Hoseya 11

₁“Ngesikhatsi Israyeli asengumntfwana, ngamtsandza,

indvodzana yami ngayibita, ngayikhipha eGibhithe.

₂Kodvwa ngatsi ngisachubeka kubita Israyeli,

nabo bachubeka bakhwesha kimi.

Banikela imihlatjelo kuboBhali,

batfuncisela titfombe imphepho.

₃Ngimi lowacatfulisa Efrayimu,

ngamtsatsa ngambamba ngemikhono;

kodvwa akazange akunake kutsi ngimi lowamphilisa.

₄Ngabadvonsa ngetintsambo temusa webuntfu,

ngetibopho telutsandvo;

ngaphakamisa lijoko entsanyeni yabo,

ngagobondzelela kubo, ngabafunta.

₅“Bangeke yini babuyele eGibhithe,

yona i-Asiriya ingeke yini ibuse etikwabo,

njengobe naku bayala kuphendvuka?

₆Kuyawuba bumanyamanya betinkemba emadolobheni abo,

tiyawubhidlita imicabo yetinsimbi yemasango abo,

tiwacedze emacebo abo.

₇Bantfu bami batimisele kusuka kimi.

Ngisho nome sebangambita Longetulu Kwako Konkhe,

angeke abaphakamise ngisho nangayiphi indlela.

₈“Ngingakuyekelela kanjani, wena Efrayimu?

Ngingakulahla kanjani, wena Israyeli?

Ngingakuphatsa kanjani njenga-Adma?

Ngingakwenta kanjani ufanane naSeboyimu?

Inhlitiyo yami iguculiwe ngekhatsi kwami;

sonkhe sihawu sami sivuselelekile.

₉Ngingeke ngiyisebentise intfukutselo yami leyesabekako,

futsi ngingeke ngiphindze ngimbhubhise Efrayimu.

Ngobe mine nginguNkulunkulu, angisiye umuntfu,

nginguLongcwele losemkhatsini wenu.

Ngingeke ngifike ngelulaka.

₁₀Bayawulandzela Simakadze;

uyawubhodla njengelibhubesi.

Nakabhodla,

bantfwabakhe bayawuta batfutfumela,

bachamuka ngasenshonalanga.

₁₁Bayawuta batfutfumela

njengetinyoni tiphuma eGibhithe,

nanjengematuba aphuma e-Asiriya.

Ngiyawubahlalisa emakhaya abo,” kusho Simakadze.

₁₂Efrayimu ungitungelete ngemanga,

indlu yaka-Israyeli yangitungeleta ngenkhohliso.

Juda naye usichomoketi lesimelene naNkulunkulu,

yebo, umelene naLongcwele lowetsembekile.