2 kubaseKorinthe 10

₁Mine, Pawula matfupha, ngiyanincenga ngebumnene nangebubele baKhristu. Nginguye yena loPawula lenimtsatsa ngekutsi uyatikhobosa nasemkhatsini wenu, kodvwa abe nesibindzi kini nangekho embikwenu. ₂Nginincenga kutsi nase ngifikile lapho kungadzingeki ngibadvumele ngesibindzi lengicondze kusisebentisa kulabanye labatsi tsine sichutjwa live. ₃Ngobe nome siphila eveni, kodvwa asilwi ngetikhali telive. ₄Tikhali lesilwa ngato akusito telive, kodvwa tikhali taNkulunkulu letinemandla ekubhidlita tinqaba, ticitse tinkhulumo letingenamsebenti. ₅Tibhidlita konkhe lokuphakamele kuvimbela kwati Nkulunkulu. Titfumba yonkhe imicabango, tiyente itfobele kulalela Khristu. ₆Nangabe senitimisele kulalela ngalokuphelele, sikulungele kujezisa konkhe kungalaleli.

₇Tsatsani lamaciniso njengobe anjalo. Kukhona yini lokholwa kutsi yena waKhristu? Kuhle loko, kodvwa akase acabange naku: Natsi futsi sibaKhristu njengaye. ₈Mhlawumbe ngitigabatisa kakhulu ngalamandla neligunya lami lenganikwa lona nguNkulunkulu, kutsi nginakhe nginganibulali. Kodvwa ngite emahloni ngaloko. ₉Ningacabangi kutsi ngicondze kunetfusa nje ngaletincwadzi. ₁₀Labanye batsi: “Tincwadzi takhe tinemandla nesisindvo, kodvwa bukhona bakhe abunasitfunti, nenkhulumo yakhe imalula.” ₁₁Lowo locabanga loko kufanele ati kutsi loko lesikukhulume encwadzini singekho, siyawukwenta nase sifikile lapho kini.

₁₂Asisho kutsi ngaloko sicondze kutilinganisa nalabo labatincomako, singeke sikwente loko. Kodvwa nabaticatsanisa bona bodvwa, batilinganise bona bodvwa, batilima. ₁₃Kodvwa singeke sitigabatise kwendlula, noko sitawugcina emaphetselweni lesinikwe wona nguNkulunkulu cobo lwakhe. Lawo maphetselo anifaka ngekhatsi nine baseKhorinte. ₁₄Ngitsi lesefika kini kucala neliVangeli laKhristu; ngako-ke nasitigabatisa ngani, sisengekhatsi kwemaphetselo etfu. ₁₅Asitigabatisi ngephandle kwemaphetselo ngalokwentiwe ngulabanye, kodvwa siyetsemba kutsi nisakhula ekukholweni, nemsebenti wetfu utakwandza emkhatsini wenu, ₁₆kuze sitewushumayela liVangeli nasemaveni langesheya kwenu, ngaphandle kwekutigabatisa ngemsebenti lese wentiwe ngulomunye umuntfu.

₁₇UmBhalo utsi: “Lowo lofuna kutibonga, akatibonge ngeNkhosi.” ₁₈Ngobe lowemukelela eNkhosini, akusiye lotincomako, kodvwa ngulowo lonconywa yiNkhosi.