Inkhosi yaseGibhithe ifananiswa nanyokangwenya
1Ngemnyaka weli-12, enyangeni yeli-12, ngelilanga lekucala, livi laSimakadze lefika kimi, latsi: 2“Ndvodzana yemuntfu, lila, ulilele Faro, inkhosi yaseGibhithe, utsi:
“ ‘Ufanana nelibhubesi emkhatsini wetive;
ufanana nanyokangwenya etilwandle,
ushaya lidamu emifudlaneni yakho,
uphehle emanti ngetinyawo takho,
udvunge lemifudlana.
3“ ‘Naku lokushiwo yiNkhosi Simakadze, itsi:
“ ‘Ngesicumbi lesikhulu sebantfu
ngiyawuphonsa linetha lami etikwakho,
bayawukuhudvulela ngaphandle ngelinetha lami.
4Ngiyawukulahla emhlabatsini, ngikujikijele esigangeni.
Ngiyawukwenta tonkhe tinyoni telizulu takhele etikwakho,
bese kutsi tonkhe tilwane temhlaba
tikudle tikushwabudzele.
5Ngiyakwembesa tintsaba ngetidvumbu takho letibolako,
ngigcwalise tihosha ngenseketse yakho.
6Live ngiyakulenya engatini yakho legeletako
yonkhe indlela kuya etintsabeni,
kutsi tigodzi tigcwaliswe ngenyama yakho.
7Nase ngikucisha,
ngiyakuwasibekela emazulu,
ngente tinkhanyeti tawo tibe mnyama.
Lilanga ngiyakulimbonya ngelifu,
nenyanga ingakukhiphi kukhanya kwayo.
8Tonkhe tikhanyisi leticwebetelako emazulwini
ngiyawutenta tibe mnyama etikwakho;
ngiyakwehlisela bumnyama etikwelive lakho,
kusho iNkhosi Simakadze.
9“ ‘Ngiyawutihlupha tinhlitiyo tetive letinyenti,
nase ngiletsa imbhubhiso yakho emkhatsini wetive,
yebo, emaveni longazange sewuwati.
10Tive letinyenti ngiyawutenta titfutfumele ngawe,
nemakhosi ato ayawushaciswa kwesaba ngenca yakho,
nase ngijikitisa inkemba yami embikwawo.
Ngelilanga lekuwa kwakho
ngulowo nalowo uyawutfutfumela ngekuphila kwakhe
kuyo yonkhe imizuzwana yalelo langa.
11“ ‘Ngobe naku lokushiwo yiNkhosi Simakadze, itsi:
“ ‘Inkemba yenkhosi yaseBhabhulona
iyawuta itewukuhlasela.
12Ticumbi tebantfu bakho ngiyawutilahla phansi
ngetinkemba temachawe lanemandla,
yebo, emachawe lanelunya kwendlula tonkhe tive.
Umgcabho waseGibhithe ayakuwuphihlita,
kutsi tonkhe ticumbi tebantfu bayo tiketulwe.
13Ngiyakutibhubhisa tonkhe tinkhomo tayo
eceleni kwemanti lamanyenti,
langaseyiwuphindze anyakatiswe lunyawo lwemuntfu,
nome advungwe tinselo tetinkhomo.
14Emanti ayo ngiyakuwenta aphindze ahlobe,
nemifudlana yayo igelete njengemafutsa,
kusho iNkhosi Simakadze.
15Ngiyawutsi nase ngenta iGibhithe ibe lihlane,
live ngilihlubule konkhe lelinako,
nase ngibashaya bonkhe labaphilako lapho,
ngulapho-ke bayawukwati khona
kutsi mine nginguSimakadze.’
16“Lesi sililo labayakuyihlabelela sona. Emadvodzakati etive ayakusihlabela; ngobe ayawulilela iGibhithe neticumbi tayo, kusho iNkhosi Simakadze.”
