Hezekeli 22

₁Livi laSimakadze lefika kimi, latsi: ₂“Ndvodzana yemuntfu, uyakulehlulela yini? Uyakulehlulela yini lelidolobha lekucitsa ingati? Ngako lisukele umelane nalo ngato tonkhe tento talo letisinengiso, ₃utsi: ‘Naku lokushiwo yiNkhosi Simakadze, itsi: Awu, wena dolobha lelitiletsela lona imbhubhiso ngekucitsa ingati ekhatsi kulo, liphindze litingcolise ngekwakha tithico, ₄sewunelicala ngenca yekucitsa ingati, wabuye watingcolisa ngetithico lotentile. Sewente emalanga akho ashesha kuphela, nesiphetfo seminyaka yakho sesifikile. Ngako-ke ngitakwenta ube yintfo yekuhlekisa nentfo yekuphukutwa kuwo onkhe emave. ₅Labo labasedvutane nalabo labakhashane kakhulu kuwe bayawukuphukuta, wena dolobha lelilihlazo naleligcwele siphitsiphitsi.

₆“ ‘Ase ubuke kutsi leso naleso sikhulu saka-Israyeli lesikuwe siwasebentisa kanjani emandla aso ekucitseni ingati. ₇Kuwe tikhulu tabaphatsa kabi boyise, nabonina tabedzelela; ekhatsi kuwe tabacindzetela betive, taphatsa kabi intsandzane nemfelokati. ₈Utedzelele tintfo tami letingcwele, wawona emaSabatha ami. ₉Kuwe kunebantfu labahlebako, labanhloso yabo isekucitseni ingati; ekhatsi kuwe kunalabo labadlela etintsabeni lekutsiwa tingcwele, bavusele khona tinkhanuko tekulalana. ₁₀Kuwe kunalabo labalalana nabomkayise, ekhatsi kuwe kunalabo labalala nebesifazane nabasesikhatsini basesengcolile ngekwemtsetfo. ₁₁Kuwe kunemuntfu lophinga nemfati wamakhelwane wakhe, lomunye ente lihlazo ngekuphinga namalukatane wakakhe, lomunye adlwengule indzodzakati letalwa nguyise cobo. ₁₂Kuwe kunemadvodza lemukela imidizo entele kucitsa ingati; utsatsa intalo ugale inzuzo lenkhulu, wente intalo yebutulujane kumakhelwane wakho ngekumcindzetela. Sewungikhohliwe mine, kusho iNkhosi Simakadze.

₁₃“ ‘Ngempela, ngiyakwetfwala imikhono enhloko ngaleyo nzuzo lembi loyitfolile, nangengati loyicitse emkhatsini wenu. ₁₄Siyawukuma yini leso sibindzi sakho? Tona tandla takho tiyawucina yini ngelilanga lengiyawubhekana nawe ngalo? Mine Simakadze sengikhulumile, futsi ngitakwenta loko. ₁₅Ngitanisakatela emkhatsini wetive, nginihlakatele emaveni ngemave; ngiyawukucedza kungcola kwenu. ₁₆Niyawutsi-ke nase ningcolisiwe emehlweni etive, bese niyati kutsi mine nginguSimakadze.’ ”

₁₇Livi laSimakadze lefika kimi, latsi: ₁₈“Ndvodzana yemuntfu, indlu yaka-Israyeli seyingemanyela kimi; bonkhe sebalitfusi, nemfimfi, nensimbi kanye nemtfofu lokusele ekhatsi embutfumeni yemlilo. Bangemanyela nje esiliva. ₁₉Ngako-ke naku lokushiwo yiNkhosi Simakadze, itsi: ‘Njengobe nonkhe seniphendvuke naba ngemanyela, ngitanibutsela eJerusalema. ₂₀Njengobe bantfu bacocela ndzawonye isiliva, nelitfusi, nensimbi, nemtfofu, nemfimfi bakufake embutfumeni yemlilo batewukuncibilikisa ngemlilo lovutsako, kanjalo nami ngiyakunigcogcela ndzawonye ngentfukutselo yami nangelulaka lwami, nginifake ekhatsi edolobheni nginincibilikise. ₂₁Ngiyawunigcogcela ndzawonye bese nginivutsela ngelulaka lwami lolushisako, niyawuncibilikela ekhatsi kulo. ₂₂Njengesiliva incibilikiswa yimbutfuma yemlilo, kanjalo nani ngiyakunincibilikisela ekhatsi kulo, niyawube seniyati-ke kutsi mine Simakadze ngitfululele lulaka lwami etikwenu.’ ”

₂₃Livi laSimakadze laphindze lefika kimi, latsi: ₂₄“Ndvodzana yemuntfu, khuluma eveni, utsi: ‘Wena ulive lelingakahlanteki nome linetfwa yimvula ngelilanga lelulaka lwami.’ ₂₅Kuneluzungu lwetikhulu talo letisekhatsi kulo njengelibhubesi lelibhodlako nalidladlabula inyamatane yalo lelitayidla, tishwabudzela bantfu, titsatse ingcebo netintfo letingemagugu, tente bafelokati labanyenti ekhatsi kulo. ₂₆Baphristi balo bephula umtsetfo wami bahlambalate tintfo tami letingcwele; abehlukanisi emkhatsini walokungcwele nalokutintfo nje; bafundzisa kutsi kute umehluko emkhatsini walokuhlantekile nalokungcolile ngekwemtsetfo; bavala emehlo abo bangakunaki kugcina emaSabatha ami, khona ngitewuhlanjalatwa emkhatsini wabo. ₂₇Tiphatsimandla talo letisemkhatsini welive tifanana netimphisi letidladlabula tinyamatane tato; ticitsa ingati tibulale bantfu, khona titewutfola inzuzo lembi. ₂₈Baphrofethi balo bahuca letento tabo ngemcakaco ngemibono leyinkhohliso nekubhula lokungemanga. Batsi: ‘Naku lokushiwo yiNkhosi Simakadze,’ kube Simakadze angakaze wakhuluma lutfo. ₂₉Bantfu bakulelive baphanga nekuphanga bagcekeze nekugcekeza; bacindzetela labamphofu nalabeswele, babaphatse kabi bekuhamba, bangabaphatsi ngekwemtsetfocotfo.

₃₀“Ngafuna umuntfu emkhatsini wabo labengakha lubondza eme embikwami esikhaleni, emele lelive, kuze ngingetikulibhubhisa, kodvwa angitfolanga namunye. ₃₁Ngako-ke ngiyawutfululela lulaka lwami etikwabo, ngibagwinye ngentfukutselo yami levutsako, ngikwehlisele etinhloko tabo konkhe loko labakwentile, kusho iNkhosi Simakadze.”