2 Tikhronike 11

₁Watsi kube efike eJerusalema Rehobowamu, wabutsa yonkhe indlu yakaJuda neyakaBhenjamini, libutfo lelalinemadvodza lati-180 000, tihlabani todvwa, wahlomisa imphi yekuhlasela indlu yaka-Israyeli, kuze batewubuyisela umbuso kuyeRehobowamu.

₂Kodvwa kwefika livi laSimakadze kuShemaya, umuntfu waNkulunkulu, latsi: ₃“Tjela Rehobowamu, umsa waSolomoni, inkhosi yakaJuda, nawo onkhe ema-Israyeli akaJuda newakaBhenjamini, utsi: ₄‘Naku lokushiwo nguSimakadze, utsi: Ningakhuphuki kuyakulwa nabomnakenu. Hambani niye emakhaya enu nonkhe, ngobe loku kungumuno wami.’ ” Ngako balilalela livi laSimakadze babuyela emakhaya abo, bangabe basaya kuyauhlasela Jerobowamu.

₅Rehobowamu wahlala eJerusalema, wakha emadolobha latinqaba kaJuda: ₆iBhetlehema, ne-Etamu, neThekhowa, ₇neBhethi Suri, neSokho, ne-Adulamu, ₈neGathi, neMaresha, neZifu, ₉ne-Adorayimu, neLakhishi, ne-Azekha, ₁₀neSora, ne-Ayaloni kanye neHebroni. Lawa-ke bekungemadolobha lakhiwa aba tinqaba kulakaJuda nelakaBhenjamini. ₁₁Wawakhisisa wawacinisa, wase ubeka netindvuna kuwo, kwabekwa kuwo kudla, nemafutsa emncumo kanye neliwayini. ₁₂Wabeka emahawu netikhali kuwo onkhe lamadolobha, wawenta acina kakhulu. Ngako lakaJuda nelakaBhenjamini aba ngaphansi kwakhe.

₁₃Baphristi nemaLevi ato tonkhe tifundza tema-Israyeli, basekela Rehobowamu. ₁₄EmaLevi adzimate ashiya onkhe emadlelo awo nemafa awo, aya kaJuda naseJerusalema, ngobe Jerobowamu kanye nemadvodzana akhe abesavele abacoshile ekutseni babe baphristi baSimakadze. ₁₅Wavele watibekela baphristi bakhe betindzawo letiphakeme nebetithico labetentile tinesimo sembuti nelinkhonyane. ₁₆Bonkhe bantfu baleso naleso sive saka-Israyeli lababebeke tinhlitiyo tabo ekufuneni Simakadze, Nkulunkulu wema-Israyeli, balandzela emaLevi baya eJerusalema kuyawunikela imihlatjelo kuSimakadze, Nkulunkulu waboyise. ₁₇Bacinisa umbuso wakaJuda, basekela Rehobowamu, umsa waSolomoni, iminyaka lemitsatfu, solomane bahamba etindleleni taDavide naSolomoni ngaso sonkhe leso sikhatsi.

₁₈Rehobowamu watsatsa Mahalathi, indvodzakati yaJerimothi, umsa waDavide, unina wayo kungu-Abihayili, indvodzakati ya-Eliyabe, umsa waJese. ₁₉Wamtalela emadvodzana: boJewushe, naShemariya kanye naZahamu. ₂₀Rehobowamu wabe sewutsatsa Makha, indvodzakati ya-Absalomu, lowamtalela bo-Abiya, na-Athayi, naZiza, naShelomithi. ₂₁Rehobowamu watsandza Makha, indvodzakati ya-Absalomu, kwendlula onkhe emakhosikati kanye netingani takhe. Emakhosikati akhe abeli-18 asawonkhe, tingani takhe tatingema-60, anemadvodzana langema-28 nemadvodzakati langema-60.

₂₂Rehobowamu wabeka Abiya, umsa waMakha, kutsi abe ngumtfwanenkhosi lomkhulu kulabomnakabo, entela kutsi abe yinkhosi emvakwakhe. ₂₃Wavele wenta kuhlakanipha ngekutsi lamadvodzana akhe awasakatele kuto tonkhe tifundza takaJuda netakaBhenjamini, nakuwo onkhe lamadolobha latinqaba. Wawabela kudla lokunyenti, wawatsatsela nebafati labanyenti.