Hoseya 7

tono ta-Efrayimu tibekwa ebaleni,

nemacala eSamariya ayembulwa.

Benta emacebo,

emasela agcekeze tindlu,

tigebengu tibamba inkunzi etitaladini;

₂kodvwa ababoni

kutsi ngitikhumbula tonkhe tento tabo letimbi.

Tono tabo tiyabagabudzela,

tisembikwami ngaso sonkhe sikhatsi.”

₃“Bajabulisa inkhosi ngebubi babo,

bajabulise nebabusi ngemanga abo.

₄Bonkhe batiphingi,

bashisa njengelihhavu lona lelimlilo walo

lophekako akadzingi kuwukhwetela,

kusukela ekubhuceni inhlama ize ikhukhumuke.

₅Ngelilanga lemkhosi wenkhosi yetfu babusi badzakwa liwayini,

yona yaselulela baphukuti sandla.

₆“Tinhlitiyo tabo tinjengelihhavu,

babhekana nayo ngekuvumelana ngemacebo.

Intfukutselo yabo ibobotseka busuku bonkhe;

bese kutsi ekuseni ivutse njengemalangabi emlilo.

₇Bonkhe bashisa njengelihhavu,

bashwabudzela babusi babo.

Onkhe emakhosi abo ayawa,

kute namunye emkhatsini wabo locela lusito kimi.”

₈“Efrayimu utihlanganisa netive,

Efrayimu ulicebelengwane lelipatalele,

lelingakaguculwa.

₉Betive bamunya emandla akhe,

kodvwa yena akakuboni loko.

Timvu setiyacatsatela enhloko yakhe,

kodvwa yena akakunaki loko.

₁₀Kutigcabha kwa-Israyeli kubufakazi lobumelene naye,

kodvwa etikwako konkhe loko

akabuyeli kuSimakadze Nkulunkulu wakhe,

nome-ke amfune.

₁₁“Efrayimu ufanana nelituba,

usheshe ayengeke, akanangcondvo.

Bacela lusito eGibhithe,

baze babalekele e-Asiriya!

₁₂Batawutsi nababaleka,

ngijikijele linetha lami etikwabo.

Ngiyawubadvonsela phansi njengetinyoni tasemoyeni.

Nangibeva bancwabelana ndzawonye,

ngiyawubabamba.

₁₃Maye kubo! Ngobe besukile kimi!

Imbhubhiso kubo! Ngobe bangihlubukile bemelana nami!

Ngifisa kangaka kubahlenga,

kodvwa bakhuluma emanga ngami.

₁₄Abakhali kimi ngalokusuka etinhlitiyweni tabo,

kodvwa balila emibhedzeni yabo.

Babutsana ndzawonye

babutsanele emabele neliwayini lelisha,

kodvwa bangifulatsele mine.

₁₅Ngabacecesha, ngabacinisa,

kodvwa bangakhela luzungu lwebubi.

₁₆Abagucukeli kuLongetulu Kwako Konkhe;

bafanana nebutjoki lobungakacini.

Baholi babo bayawubulawa ngenkemba

ngenca yemagama abo langenanhlonipho.

Ngenca yaloko bayawuba luhleko nelihlazo

eveni laseGibhithe.”