Kuvuka kwaKhristu ekufeni
1Manje-ke, bazalwane, nginikhumbuta liVangeli lenganishumayela lona nalemukela namanje niseme kulo. 2Nisindziswa ngalo, nangabe nisabambelele evini lenganishumayela lona; nakungenjalo kukholwa kwenu kwaba lite.
3Ngobe nami nganinika loko lokubalulekile lengakwemukela, kutsi Khristu wafa ngenca yetono tetfu, njengaloko isho imiBhalo, 4nekutsi wembelwa, wabuye wavuswa kulabafile ngelilanga lesitsatfu, njengaloku yayivele ishito imiBhalo, 5nekutsi wabonwa nguKhefase, wase ubonwa ngulabali-12. 6Emvakwaloko wabonwa, ngasikhatsi sinye, bazalwane labendlula ema-500, liningi labo lisekhona naloku ngikhuluma nje, kodvwa labanye sebafa. 7Emvakwaloko wabonwa nguJakobe, wase ubonwa baphostoli bonkhe.
8Ekugcineni kwabo bonkhe wadzimate wabonwa nangimi lenginjengalowatalwa kungesiso sikhatsi sakhe. 9Ngobe mine ngingulomncane kubaphostoli, bengingakafaneli nekutsi kutsiwe ngingumphostoli, ngobe ngatingela ngahlupha libandla laNkulunkulu. 10Kepha ngemusa waNkulunkulu nginguloku lengingiko, nemusa wakhe kimi awuzange ube lite, kodvwa ngasebenta kakhulu kunabo bonkhe, noko kungesimi, kodvwa kungumusa waNkulunkulu lonami. 11Ngako-ke nome kungimi nome kungabo, sishumayela kona loko, nani nakholwa kona loko.
Kuvuka kwalabafile ekufeni
12Kepha-ke nangabe kushunyayelwa kutsi Khristu uvusiwe kulabafile, basho kanjani laba labanye emkhatsini wenu kutsi kute lapha kuvuka kulabafile? 13Kodvwa-ke nangabe kungekho kuvuka kulabafile, kusho kutsi akavuswanga-ke naye Khristu. 14Kepha nangabe Khristu akavuswanga-ke kulabafile, kusho kutsi kushumayela kwetfu kulite, nekukholwa kwenu kulite. 15Yebo-ke sitfolakala sibofakazi bemanga ngaNkulunkulu, ngobe sifakaze kutsi Nkulunkulu wavusa Khristu kulabafile langazange amvuse kambe, nangabe kantsi labafile abavuswa. 16Ngobe nangabe labafile abavuswa, kusho kutsi naKhristu akavuswanga-ke. 17Kepha nangabe Khristu akavuswanga, kusho kutsi kukholwa kwenu akusiti lutfo, nisesetonweni tenu, 18nalabo lasebafa bakuKhristu nabo babhubha. 19Nangabe singulabetsembela kuKhristu kulokuphila kwala kuphela, sibantfu bekulilelwa kunebantfu bonkhe.
20Kepha manje Khristu wavuswa kulabafile, waba ngumvuli wendlela kulabo labatawuvuka kulabafile. 21Njengobe kufa kweta ngemuntfu munye, nekuvuka kulabafile nako kute ngemuntfu munye. 22Njengobe ku-Adamu bonkhe bayafa, kanjalo futsi nakuKhristu bonkhe bayawuvuswa ekufeni. 23Kepha ngulowo nalowo uyawuvuka ngesigaba sakhe: Khristu kucala, bese kuba ngulabo lababaKhristu ekubuyeni kwakhe. 24Emvakwaloko kuyawufika kuphela, mhlazana anikela umbuso kuNkulunkulu uYise, nasacitse yonkhe imibuso, nebukhosi bonkhe, nemandla onkhe. 25Ngobe Khristu kumele abuse, aze Nkulunkulu ancobe tonkhe titsa takhe atibeke ngephansi kwetinyawo takhe. 26Sitsa sekugcina lesiyawucitfwa kufa. 27“Ngobe Nkulunkulu utfobise tonkhe tintfo ngephansi kwetinyawo takhe.” Kepha nangabe umBhalo utsi: “Tintfo tonkhe titfotjisiwe,” kuyakhanya kutsi ungaphandle kwato Nkulunkulu lotitfobisele ngephansi kwakhe. 28Kodvwa-ke nangabe tonkhe tintfo setitfotjiselwe ngephansi kwakhe, lapho-ke nayo iNdvodzana yemuntfu iyakutitfoba ngephansi kwalowo lowatfobisa tonkhe tintfo ngephansi kwayo, kuze Nkulunkulu abe nguko konkhe kuko konkhe.
