Dutheronomi 33

“Simakadze wachamuka eSinayi,

kwasa kitsi nakavela eSeyiri,

wakhanya aseNtsabeni iPharani.

Wefika achamuka

etinkhulungwaneni talabangcwele,

weta kuvutsa umlilo

ngasesandleni sakhe sangesekudla.

₃Ngempela nguwe lotsandza lesive;

bonkhe labangcwele basesandleni sakho.

Bakhotsama etinyaweni takho bonkhe.

Kuwe bemukela tifundvo,

₄umtsetfo lesawunikwa nguMosi,

lifa lesive sakaJakobe.

₅Simakadze waba yinkhosi yakaJeshuruni

ngesikhatsi baholi besive

bahlangene netive taka-Israyeli.

₆“Shangatsi Rubeni angaphila

angete afa,

nesive nemadvodzana akhe

angete aba mbalwa.”

“Vani, Simakadze,

kukhala kwa-Juda;

umletse esiveni sakhe.

Ngetandla takhe uvikela indlela yakhe.

Awu, bani ngumsiti wakhe etitseni takhe.”

“IThumimu yakho ne-Urimu yakho

ngeyalowo muntfu lowamtsandza.

Wamvivinya eMasa;

wamelana naye emantini aseMeribha.

₉Wakhuluma ngeyise nenina watsi:

‘Anginandzaba nabo.’

Akazange abanake bomnakabo,

wabatsalalisela bantfwabakhe.

Kodvwa walilindza livi lakho,

wasilondvolota nesivumelwane sakho.

₁₀Uyawufundzisa imiyalo yakho kuJakobe,

nemitsetfo yakho ku-Israyeli.

Ushisa imphepho embikwakho,

neminikelo yekushiswa yonkhe elatini lakho.

₁₁Simakadze,

busisa lonkhe likhono lakhe,

imisebenti yetandla takhe ikujabulise.

Gwaza tinkhalo talabo labamvukelako,

ushaye titsa takhe uticedze,

tingaphindzi tivuke.”

“Lotsandzekako waSimakadze

akahlale aphephile kuye,

ngobe uyamvikela lilanga lonkhe,

uhlala emhlane wakhe.”

“Simakadze akabusise live lakhe

ngematolo laligugu asezulwini

nangemanti lajulile langaphansi kwemhlaba.

₁₄Akalibusise ngalokuncono kakhulu

lokuvetwa lilanga,

nangetivuno letinhle tenyanga.

₁₅Akalibusise ngetipho telikhetselo

tetintsaba tasendvulo,

nangenala yemagcuma aphakadze.

₁₆Akalibusise ngetipho letikhetsekile temhlaba,

nangekugcwala kwawo.

Akalibusise nangekutsandzeka kulowo

lohlala esihlahleni lesivutsako.

Sibusiso asehlele etikwenhloko yaJosefa,

yebo, etikwelibunti lakhe

lowo lowehlukaniswa nabomnakabo.

₁₇Litubulo lakhe lenkunzi linebukhosi,

timphondvo takhe tenyatsi.

Ngaletimphondvo uyawudvungulula

tonkhe tive kanyekanye,

kuze kufike emaphetselweni emhlaba.

Banjalo baka-Efrayimu,

batinkhulungwane tetinkhulungwane.

Banjalo nabakaManase, batinkhulungwane.”

“Jabula Zebuloni, ekuphumeni kwakho,

nawe, Isakhari, emathendeni akho.

₁₉Bayakubitela tive entsabeni yabo

banikele khona lapho imihlatjelo yekulunga;

batitapele enaleni yetilwandle

nasemnotfweni lofihlwe esihlabatsini.”

“Ubusisiwe lowo lowandzisa umbuso waGadi!

Gadi uhlala lapho njengelibhubesi,

udzabula umkhono, yebo, nelukhakhayi.

₂₁Watikhetsela live lelihle kakhulu,

ngobe sabelo semholi sasigciniwe.

Yena weta kubaholi besive,

yebo, akanye nebaholi baka-Israyeli,

wafeza kulunga kwaSimakadze

kanye netimiso taSimakadze.”

“Dani liwundlu lelibhubesi,

leligcume laphuma eBhashani.”

“Naftali weneliswe kutsandvwa,

ugcwele tibusiso taSimakadze.

Uyakudla live lelingasenshonalanga,

nelive lelingaseningizimu

nelwandle lwaseGalile.”

“Lobusiseke kakhulu

kumadvodzana onkhe ngu-Asheri.

Uyawutsandvwa bomnakabo,

ageze tinyawo takhe ngemafutsa.

₂₅Imicabo yemasango akho

iyawuba ngeyensimbi neyelitfusi,

nemandla akho alingane nemalanga akho.

₂₆“Kute lonjengaNkulunkulu, Jeshuruni,

logibela emazulu kuze atewusita wena,

agibele nemafu ngebukhosi bakhe.

₂₇Nkulunkulu waphakadze siphephelo sakho,

ngaphansi ngimikhono yaphakadze.

Uyawucosha titsa takho embikwakho,

akhulume atsi: ‘Tibhubhise!’

₂₈Ngako Israyeli uyawuhlala aphephile,

umtfombo waJakobe uvikelekile,

eveni lemabele neleliwayini lelisha,

lapho emazulu ehlisela khona ematolo.

₂₉Ubusisiwe wena, Israyeli!

Ngubani lofanana nawe,

sive lesisindziswe nguSimakadze?

Nguye losihlangu sakho nemsiti wakho,

nenkemba yakho yeludvumo.

Titsa takho tiyawutiletsa kuwe,

wena uyakutigcobagcoba

tindzawo tato letiphakeme.”