1 kuThimothi 4

₁Moya ukhuluma ngalokusebaleni kutsi ngetikhatsi tekugcina labanye bayawuhlubuka ekukholweni, balandzele imimoya ledukisako netimfundziso temadimoni. ₂Bantfu labatentisako bayawufundzisa emanga, ngobe bonembeza babo bashiswe luphawu. ₃Bayawuvimbela kushada nekuteka, batsi akuzilwe kudla lokutsite. Phela konkhe kudla kwadalwa nguNkulunkulu lekufanele kutsi labakholwako bakwemukele ngekubonga, njengobe babantfu labalatiko liciniso lonkhe. ₄Ngobe konkhe lokudalwe nguNkulunkulu kulungile. Kuko konkhe lokwemukelwa ngekubonga kute lokufanele kwaliwe, ₅ngobe konkhe kungcweliswe ngelivi laNkulunkulu nangemthandazo.

₆Utawuba sisebenti saKhristu lesincomekako nawungayendlulisela kubazalwane lemiyalo. Nawe utakondleka emoyeni ngemavi ekukholwa nangemfundziso yeliciniso, lobambelele kuyo. ₇Ungahambisani netinganekwane tebulukati letingakalungi. Tetayete wena kumesaba Nkulunkulu. ₈Ngobe kwetayeta umtimba ngekwelula imisipha kunenzuzo kwesikhashana nje, kodvwa kumesaba Nkulunkulu kunenzuzo etintfweni letinyenti, ngobe kucuketse setsembiso semphilo yamanje kanye nesemphilo letako. ₉Lelivi letsembekile, lifanele kwemukelwa ngibo bonkhe. ₁₀Kuze kube manje siyasebenta sishikaneke, ngobe sibeke litsemba letfu kuNkulunkulu lophilako, longuMsindzisi wabo bonkhe bantfu, ikakhulu walabo labakholwako.

₁₁Yala ufundzise ngaletintfo.

₁₂Ungavumi kutsi busha bakho bedzeleleke kubantfu. Kodvwa bani sibonelo kulabakholwako; ube sibonelo ngekukhuluma, nangesimilo, nangelutsandvo, nangekukholwa, nangekuba msulwa. ₁₃Tinikele kufundzela bantfu umBhalo, ubayale, ubafundzise, ngize ngifike. ₁₄Ungasivilapheli sipho sakho lowasinikwa ngelivi lesiphrofetho ngesikhatsi baholi belibandla babeka tandla etikwakho.

₁₅Khutsala kakhulu kuloko, khona batewubona kuchubekela kwakho embili. ₁₆Uticaphele wena nekufundzisa kwakho, ungesuki kuko; ngobe ngekwenta njalo utawube utisindzisa wena kanye nalabakuvako.