29Kepha bayakwenta njani lababhajatiselwa kulabafile, nangabe kuliciniso kutsi abavuki? Pho, babhajatiselelwani kulabafile? 30Pho, tsine yini sibesengotini ngetikhatsi tonkhe? 31Bazalwane, ngekubongwa lenginako ngani kuKhristu Jesu iNkhosi yetfu ngiyacinisa kutsi: Ngifa mihla yonkhe le! 32Nangabe e-Efesu ngalwa nalokutsiwa tilwane, kungisita ngani loko? Nangabe labafile abavuswa:
“Kuncono sidle sinatse,
ngobe kusasa sitawufa.”
33Ningayengeki:
“Bangani lababi bonakalisa similo lesihle.”
34Sangulukani; ningaphindzi none, ngobe labanye abamati Nkulunkulu. Ngikusho loko khona nitewuba nemahloni.
Imitimba yekuvuka kulabafile
35Lomunye utawutsi: “Labafile bavuswa njani? Beta banemtimba lonjani?” 36Silima-ndzini, awati yini kutsi lokuhlanyelako wena akukutfoli kuphila kungakafi kucala? 37Futsi loko lokuhlanyelako, usuke ungahlanyeli lona likhaba, kepha usuke uhlanyela inhlanyelo lengesilo likhaba, nome ngabe yakolo, nome ngabe yalokunye nje-ke. 38Kepha Nkulunkulu unika inhlanyelo simo sayo ngekutsandza kwakhe, ngulolo nalolo luhlobo lwenhlanyelo lunesimo salo.
39Inyama ayifanani yonkhe: lenye yebantfu, lenye yetilwane, lenye yetinyoni, lenye yetinhlanti.
40Ikhona-ke nemitimba yasezulwini nemitimba yasemhlabeni, kepha inkhatimulo yemitimba yasezulwini iyodvwa, neyemitimba yasemhlabeni iyodvwa. 41Iyodvwa inkhatimulo yelilanga, iyodvwa inkhatimulo yenyanga, iyodvwa nenkhatimulo yetinkhanyeti; yebo, nguleyo nkhanyeti inekukhatimula lokwehlukile kukwalenye.
42Kunjalo-ke kuvuka kulabafile. Kuhlanyelwa kunekubola, kuvuswe kungasenakubola. 43Umtimba ungcwatjwa unekudzelelwa, uvuswe unenkhatimulo; ungcwatjwa unebutsakatsaka, uvuswe unemandla. 44Ungcwatjwa ungumtimba wenyama, uvuswe ungumtimba wemoya. Nangabe ukhona umtimba wenyama, kusho kutsi-ke ukhona nemtimba wemoya. 45Kanjalo futsi kubhaliwe kutsi: “Umuntfu wekucala Adamu waba ngumuntfu lophilako;” Adamu wekugcina waba nguMoya lonika kuphila. 46Kepha kwekucala akusiko kwemoya kodvwa kwenyama, bese-ke kwesibili kuba kwemoya. 47Umuntfu wekucala wavela emhlabeni alutfuli; umuntfu wesibili wavela ezulwini. 48Njengobe abenjalo umuntfu welutfuli, banjalo nalabo lababelutfuli; nanjengobe anjalo umuntfu wasezulwini, banjalo nalabo lababasezulwini. 49Futsi-ke njengobe sinelufuto lwalona lowelutfuli, kanjalo siyawuba nelufuto lwalona wasezulwini.
50Nginitjela naku, bazalwane bami, kutsi inyama nengati akunawulidla lifa lembuso waNkulunkulu, nekubola akulidli lifa lelingaboli.
51Lalelani, nginitjele imfihlakalo: Asite safa sonkhe, noko siyawuguculwa sonkhe 52ngesikhashana, ngekucwabita kweliso, ngelicilongo lekugcina. Ngobe licilongo liyawukhala, labafile bavuswe bangasenakubola, tsine siguculwe. 53Ngobe loku lokubolako kufanele kutsi kwembatse kungaboli, naloko lokufako kufanele kutsi kwembatse kungafi.
54Nangabe loko lokubolako sekwembetse kungaboli, naloku lokufako sekwembetse kungafi, kutawube sekugcwaliseke livi lelibhaliwe lelitsi:
“Kufa kumitwe kuncoba.”
55“Kufa, kuphi kuncoba kwakho?
Kufa, luphi ludvonsi lwakho?”
56Ludvonsi lwekufa sono, nemandla esono ngumtsetfo.
57Kodvwa akabongwe Nkulunkulu losinika kuncoba ngeNkhosi yetfu Jesu Khristu.
58Ngako-ke, bazalwane bami labatsandzekako, banini ngulabasimile labangaceki, nikhutsale emsebentini weNkhosi ngaso sonkhe sikhatsi, nati kutsi kusebenta kwenu akusilo lite eNkhosini.
