Isaya 13

₂“Phakamisani siboniso semphi,

nisiphakamisele esicongweni sentsaba.

Memetani kakhulu, nibakhwebe,

khona batewuncandzeka babuye,

bangene emasangweni alabaphakeme.

₃Labangcwele bami ngibatfumile,

ngiwabitile emachawe ami lanemandla

kutsi ayewufeza sigwebo sentfukutselo yami,

wona lawo lajabulela kungincobela.

₄“Lalelani, umsindvo etintsabeni,

ufanana nalowentiwa sicumbi sebantfu!

Lalelani, sidvumo emkhatsini wemibuso!

Unjengetiphitsiphitsi tetive!

Simakadze longuSomandla uvivisa emabutfo

kutsi aphume ayekulwa imphi.

₅Baphuma emaveni lakhashane,

lasekugcineni kwemazulu,

nguye Simakadze netikhali telulaka lwakhe,

utewubhubhisa wonkhe umhlaba.

₆“Lilani, ngobe lilanga laSimakadze selisondzele,

litawufika liyimbhubhiso levela kuSomandla.

₇Ngenca yaloko, tonkhe tandla tiyawujikita,

inhlitiyo yabo bonkhe bantfu iphelelwe ngemandla,

₈kutfutfumela kubabambe,

tinhlungu nekucacamba kubantfonye,

bajilajileke njengemfati aphetfwe ngumhelo.

Bayawubukana ngekumangala,

buso babo buvutse emalangabi.

₉Bukani, lilanga laSimakadze liyasondzela,

lilanga lelinelulaka, nentfukutselo,

nelulaka lolwesabekako;

litekwenta live libe lihlane,

libuye libhubhise netoni letikulo.

₁₀Umtsentse welizulu kanye nato tonkhe

tinkhanyeti ngemabutfo ato

kungeke kukuvete kukhanya kwako.

Lilanga leliphumako litakwentiwa libe mnyama,

ngisho nenyanga iyakwehluleka kukhanyisa.

₁₁“Umhlaba ngiyakuwujezisa ngenca yebubi bawo,

ngijezise nalababi ngenca yetono tabo.

Ngiyakulicedza ligcabho lalabo labatigcabhako,

ngikutfobise kutigcabha kwalabo labanelunya.

₁₂Umuntfu ngiyakumenta asweleke kakhulu

kunegolide lecengekile,

ngimente abe yindlala kunegolide yase-Ofiri,

lengatfolakali kalula.

₁₃Ngako-ke emazulu ngiyakuwenta atfutfumele,

nemhlaba utanyatanyiswe usuke endzaweni yawo,

ngenca yelulaka lwaSimakadze longuSomandla,

ngalelo langa lentfukutselo yakhe levutsako.

₁₄“Njengenyamatane letingelwako,

nanjengetimvu letingenamelusi,

ngulowo nalowo uyawubalekela esiveni sakubo,

ngulowo nalowo abalekele eveni lakubo.

₁₅Lowo loyawutfunjwa uyawugwazwa;

bonkhe labayawubanjwa bayawudliwa yinkemba.

₁₆Tinswane tabo tiyawuphahlatwa tibe ticucu

embikwabo babuka,

tindlu tabo tiyawuphangwa,

nebafati babo badlwengulwe.

₁₇“Bukani la, ngiyawuvusa emaMede kutsi abahlasele,

bantfu labangatsengeki ngesiliva

nalabangeke balingwe ngegolide.

₁₈Ngebutjoki babo lobugobile bayawudubula emajaha,

abanamusa ngetinswane,

futsi bate nesihawu ngebantfwana.

₁₉IBhabhulona ligugu lemibuso,

ibuhle beligcabho lemaBhabhulona,

Nkulunkulu uyakuyiketula

iwe njengeSodoma neGomora.

₂₀Kungeke kuphindze kuhlale muntfu kuyo,

kute loyawuphindze ahlale kuyo

titukulwane ngetitukulwane;

kute um-Arabu loyawumisa lithende lakhe lapho,

kute nemelusi loyawuphumulisa

imihlambi yakhe kuyo.

₂₁Kodvwa tilwane tasehlane tiyawulala khona,

timphungutja tiyawugcwala etindlini takhona,

tikhova tiyawuhlala khona,

netimbuti tesiganga tiyawutjakadvula khona.

₂₂Timphisi tiyawushaya umkhulungwane

kuleto tinqaba tayo,

kanjalo netimphungutja etigodlweni tayo.

Sikhatsi sayo sesisondzele,

nemalanga ayo angeke andziswe.”