Eksodusi 25

₁Simakadze wakhuluma kuMosi, watsi: ₂“Khuluma esiveni saka-Israyeli kutsi asingiletsele umnikelo, ukhishwe ngibo bonkhe bantfu labanenhlitiyo levumako, wena uwemukele egameni lami. ₃Leminikelo lotawuyemukela kufanele kube ngulena: yigolide, nesiliva, nelitfusi, ₄nensontfo leluhlata njengesibhakabhaka, nalebukhwebeletane, nalebovu ngalokutopele, nendvwangu yelineni lecolisakele, neboya bembuti, ₅netikhumba tetihhanca letishukiwe taguculwa taba bovu, netikhumba temahhashi aselwandle, netingodvo temgamba, ₆nemafutsa ekukhanyisa tibane, netinongo temafutsa ekugcobisa, netemphepho lenuka kamnandzi, ₇nematje e-oniksi, nalamanye ematje laligugu ekufakwa esidziyeni nasesembatfweni sesifuba semPhristi Lomkhulu. ₈Labantfu kufanele bangentele indlu lengcwele, khona ngitawuhlala emkhatsini wabo. ₉Nawakha lendlu lengcwele nato tonkhe timphahla tayo, ubokwenta konkhe ngendlela lengitakukhombisa yona.”

₁₀“Kufanele bangakhele libhokisi lesivumelwane ngemgamba: budze balo bube ngemasentimitha langaba li-110, bubanti bube ngemasentimitha langaba ngema-66, kuphakama kube ngemasentimitha langaba ngema-66. ₁₁Ulembese ngegolide lecengekile ngekhatsi nangephandle; ulephetse ngegolide. ₁₂Utakwakha emajiva egolide ekuletfwala lekufanele ashayelwe kulo etinyaweni talo, abe mane, abe mabili nganhlanye, nanganhlanye abe mabili. ₁₃Ubenta timboko tekuletfwala tibe temgamba, bese utembesa ngegolide. ₁₄Letimboko utifake ekhatsi kulamajiva lasetinhlangotsini talelibhokisi; tisetjentiswe ekwetfwaleni lelibhokisi. ₁₅Tiyawuhlala ekhatsi emajiveni alelibhokisi, tingakhishwa kulo. ₁₆Ekhatsi kwalelibhokisi ubofaka letibhelekeca tematje letimbili lengitakunika tona.

₁₇“Simbonyo salo lesisihlalo semusa, usente ngegolide lecengekile: budze baso bube ngemasentimitha langaba li-110, bubanti bube ngemasentimitha langaba ngema-66. ₁₈Uyawukwenta emakherubhi lamabili ngegolide legcotjiwe uwabetsele lelinye likherubhi libe ngala, lelinye libe ngale. ₁₉Yenta lelinye likherubhi libe ngale ngekugcineni kwesihlalo semusa, lelinye libe ngala ekugcineni, bese kuba yintfo yinye nesimbonyo. ₂₀Lamakherubhi kufanele avule emaphiko awo engamele lesihlalo semusa abukane, abheke lesihlalo semusa. ₂₁Letibhelekeca tematje letimbili ubotifaka ekhatsi kulelibhokisi, bese ulimbonya ngalesihlalo semusa. ₂₂Ngitawuhlangana nawe lapho, ngikhulume nawe ngisetikwalesihlalo semusa emkhatsini walamakherubhi lamabili lasetikwelibhokisi. Ngulapho ngitakunika khona yonkhe imitsetfo yami yesive sema-Israyeli.”

₂₃“Ubenta litafula ngemapulango emgamba: budze balo bube ngemasentimitha langaba ngema-88, bubanti bube ngemasentimitha langaba ngema-44, kuphakama kube ngemasentimitha langaba ngema-66. ₂₄Ubolembesa ngegolide lecengekile, ulephetse ngegolide. ₂₅Lapha emaceleni wakhe emaphetselo lanebubanti besandla, alitungelete ndzawo tonkhe, bese uwahlobisa ngelugebhezi lwegolide. ₂₆Lelitafula ubolentela emajiva egolide lamane, lamajiva uwabophele emakoneni omane alemilente yalo. ₂₇Lamajiva ekufaka letimboko tekwetfwala kufanele abesedvute nemaphetselo alelitafula. ₂₈Uyakwenta timboko ngemgamba, utembese ngegolide, lelitafula liyakwetfwalwa ngato. ₂₉Ubenta emapulede, netindzebe, nemajeke, netindishi temnikelo wewayini; tonkhe letintfo kufanele tentiwe ngegolide lecengekile. ₃₀Etikwalelitafula kufanele ubeke sinkhwa lesinikelwe kimi, lekufanele sibesembikwami ngaso sonkhe sikhatsi.”

₃₁“Yenta lutsi lwetibane ngegolide lecengekile; sibunu salo nesicu salo nako kwentiwe ngegolide legcotjiwe. Imihlobiso yalo ibe njengetimbali letisengimidvumba nalesetichakazile, ukwente kube sikhatsa sinye nalolutsi. ₃₂Kuboba nemagala lasitfupha esicwini salo, lamatsatfu abe nganhlanye, nalamatsatfu abe nganhlanye. ₃₃Lelo nalelo gala kufanele libe nemihlobiso lemitsatfu lenesimo setimbali te-alimondi, letinye tibe nguletisengimidvumba, letinye tibe ngulesetichakazile. ₃₄Lolutsi lwetibane kufanele lube nemihlobiso lemine leyentiwe yaba njengetimbali te-alimondi, letisengimidvumba nalesetichakazile. ₃₅Ngako kusho kutsi kutawuba nalesengumdvumba ngaphansi kwemagala lamabili ekucala lesuka esicwini, kulandzele lenye lesengumdvumba ngaphansi kwemagala lamabili lalandzelako, kanjalo nakulawo lamabili ekugcina. Leto totintsatfu titawucondzana nalamagala lasitfupha. ₃₆Letimbali letisengimidvumba, nalamagala, nelutsi lwesibane kufanele kube sikhatsa sinye segolide lecengekile legcotjiwe. ₃₇Yenta tibane letisikhombisa kulesicu utimise titewukhanyisa ngembili kwalesicu. ₃₈Tijubantsambo netitsebe talo utente ngegolide lecengekile. ₃₉Ubosebentisa igolide lecengekile lengemakhilogremu langaba ngema-35, nawakha lolutsi lwetibane nako konkhe lokuhambisana nalo. ₄₀Ucaphele kutsi letintfo utakha ngaleyo ndlela lengakukhombisa yona entsabeni.”