1 kubaseKorinthe 5

₁Kubikiwe ngempela kimi kutsi kukhona bugwadla nebuphingi emkhatsini wenu, futsi buphingi lobungazange sebubekhona ngisho nakulabangakholwa, ngobe kutsiwa umuntfu ushenda nemkayise. ₂Kodvwa ngulapho niyatikhukhumeta! Anikhali ngani, kutsi lowo lowente lentfo lembi nimkhiphe emkhatsini wenu? ₃Ngobe nome ngingekho emkhatsini wenu ngemtimba, kodvwa ngikhona ngemoya; lowo lowente loko sengivele ngimlahle ngelicala, ₄ngimlahle egameni leNkhosi yetfu Jesu. Nanihlangana nine, nami nginani ngemoya, nangemandla eNkhosi yetfu Jesu, ₅lowo muntfu mnikeleni kuSathane ekufeni kwemtimba wakhe, khona kuyawusindziswa umoya wakhe ngelilanga leNkhosi Jesu.

₆Kutibonga kwenu kubi. Kantsi anati yini kutsi imbiliso lencane ibilisa inhlama yonkhe? ₇Khiphani imbiliso lendzala, khona nitewuba yinhlama lensha. Nine senivele nite imbiliso, ngobe liWundlu leliPhasika letfu lelinguKhristu selahlatjwa. ₈Ngako-ke asigubhe umkhosi wetfu, hhayi ngembiliso lendzala yekushinga nebubi, kodvwa ngesinkhwa lesite imbiliso, lesinebucotfo neliciniso.

₉Nganibhalela encwadzini yami kutsi ningahlanganyeli netingwadla netiphingi. ₁₀Angisho bona bantfu labangakholwa labatingwadla netiphingi, nome lababukhali, nebaphangi, nome labakhonta tithico. Loko bekungasho kutsi kufanele nisuke ningabikho emhlabeni. ₁₁Kepha manje nginibhalele ngatsi ningahlanganyeli nemuntfu lekutsiwa ungumzalwane kantsi uyingwadla, nome siphingi, nome ngulobukhali, nome ngulokhonta tithico, nome ngulowetfukanako, nome sidzakwa, nome sigebengu; ningete nadla ngisho nekudla nemuntfu lonjalo.

₁₂Kodvwa vele ngabe nginandzabani nekwehlulela labangephandle? Akusilaba labangekhatsi yini labamele kwehlulelwa? ₁₃Kodvwa Nkulunkulu uyabehlulela labo labangephandle; nemBhalo utsi: “Mcosheni lomubi emkhatsini wenu!”