Dutheronomi 1

₁Lawa-ke ngemavi aMosi lawakhuluma kuso sonkhe sive sema-Israyeli basesehlane ngasemphumalanga nemfula iJordane, e-Arabha, macondzana neSufi, emkhatsini wePharani neThofeli, neLabani, neHaserothi, neDizahabi. ₂Kutsatsa emalanga lali-11 kuhamba usuka eHorebe uye eKhadeshi Bhaneya, nawuhamba ngemgwaco weNtsaba iSeyiri. ₃Ngemnyaka wema-40, ngelilanga lekucala enyangeni yeli-11, kusukela baphuma eGibhithe, Mosi wakhuluma kuma-Israyeli konkhe loko Simakadze labemyale ngako kutsi awatjele kona, lokumacondzana nawo. ₄Loko wakwenta emvakwekuba asehlule Sihoni, inkhosi yema-Amori, leyayibusa eHeshboni. Emphini yase-Edreyi abehlule Ogi, inkhosi yaseBhashani, leyayibusa e-Ashtarothe. ₅Ngasemphumalanga nemfula iJordane, eveni lakaMowabi, Mosi wacala wawufundzisa lomtsetfo.

Wakhuluma watsi: ₆“Simakadze Nkulunkulu wetfu ukhulume kitsi siseseHorebe, watsi: ‘Senihleti kakhulu kulentsaba. ₇Tfutsani, nichubekele etintsabeni tema-Amori, nakuto tonkhe leto tive letisedvutane, tase-Arabha, naletisetintsabeni, naletingaphansi kwetintsaba ngasenshonalanga, naletiseNegevu, lekuyiningizimu yelive, naletigudla lwandle, eveni lemaKhenani kuya kulaseLebanoni, kufike ngisho nasemfuleni lomkhulu iYufrathe. ₈Libukeni-ke lonkhe lelo live lenginiphe lona. Ngenani kulo nilidle lelive Simakadze lafunga ngalo kutsi utalipha bokhokho benu bo-Abrahama, na-Isaka, naJakobe, kanye netitukulwane tabo letiyawuvela emvakwabo.’ ”

₉“Ngaleso sikhatsi ngakhuluma kini, ngatsi: ‘Ningumtfwalo losindza kakhulu kimi kutsi ngiwetfwale ngedvwa. ₁₀Simakadze Nkulunkulu wenu sewunandzisile manje, senibanyenti kakhulu, senize naba ngangetinkhanyeti tesibhakabhaka. ₁₁Shangatsi Simakadze, Nkulunkulu waboyihlomkhulu, anganandzisa ngetinkhulungwane letiphindziwe, anibusise njengobe etsembisa! ₁₂Kodvwa ngingatetfwala kanjani tinkinga tenu, nemitfwalo yenu, nemibango yenu, mine ngingedvwa? ₁₃Khetsani emadvodza lahlakaniphile, nalanekucondza, nalatiwako kuleso nakuleso sive, ngitawube sengiyawabeka kutsi anengamele.’

₁₄“Nani nangiphendvula natsi: ‘Loko loncoma kukwenta kuhle.’ ₁₅Ngako ngatsatsa labaholi betive tenu, emadvodza lahlakaniphile nalahloniphekile, ngawabeka kutsi anengamele, abe tindvuna tetinkhulungwane, netemakhulu, netema-50, netemashumi, nekutsi abe tiphatsimandla taletive tenu.

₁₆“Labaholi ngabayala ngaso leso sikhatsi ngatsi: ‘Hlolisisani imibango yalabanakenu, bese nehlulela ngekungakhetsi, nome licala lisemkhatsini wema-Israyeli nome lisemkhatsini wema-Israyeli newetive. ₁₇Ningacali nehlulele ngekukhetsa; lalelani lomkhulu nalomncane ngalokufananako. Ningesabi muntfu, ngobe kwehlulela kwaNkulunkulu. Licala lelilukhuni kini niboliletsa lapha kimi, ngitekuliva.’ ₁₈Ngaleso sikhatsi nganitjela konkhe lebenifanele kukwenta.”

₁₉“Satfutsa eHorebe, njengobe Simakadze Nkulunkulu wetfu abesiyalile, sacondza ngasetintsabeni, eveni lema-Amori, sadzabula lonkhe lelo hlane lelesabekako lesenilibonile, saze sefika eKhadeshi Bhaneya. ₂₀Ngase ngitsi kini: ‘Senifikile eveni letintsaba, live lema-Amori, lesiliphiwa nguSimakadze Nkulunkulu wetfu. ₂₁Libukeni-ke lelive leniliphiwe nguSimakadze Nkulunkulu wenu. Khuphukelani kulo niyekulidla lelo live, njengobe natjelwa nguSimakadze Nkulunkulu waboyihlomkhulu. Ningesabi, ningalahlekelwa nalitsemba.’