Live lalabafile
17Ngemnyaka weli-12, ngelilanga leli-15 lenyanga yekucala, livi laSimakadze lefika kimi, latsi: 18“Ndvodzana yemuntfu, lilela ticumbi tebantfu baseGibhithe, bese ubehlisela emhlabeni longaphansi, yona kanye nemadvodzakati etive letinemandla kanye nalabo labehlela emgodzini. 19Khuluma kubo utsi: ‘Nine nitsandvwe kwendlula labanye yini? Yehlani niyewulaliswa emkhatsini walabangakasoki.’ 20Bayawukuwa emkhatsini walabo lababulewe ngenkemba. Inkemba seyikhokhiwe; iGibhithe ayihudvulwe kanye nato tonkhe leto ticumbi tayo tebantfu. 21Tingwazi letatinemandla kanye nalabebasitana neGibhithe, bemukela emaGibhithe eveni lalabafile. Bememeta batsi: ‘Labangakasoki sebehlile, sebalele lapha, sebabulewe ngenkemba!’
22“I-Asiriya ikhona lapho kanye nayo yonkhe imphi yayo; itungeletwe ngemathuna abo bonkhe lababulewe bayo, bonkhe labo lababulewe ngenkemba. 23Emathuna abo asekujuleni kwemgodzi, nemphi yayo ilala itungelete lithuna layo. Bonkhe labo lababange kutfutfumela eveni lalabaphilako bagwaziwe, balahlwa phansi ngenkemba.
24“I-Elamu ilapho, kanye nato tonkhe ticumbi tebantfu bayo labatungelete lithuna layo. Bonkhe bagwaziwe, balahlwa phansi ngenkemba. Bonkhe labo lababange kutfutfumela eveni lalabaphilako behla bangakasoki baya ngaphansi kwemhlaba. Betfwele lihlazo labo kanye nalabo labehlela emgodzini. 25I-Elamu yendlalelwe umbhedze emkhatsini walabagwaziwe, kanye nato tonkhe ticumbi tebantfu bayo letitungelete lithuna layo. Bonkhe abakasokwa, babulewe ngenkemba. Njengobe kutfutfumelisa kwabo sekwandze nelive lonkhe lalabaphilako, betfwele lihlazo labo kanye nalabo labehlela emgodzini; balaliswe emkhatsini walabagwaziwe.
26“BoMesheki naThubali balapho, bakanye nato tonkhe ticumbi tebantfu babo letitungelete emathuna abo. Bonkhe abakasokwa, babulewe ngenkemba ngobe babange kutfutfumela eveni lalabaphilako. 27Abalali yini kanye nalamabutfo langakasokwa lasabulewe, lehlele phansi ethuneni kanye netikhali tawo temphi, latinkemba tawo tabekwa ngaphansi kwetinhloko tawo? Sijeziso ngetono tawo sahlala ematsanjeni awo, lite nome kwesatjwa kwalamabutfo kwase kulisibekele lelive lalabaphilako.
28“Awu Faro, nawe futsi utakwephulwa ulale emkhatsini walabangakasoki, labo lababulewe ngenkemba.
29“I-Edomu ilapho, emakhosi ayo nato tonkhe tiphatsimandla tayo; nome babenemandla, noko balaliswe kanye nalababulewe ngenkemba nalabo labangakasokwa, kanye nalabo labehlela emgodzini.
30“Tonkhe tiphatsimandla tasenyakatfo nabo bonkhe baseSidoni balapho; behlela phansi kanye nalabagwaziwe bahlazekile, lite nome kwase kunekwesaba lokwase kubangwe ngemandla abo. Balele bangakasokwa kanye nalabo lababulewe ngenkemba, betfwala lihlazo labo kanye nalabo labehlela emgodzini.
31“Faro, yena kanye nayo yonkhe imphi yakhe, utawubabona, bese uyadvudvuteka ngenca yato tonkhe leticumbi tebantfu bakhe letabulawa ngenkemba, kusho iNkhosi Simakadze. 32Lite nome ngamenta wabanga kutfutfumela eveni lalabaphilako, kodvwa Faro nato tonkhe ticumbi tebantfu bakhe bayawulaliswa emkhatsini walabangakasoki, nalabo lababulewe ngenkemba, kusho iNkhosi Simakadze.”
