Genesisi 31

₁Jakobe weva emadvodzana aLabani akhuluma atsi: “Jakobe sewutsetse konkhe lobekukwababe. Sewunjinge ngaletimphahla tababe.” ₂Jakobe wabona kutsi buso baLabani babungasamjabuleli njengakucala. ₃Simakadze wakhuluma kuJakobe watsi: “Hamba ubuyele eveni lakini, lapho watalelwa khona, ngitawuba nawe.”

₄Ngako-ke Jakobe wabita boRakheli naLeya kutsi bete kuye emadlelweni, lapho abelusele khona imfuyo yakhe. ₅Wafike wakhuluma kubo watsi: “Sengibonile kutsi buso beyihlo abusangijabuleli njengakucala, kodvwa Nkulunkulu wababe abenami. ₆Nani niyati kutsi uyihlo ngimsebentele ngawo onkhe emandla ami. ₇Kodvwa uyihlo sewungiphambile ngekutsi agucule liholo lami ngalokuphindvwe kalishumi, noko Nkulunkulu akamvumeli kutsi ente lokubi kimi. ₈Utsite nakatsi: ‘Liholo lakho kutawuba nguletimacabhacabha todvwa,’ umhlambi wonkhe wesuka watala letimacabhacabha. Nome asatsite: ‘Liholo lakho kutawuba nguletinemishi,’ umhlambi wonkhe wesuka watala letinemishi todvwa. ₉Nkulunkulu uyitsatse kanjalo-ke imfuyo yeyihlo wayinika mine.

₁₀“Kwatsi ngesikhatsi tekhwelwa letimbuti ngabhudza, ngatsi ngiyabuka ngabona letiphongo letekhwela letimbutikati kutsi tatinemishi, timacabhacabha, naletimabalabala. ₁₁Ingilosi yaNkulunkulu yangibita ephusheni yatsi: ‘Jakobe!’ Ngasabela ngatsi: ‘Ngilapha.’ ₁₂Yakhuluma kimi yatsi: ‘Buka la, tonkhe letiphongo letekhwela letimbutikati tinemishi, timacabhacabha, timabalabala; ngobe sengikubone konkhe lokwentiwa nguLabani kuwe. ₁₃NginguNkulunkulu waseBetheli, lapho wagcoba khona litje ngemafutsa, walenta sikhumbuto, wafunga kimi. Sukuma-ke manje, utfutse kulelive, ubuyele eveni lakini, lapho kunenkhaba yakho khona.’ ”

₁₄BoRakheli naLeya baphendvula batsi: “Pho, sisenaso yini sabelo nome lifa lekungeletfu endlini yababe? ₁₅Kambe asisesibo bafokati yini? Ngobe sewatsengisa ngatsi, nemali layitfola ngatsi sewayidla wayicedza. ₁₆Yonkhe ingcebo letsetfwe nguNkulunkulu kubabe ngeyetfu nebantfwabetfu. Ngako-ke, yenta loko Nkulunkulu lakukhulume kuwe.”

₁₇Jakobe wesuka lapho wagibelisa bantfwabakhe nebafati bakhe emakameleni, ₁₈wayichuba yonkhe imfuyo yakhe kanye nako konkhe kwakhe labekuholile eMesophothamiya, wancandzeka wabuyela kuyise, Isaka, eveni laseKhenani. ₁₉Labani abengekho ayewuhhula timvu takhe, Rakheli weba tithico takabo. ₂₀Jakobe wamnyenyela Labani, umSiriya, ngobe akazange amtjele kutsi utawuhamba. ₂₁Wabaleka nako konkhe labenako, wewela umfula iYufrathe, emabombo awabhekise ngasetintsabeni takaGileyadi.

₂₂Watsi kube Labani atjelwe ngelilanga lesitsatfu kutsi Jakobe akasekho ubalekile, ₂₃watsatsa bomnakabo wamlandzela amcosha ngemuva, kwadzimate kwaphela emalanga lasikhombisa, waze wamkhandza etintsabeni takaGileyadi. ₂₄Kodvwa Nkulunkulu weta wakhuluma ngeliphupho kuLabani, umSiriya, watsi: “Ucaphele ungakhulumi lokuhle nome lokubi kuJakobe.” ₂₅Labani wamkhandza Jakobe. Jakobe abemise lithende lakhe kuleto tintsaba takaGileyadi, naLabani kanye nabomnakabo naye wakanekisa kuto leto tintsaba.

₂₆Labani wafike wakhuluma kuJakobe, watsi: “Seyini-ke lena lose uyentile, unginyenyeleleni ngekuhamba nemadvodzakati ami kungatsi bafati lobatfumbe emphini? ₂₇Uhambeleni ngekunyenya? Awukangitjeli ngani, khona phela ngitekukhipa ngekujabula, nangekuhlabela, nangelugubhu, nangelihabhu? ₂₈Awukangivumeli ngani kutsi ngivalelise emadvodzana nemadvodzakati ami ngekuwanga? Ibulima-ke lentfo loyentile. ₂₉Nginawo emandla ekukulimata; kodvwa Nkulunkulu weyihlo ukhulume kimi itolo ebusuku ephusheni watsi: ‘Ucaphele, ungakhulumi lokuhle nome lokubi kuJakobe.’ ₃₀Nyalo-ke njengobe sewuhamba ukhumbule bakini, utebeleni letithico tami?”