₂₂“Nonkhe neta kimi, nafike natsi: ‘Asitfumele emadvodza ayesihlolela lelive, bese aletsa umbiko macondzana nendlela lekufanele sihambe ngayo, kanye nemadolobha lesitawakhandza khona.’

₂₃“Lomcondvo wabonakala umuhle kimi; ngako ngavele ngakhetsa emadvodza lali-12 emkhatsini wenu, yaba yinye kuleso nakuleso sive. ₂₄Esuka akhuphukela eveni letintsaba efika eSihosheni sase-Eshikholi, asihlolisisa. ₂₅Lamadvodza akha letinye tetitselo talelo live atiphatsa, eta nato lapha kitsi; afike asibikela atsi: ‘Lelive lasinika lona Simakadze Nkulunkulu wetfu lihle kakhulu.’

₂₆“Kodvwa noko nabe seniyala kukhuphuka; nahlubuka, nangawulaleli umyalo waSimakadze Nkulunkulu wenu. ₂₇Nakhonona emathendeni enu, natsi: ‘Simakadze uyasenyanya; kungako nje asikhipha eveni laseGibhithe, abentela kutasinikela etandleni tema-Amori kutsi atesibhubhisa. ₂₈Siyaphi nje? Labanaketfu sebasesabisile, batsi: “Bantfu bakhona bacinile, kantsi futsi badze kunatsi; emadolobha abo makhulu, futsi atinqaba, netibondza tawo tiphakeme taze tatsintsa sibhakabhaka. Sabona ngisho nemadvodzana a-Anaki khona lapho.” ’

₂₉“Ngase ngitsi kini: ‘Ningesabi; nabo ningabesabi. ₃₀Simakadze Nkulunkulu wenu, lohamba embikwenu, utanilwela njengobe enta eGibhithe embikwenu nibuka, ₃₁kanjalo nasehlane futsi. Nabona lapho kutsi Simakadze Nkulunkulu wenu wanetfwala kanjani, njengababe etfwele indvodzana yakhe, kuyo yonkhe indlela nahamba naze nefika kuyo lendzawo.’ ₃₂Kodvwa najinge nangete nametsemba Simakadze Nkulunkulu wenu, ₃₃labehamba embikwenu, ngemlilo ebusuku nangelifu emini. Loko abekwentela kunifunela tindzawo lapho ningemisa khona, nekutsi anikhombise indlela lekufanele nihambe ngayo.”

₃₄“Watsi kube Simakadze eve loko kusola kwenu, watfukutsela waze wafunga watsi: ₃₅‘Kute nome munye umuntfu walesitukulwane lesibi loyakulibona lelive lelihle lengafunga ngalo kutsi ngiyakulinika bokhokho benu, ₃₆ngaphandle kwaKhalebi, umsa waJefune. Yena-ke uyakulibona, nginike yena netitukulwane takhe live lapho lunyawo lwakhe belunyatsele khona, ngobe walandzela Simakadze ngenhlitiyo yakhe yonkhe.’ ₃₇Simakadze wangitfukutselela ngenca yenu, waze watsi kimi: ‘Nawe ungeke ungene kulo. ₃₈Kodvwa umsiti wakho, Joshuwa, umsa waNuni, utawungena kulo. Mkhutsate, ngobe utawuhola lama-Israyeli kutsi alidle.’

₃₉“Labo bantfwana benu labasebancane lenitsite batawutfunjwa, bona labo labasengakakwati kwehlukanisa lokuhle kulokubi, batawungena kulelo live. Ngitabapha lona, nabo batalidla. ₄₀Kodvwa nine bantfu, ncandzekani, nicondze ngasehlane ngendlela leya eLwandle Lolubovu.

₄₁“Nine naphendvula natsi: ‘Sonile kuSimakadze. Sitawukhuphuka siyekulwa, njengobe Simakadze asiyalile.’ Ngako-ke nonkhe nahloma, nicabanga kutsi kutawuba malula kukhuphukela kulelive letintsaba.

₄₂“Kodvwa Simakadze wakhuluma kimi, watsi: ‘Batjele utsi: “Ningakhuphuki kuyakulwa, ngobe mine ngingeke ngibe nani. Titsa tenu titakunehlula.” ’ ₄₃Ngabe sengiyanitjela, kodvwa anizange nifune kungilalela. Nahlubuka ngekungawulaleli umyalo waSimakadze, ngekutiphakamisa kwenu nachubeka nashuca, nakhuphukela eveni letintsaba. ₄₄Ema-Amori, labehlala kuleto tintsaba, aphuma anihlasela, anicosha anitselekela njengelibulo letinyosi, anishaya anilahla phansi kusukela eSeyiri kuze kuyewufika eHoma. ₄₅Nabuya lapho nakhala kuSimakadze, kodvwa akazange akunake loko kukhala kwenu, wasuke watsalalisa nje.”

₄₆“Ngako-ke nahlala eKhadeshi emalanga lamanyenti, nacitsa sikhatsi lesidze nilapho.