Tinhlupheko taka-Israyeli
1Ngemnyaka wema-36 wekubusa kwa-Asa, Bhasha, inkhosi yaka-Israyeli, wakhuphuka wayawuhlasela Juda, wakha iRama, yaba lidolobha leliyinqaba, entela kutsi kubete namunye lophumako nalongenako eveni laka-Asa, inkhosi yakaJuda.
2Asa wase ukhipha yonkhe isiliva negolide leyayibekwe engcebeni yasethempelini laSimakadze nasesigodlweni sakhe, wakutfumela kuBheni Hadadi, inkhosi yaseSiriya, leyayihlala eDamaseko. 3Watsi: “Akube nesivumelwane emkhatsini wetfu sobabili, njengobe sasikhona emkhatsini wababe neyihlo. Ngikutfumelela isiliva negolide. Manje-ke, yephula sivumelwane sakho naBhasha, inkhosi yaka-Israyeli, kuze esuke kimi.”
4Bheni Hadadi wayivumela inkhosi Asa, watfumela tindvuna takhe temabutfo kutsi tiyewuhlasela emadolobha aka-Israyeli. Tancoba, tatfumba i-Ijoni, neDani, ne-Abela Mayimu, kanye nawo onkhe emadolobha latingungu akaNaftali. 5Kwatsi kube Bhasha akuve loko, wayekela kwakha iRama, wawushiya phansi umsebenti wakhe. 6Inkhosi Asa yahamba nawo onkhe emadvodza akaJuda, beta eRama batfutsa ematje netingodvo letatisetjentiswa nguBhasha. Wakha ngako iGeba neMispa.
Umboniswa Hanani
7Ngaleso sikhatsi Hanani, umboniswa, weta ku-Asa, inkhosi yakaJuda, wakhuluma kuye watsi: “Njengobe wetsembele enkhosini yaseSiriya, esikhundleni sekwetsembela kuSimakadze Nkulunkulu wakho, umbutfo waseSiriya sewukushiyile wakubalekela. 8EmaKushe nemaLibhiya abengesiyo yini imphi lenemandla nalenetincola letinyenti nebagibeli bemahhashi labanyenti? Noko watsi kube wetsembele kuSimakadze, Simakadze wase ubanikela esandleni sakho. 9Ngobe emehlo aSimakadze abuka emhlabeni wonkhe kucinisa labo labatinhlitiyo tabo titinikele kuye ngalokuphelele. Wena wente intfo lebulima kakhulu, kusukela manje utakulwa timphi siphelane.”
10Asa wamtfukutselela lomboniswa ngenca yaloko; watfukutsela wagaya tiboti, waze wamfaka ejele. Ngasona leso sikhatsi Asa wabaphatsa ngencindzetelo lenesihluku labanye bantfu.
Siphetfo sembuso wa-Asa
11Leminye imininingwane ngekubusa kwa-Asa, kusukela ekucaleni kuze kube ngusekugcineni, ibhaliwe encwadzini yemilandvo yemakhosi akaJuda newaka-Israyeli. 12Emnyakeni wema-39 wekubusa kwakhe Asa tinyawo takhe tase tiyachwala. Kwala nome lesifo sesimcinisela, noko akazange afune lusito lwaSimakadze; esikhundleni saloko wafunana nelusito lwetinyanga kuphela. 13Kwatsi ngemnyaka wema-41 wekubusa kwakhe Asa wakhotsama. 14Wafihlwa ethuneni labetakhele lona eDolobheni laDavide. Bamfaka eluhlakeni lolwalufakwe imitsi yekugcina sidvumbu, bafaka netinhlobonhlobo temakha, base babasa imbutfuma yemlilo yekumlilela.