₃₁Jakobe waphendvula Labani, watsi: “Kungobe ngesabile kutsi ungahle ungemuke lamadvodzakati akho. ₃₂Kodvwa lowo loyawukhandza tithico takho kuye akafe nekufa. Phenya la emkhatsini wetfu ukhombe lokukwakho lokukimi ukutsatse bonkhe bantfu babuka.” Phela Jakobe abengati kutsi letithico tatebiwe nguRakheli.

₃₃Ngako-ke Labani waya ethendeni laJakobe, nelaLeya, nasethendeni letisebenti letisikati letimbili; kodvwa akatitfolanga tithico. Waphuma ethendeni laLeya waya ethendeni laRakheli. ₃₄Rakheli bekatsetse letithico watifihla ngaphansi kwesihlalo selikamela, wahlala etikwato. Labani, watiphumphutsa lonkhe lithende laRakheli, wangete watitfola. ₃₅Rakheli watsi kuyise: “Shangatsi inkhosi yami ingete yangitfukutselela ngekutsi ngingeke ngiphakame embikwayo, ngobe ngisesikhatsini.” Labani waphenya, wanyakulula, kodvwa akazange atitfole letithico.

₃₆Jakobe watfukutsela wagcwala kokana, watsetsisa Labani watsi: “Siphi-ke siphambuko sami? Sono sami siphi, kutsi bewungaze ungitfungatse kangaka? ₃₇Njengobe sewuphenye watinyakulula kangaka letimphahla tami, tiphi-ke temndeni wakho? Tibeke la embikwabo bonkhe labantfu babuka kutsi kube ngibo lababehluleli emkhatsini wakho nami. ₃₈Ngicedze iminyaka lengema-20 ngihleti nawe. Timvu takho netimbuti takho atizange setiphunte, angizange sengidle kwasasihhanca sakho. ₃₉Ngisho naleti letatidliwe tilwane tesiganga ngangingatiletsi kuwe, kodvwa ngangivele ngitenane ngetami. Nawe wawuvele utifune kimi letebiwe emini nome ebusuku. ₄₀Emini bengibhadliswa lilanga, ebusuku ngishushwe lichwa, ngiphelelwe nabutfongo. ₄₁Bengihleti nawe iminyaka lengemashumi lamabili, emadvodzakati akho ngiwasebentele iminyaka lelishumi namine, timphahla takho ngatelusa iminyaka lesitfupha, nakhona lapho wangidlelela umholo wami ngekuwugucula emahlandla lalishumi. ₄₂Kube Nkulunkulu wababe, naNkulunkulu wa-Abrahama, lokwesaba kwa-Isaka, abengekho ngakimi, ngineliciniso kutsi ngabe ungicoshile ngahamba mahhala ngite lutfo. Kodvwa Nkulunkulu ukubonile kuhlupheka kwami nemsebenti wetandla tami, wase uyakwekhuta kulobusuku bayitolo.”

₄₃Labani waphendvula Jakobe watsi: “Lamadvodzakati lawa ngami, nalabantfwana bami, nalemihlambi yami, nako konkhe loku lokubonako kwami. Kodvwa kute lengingabuye ngikwente ngalamadvodzakati nalabantfwabawo lababatele. ₄₄Lokuncono kota sente sivumelwane, wena nami, kube bufakazi emkhatsini wetfu sobabili.”

₄₅Ngako-ke Jakobe watsatsa litje walimisa kutsi libe sikhumbuto. ₄₆Jakobe wakhuluma kulamadvodza labehamba nawo watsi ababutse ematje. Nembala awabutsa enta ngawo sivivane, badla ndzawonye badlela eceleni kwaso. ₄₇Labani wasetsa watsi yiJega Sahadutha; kodvwa Jakobe wasetsa watsi yiGaledi. ₄₈Labani wakhuluma kuJakobe watsi: “Lamuhla lesivivane sibufakazi emkhatsini wakho nami.” Ngako-ke wasetsa watsi yiGaledi. ₄₉Lelinye libito laso watsi yiMispa, ngobe abetsi: “Shangatsi Simakadze angasigcina sobabili nome sesehlukene. ₅₀Nawuwaphatsa kabi lamadvodzakati ami nome sewutsatsa labanye bafati ngaphandle kwawo nome ungabonwa ngumuntfu, kodvwa ubokhumbula kutsi Nkulunkulu ungufakazi emkhatsini wetfu sobabili.” ₅₁Labani wachubeka wakhuluma kuJakobe, watsi: “Buka nasi sivivane nalelitje lelisikhumbuto lengikubeke embikwetfu sobabili. ₅₂Lesivivane asibe bufakazi, nalelitje kube ngulona bufakazi, bekutsi ngingeke ngendlule lesivivane nalelitje ngewelele ngakuwe, nawe futsi ungeke wendlule lesivivane nalelitje wewelele ngakimi kutakwenta bubi. ₅₃Nkulunkulu wa-Abrahama naNkulunkulu waNahori, utakwehlulela emkhatsini wetfu.” Ngako-ke Jakobe wafunga ngaNkulunkulu weyise Isaka, wagomela kutsi utasigcina lesetsembiso. ₅₄Jakobe wanikela ngemhlatjelo etikwentsaba, wase umema lamadvodza kutsi atewudla sinkhwa. Adla ahlala busuku bonkhe kuleyo ntsaba. ₅₅Labani wavuka ngakusasa ekuseni ngetingweti, wanga batukulu bakhe nemadvodzakati akhe, wababusisa, wancandzeka wabuyela ekhaya kakhe.