Hoseya 4

₁Vanini livi laSimakadze, nine ma-Israyeli,

ngobe Simakadze usenelicala latanibeka lona,

nine lenihlala kulelive, utsi:

“Kute kwetsembeka, kute lutsandvo,

kute kuphakamisa Nkulunkulu eveni.

₂Lokukhona ticalekiso kuphela,

nekucala emanga, nekugwazana,

nekweba kanye nebuphingi;

bephula tonkhe tikhonkhwane teminyele letibekiwe;

kucitsa ingati kulandzela kucitfwa kwengati.

₃Ngenca yaloku live liyalila,

nabo bonkhe labahlala kulo bayahusheka;

tilwane tesiganga netinyoni tasemoyeni

kanye netinhlanti taselwandle kuyafa.”

₄“Kodvwa akubete umuntfu lobeka licala,

akubete muntfu lobeka lomunye licala,

ngobe mine ngibeka umphristi licala.

₅Nikhubateka emini nasebusuku,

nebaphrofethi bakhubateka kanye nani, nine baphristi.

Ngako ngitambhubhisa unyoko,

₆bantfu bami bayabhujiswa ngenca yekweswela lwati.

“Njengobe nikulahlile kwati mine,

nami-ke sengiyanilahla kutsi ningete naba baphristi bami;

njengobe niwutsalalisele umtsetfo waNkulunkulu wenu,

nami-ke ngiyawubatsalalisela bantfwabenu.

₇Ngekwandza kwebaphristi

kanjalo kwandza nekona kwabo kimi,

ngitakwenanisa ngebukhosi babo batselwe lihlazo.

₈Batondla ngetono tebantfu bami,

bajatjuliswe bubi babo.

₉Kuyawuba nje:

Bantfu bayawufanana nebaphristi.

Ngiyawubajezisa bobabili ngetindlela tabo,

ngibakhokhele ngaloko lokubi labakwentile.”

₁₀“Bayakudla tabelo tabo temihlatjelo,

kodvwa bangeke besutse;

bayawungenela bugwadla,

kodvwa bangandzi,

ngobe bamshiyile Simakadze,

₁₁batinikela ebugwadleni,

nasewayinini lelisha nalelidzala,

lokususa kucondza

₁₂kwebantfu bami.

Indlela bayibuta etithicweni tetigodvo,

baphendvulwe yindvuku yelugodvo.

Umoya webugwadla uyabedukisa;

abaketsembeki kuNkulunkulu wabo.

₁₃Banikela imihlatjelo eticongweni tetintsaba,

bashise iminikelo emagcumeni, ngaphansi kwema-okhi,

nangaphansi kwemabhabhabhulomu nematherebinte,

lapho kunemtfunti lomnandzi khona.

Ngako-ke emadvodzakati enu agucukela ebugwadleni,

nabomalukatane benu baphinga.

₁₄“Ngingeke ngiwajezise emadvodzakati enu

nase angenela bugwadla,

nabomalukatane benu ngingeke ngibajezise nase baphinga,

ngobe ngiwo lamadvodza,

ngisho labaphristi cobo lwabo,

labesukelana naletingwababane,

bente umhlatjelo netingwababane tasethempelini.

Sive lesingenakucondza siyawubhubha!

₁₅“Awu Israyeli,

nome sewuphinga kangaka nje,

ningamenti Juda abe nelicala naye.

“Ningayi eGilgali;

ningayi eBhethi Aveni.

Ningafungi futsi nitsi:

‘Kuphila kwaSimakadze!’

₁₆Ema-Israyeli anenkhani, anjengesitfokati lesinenkhani.

Pho, Simakadze angabelusa kanjani

njengemazinyane etimvu lasedlelweni?

₁₇Efrayimu utihlanganise netithico;

myekeleni khona lapho!

₁₈Nome ngabe tinatfo tabo setiphelile,

bayachubeka nebugwadla babo;

baholi babo batitsandza kakhulu tindlela tabo telihlazo.

₁₉Siwunguwungwana siyawubakhukhula

sibalahle khashane,

nemihlatjelo yabo iyawubatsela ngelihlazo.”