Isaya 16

₁Tfumelani emazinyane etimvu

lesuka eSela, ngasehlane,

aye entsabeni yeNdvodzakati yaseSiyoni,

abe setfulo enkhosini yelive.

₂Njengetinyoni letizulazulako

nangabe tikhishwa etidlekeni,

bayawuba njalo-ke nebafati bakaMowabi

ematubukweni ase-Anoni.

₃Batsi kubakaJuda:

“Sinikeni seluleko,

nisentele sincumo.

Nisisibekele ngesitfunti senu

sibe njengebusuku emini, kala bha.

Fihlani labo lababalekile,

ningatsengisi ngalababalekele kini.

₄Hlalani nabo lababaleke kulakaMowabi,

nibe sivikelo sabo kumbulali.”

Umcindzeteli utawuphela,

bese iyema imbhubhiso;

umuntfu welutfutfuva utawunyamalala eveni;

₅bese sihlalo sebukhosi sima ngelutsandvo;

nangekwetsembeka kuyawuhlala umuntfu kuso,

umuntfu loyawuvela endlini yakaDavide,

umehluleli loyakwehlulela ngekungakhetsi,

ayisheshisise indlela yekulunga.

₆Sivile ngekutiphakamisa kwebakaMowabi,

nangekuchosha kwabo lokukhulu nekutigcabha kwabo,

nangekutigabatisa kwabo, nekucolosha kwabo;

noko kutishaya sifuba kwabo kulite.

₇Ngako-ke emaMowabi ayawutikhalela;

ayawulila ndzawonye ngelakaMowabi.

Lilani nidzabuke ngenca yemakhekhe emagelebisi lomisiwe

langasatfolakali eKhiri Heresi.

₈Emasimi aseHeshboni ayabuna,

nemivini yaseSibima iyoma.

Babusi betive babehlulwa

liwayini lemivini yelikhetselo.

Yebo, imivini leyake yenabela naseJaseri,

yadzimate yefika nasehlane,

yenaba yaze yayawufika naselwandle.

₉Ngako ngiyakhala,

njengobe kukhala iJaseri,

ngikhalela imivini yaseSibima.

Awu! Heshboni, nawe Eleyale,

nginenye etinyembetini!

Kumemeta kwenjabulo ngetitselo tenu

lesetivutsiwe kuthulisiwe,

kwabindziswa nenjabulo ngetivuno tenu.

₁₀Injabulo nekutsakasa kususiwe

emahlatsini etitselo lahlanyelwe;

kute namunye losahlabela amemete etivinini,

sekute losahluta liwayini ematjeni ekulihluta,

ngobe ngikucedzile kumemeta.

₁₁Inhlitiyo yami ililela iMowabi,

ikhala njengelihabhu,

lingekhatsi lami lilila ngeKhiri Heresi.

₁₂Ngesikhatsi bakaMowabi babonakala

endzaweni yabo lephakeme

bavele batigugise bona nje;

ngesikhatsi bayewukhuleka

kuletithico tabo,

abasasitakali ngalutfo.