Hezekeli 14

₁Labanye bebabaholi baka-Israyeli beta kimi, bafike bahlala embikwami. ₂Livi laSimakadze lefika kimi, latsi: ₃“Ndvodzana yemuntfu, lamadvodza asafake tithico etinhlitiyweni tawo, emisa nematje lamabi ekukhubekisa embikwebuso bawo. Kufanele ngiwavumele yini kutsi abute kimi?

₄“Ngako-ke khuluma kuwo uwatjele, utsi: ‘Naku lokushiwo yiNkhosi Simakadze, itsi: Nome ngabe ngumuphi kuma-Israyeli lofaka tithico enhlitiyweni yakhe, emise nelitje lelibi lekukhubekisa embikwebuso bakhe, bese uya kumphrofethi, mine Simakadze ngiyakumphendvula mine cobo lwami ngangekwebukhulu bekukhonta kwakhe tithico. ₅Loko ngiyawukwenta kuze ngitetibamba kabusha tinhlitiyo tebantfu baka-Israyeli, lase bangilahle bonkhe baya etithicweni tabo.’

₆“Ngako-ke khuluma kuyo indlu yaka-Israyeli, utsi: ‘Naku lokushiwo yiNkhosi Simakadze, itsi: Phendvukani! Gucukani nishiye letithico tenu, nikulahle konkhe lokunengekako ningasakwenti.

₇“ ‘Nangabe nome ngumuphi um-Israyeli nome wetive lohlala ka-Israyeli lowehlukana nami afake tithico enhlitiyweni yakhe, emise litje lelibi lelisikhubekiso embikwakhe, bese uya kumphrofethi ayewubuta ngami, mine Simakadze ngiyakumphendvula mine cobo lwami. ₈Ngiyawubhekisa buso bami ngakulowo muntfu, ngimente abe sibonelo nentfo yekuhlekisa. Ngiyakumncuma esiveni sami. Ngulapho-ke niyawungati khona kutsi mine nginguSimakadze.

₉“ ‘Nangabe umphrofethi acindzetelekile kutsi aphimisele siphrofetho, ngimi Simakadze lomcindzetele lowo mphrofethi, futsi ngiyakwelula sandla sami ngimelane naye, ngimbhubhise emkhatsini wesive sami, ema-Israyeli. ₁₀Bayakwetfwala licala labo, lowo mphrofethi uyawuba nelicala ngalokufananako nalowo muntfu labute kuye. ₁₁Yebo, sive sema-Israyeli singeke siphindze seduke kimi, futsi singeke siphindze sitingcolise ngato tonkhe letono taso. Bayawuba bantfu bami, mine ngibe nguNkulunkulu wabo, kusho iNkhosi Simakadze.’ ”

₁₂Livi laSimakadze lefika kimi, latsi: ₁₃“Ndvodzana yemuntfu, nangabe live lona kimi ngekungetsembeki, bese ngelula sandla sami ngimelane nalo ngekuncamula umtfombo wekudla kwalo, ngitfumele indlala kulo, ngibulale bantfu labakulo kanye netilwane, ₁₄ngisho nome nalamadvodza lamatsatfu, boNowa, naDanyela, naJobe bebakulo, bebayakutisindzisa bona kuphela ngekulunga kwabo, kusho iNkhosi Simakadze.

₁₅“Kube bengingatfumela tilwane tesiganga kulelo live, tilishiye lite bantfwana, libe lihlane kangangekutsi kubete namunye longendlula kulo alidzabule ekhatsi ngenca yaleto tilwane, ₁₆iNkhosi Simakadze itsi: Ngifunga kuphila kwami, ngisho nome ngabe lamadvodza lamatsatfu abekulo, abengeke awasindzise emadvodzana nemadvodzakati awo. Ngawo kuphela labengasindziswa, kodvwa live lona beliyakuba lihlane.

₁₇“Nome kube bengingaletsa inkemba ngitewumelana nalelo live ngitsi: ‘Lenkemba ayidzabule kulo lonkhe lelo live,’ ngibulale bantfu balo netilwane talo, ₁₈iNkhosi Simakadze itsi: Ngifunga kuphila kwami, ngisho nome ngabe lamadvodza lamatsatfu abekulo, abengeke awasindzise emadvodzana nemadvodzakati awo. Ngawo kuphela labengasindziswa.

₁₉“Nome kube bengingatfumela sifo lesibulalanako kulelo live, ngitfululele lulaka lwami etikwalo ngekubhubhisa lokukhulu, ngibulale bantfu balo netilwane talo, ₂₀iNkhosi Simakadze itsi: Ngifunga kuphila kwami, ngisho nome ngabe boNowa, naDanyela, naJobe bebakulo, babengeke basindzise indvodzana nome indvodzakati. Bebayawutisindzisa bona kuphela ngekulunga kwabo.

₂₁“Ngobe naku lokushiwo yiNkhosi Simakadze, itsi: Kuyawuba kubi kangakanani-ke nangitfumela tehlulelo tami letine letiyawumelana neJerusalema: inkemba, nendlala, netilwane tesiganga kanye nesifo lesibulalanako, kutsi titewubulala bantfu bayo netilwane tayo! ₂₂Noko kuyawuba khona insali, emadvodzana nemadvodzakati, leyawukhishwa kuyo. Iyawuta kini, nani niyawutsi nanibona kutiphatsa kwayo netento tayo, bese niyadvudvuteka macondzana nalenhlekelele lengiyehlisele etikweJerusalema, yebo, yonkhe inhlekelele lengiyehlisele etikwayo. ₂₃Niyawudvudvuteka, nanibona simo sekutiphatsa kwayo netento tayo, ngobe niyawukwati kutsi kute lengikwente ngaphandle kwesizatfu, kusho iNkhosi Simakadze.”