “Ha ke talima, ke bona seluloana sa mabone sa khauta, se nang le sekhakeletso kaholimo. Mabone a supileng a holim'a sehlomelo sena, le mapeno a supileng bakeng sa mabone ana a kaholim'a seluloana sena. 3Ka mahlakoreng a seluloana sena sa mabone, ho na le lifate tse peli tsa mohloaare: Se seng ka tsohong le letona, se seng ka ho le letšehali.”
4Eaba ke botsa lengeloi le neng le bua le 'na, ke re: “Monghali, lintho tsee ke lintho ling?”
5Lengeloi leo la araba, la re: “Ha u tsebe hore na lintho tsee ke lintho ling?”
Ka araba, ka re: “Che, monghali.”
Morena o etsetsa Serubabele tšepiso
6Lengeloi la araba, la re: “Morena o bua tjena ho Serubabele: ‘Hase ka likhōka kapa ka matla u tlang ho atleha, empa ke ka Moea oa ka,’ ho rialo Morena oa mabōtho.
7“Uena thabahali tooe! U eng? Kapele ho Serubabele u tla batalla feela, 'me ho uena, eena o tla khephōla lejoe la ho qetela la Tempele, a le bee tulong tsa lona, ho ntse ho etsoa litlatse, ho thoe: ‘Le letle hakaakang! Le letle hakaakang!’ ”
8Morena a boela a bua le 'na, a re: 9“Serubabele o hahile mothèo oa Tempele ena ka matsoho a hae, 'me o tla be a qete ho e haha ka 'ona matsoho ao a hae. Ke moo le tla tseba hore Morena oa mabōtho o nthōmme ho lōna.
10“Ke mang ea ka nyelisang letsatsi leo ka lona ho qaloang mesebetsi e fokolang? Batho ba tla nyakalla ha ba bona Serubabele a tšoere ka letsoho la hae khoele e methang! Mabone ana a supileng ke mahlo a Morena, a thalatsang kahohle lefatšeng.”
11Ka boela ka botsa lengeloi, ka re: “Lifate tsee tse peli tsa mohloaare, tse ka tsohong le letona le ka ho le letšehali la seluloana sa mabone, tsona li bolela'ng?”
12Ka le botsa hape, ka re: “Makala aa a mabeli a mohloaare, a kamathōko ho lipompo tse peli tsa khauta, tse ntšang ole e bosehla ba khauta, 'ona a bolela'ng?”
13La nkaraba, la re: “Ha u tsebe hore na a bolela'ng?”
Ka re: “Che, monghali.”
14Eaba le re: “A tšoantša banna ba babeli, ba tlotselitsoeng ho sebeletsa Morena oa lefatše lohle.”
