Hezekeli 19

₂“ ‘Maye, unyoko abelibhubesikati

emkhatsini walamanye emabhubesi!

Abelala phansi emkhatsini wemabhubesi lamancane,

afuye emagomodlwane akhe.

₃Wakhulisa lelinye lalamagomodlwane akhe,

lakhula laba libhubesi lelinemandla.

Lafundza nalo kudladlabula tinyamatane litidle,

lashwabudzela nebantfu.

₄Tive teva ngalo,

lagcumukela emdzibini wato.

Talidvonsa ngetintweba,

talimikisa eGibhithe.

₅“ ‘Latsi lelibhubesikati nalibona

litsemba lalo lingakafezeki,

nelitsemba lalo seliphelile,

latsatsa lelinye lemazinyane alo,

lalenta laba libhubesi lelinemandla.

₆Lajangaza emkhatsini wemabhubesi,

ngobe phela lase lilibhubesi lelicinile.

Lafundza kudladlabula tinyamatane,

lakhona nekushwabudzela bantfu.

₇Labhidlita tinqaba tabo,

labhubhisa nemadolobha abo.

Live kanye nalabo labakhile kulo

betfuka batfutfumela ngenca yekubhavumula kwalo.

₈Tive tase tiyalihlasela,

leto letisemaveni lakhelene nalo.

Taletsiya ngekwendlala lugibe lwato,

lavele labhajwa emgodzini wato.

₉Talidvonsa ngetintweba,

talifaka ehhokweni,

tase tilimikisa enkhosini yaseBhabhulona,

talivalela ejele,

ngako akuzange kuphindze kuvakale kubhavumula kwalo,

etintsabeni taka-Israyeli.

₁₀“ ‘Unyoko abefanana nesihlahla semvini esivinini,

sihlahla lesasihlanyelwe ngasemantini;

sasitsela kakhulu futsi sinemagala laluhlata,

ngenca yalamanti lamanyenti.

₁₁Emagala aso abecinile,

alungele nekuba yindvuku yebukhosi.

Sakhula saphakama saba ngetulu

kwawo onkhe emacembe lamanyenti;

sabonakala ngekuphakama kwaso nangemagala aso lamanyenti.

₁₂Kodvwa sazuphuneka ngenca yelulaka,

salahlwa phansi emhlabatsini.

Umoya wasemphumalanga wasomisa,

saphundleka titselo taso,

emagala aso lacinile abuna,

umlilo wawadla.

₁₃Nyalo sesihlanyeleke ehlane,

eveni lelomile naleligagadzekile.

₁₄Umlilo wabhebheteleka

kulelinye lemagala aso lamakhulu wadla titselo taso.

Kute nalinye ligala lelicinile lelisasele kuso

lelilungele kutsi libe yindvuku yebukhosi.’