Isaya 3

₁Buka-ke nyalo,

iNkhosi Simakadze lenguSomandla

seyitawususa eJerusalema nakaJuda

lokungenako nako konkhe lokubasekelako:

konkhe kudla lokungenako

nawo onkhe emanti langenako,

₂lichawe nelisotja,

umehluleli nemphrofethi,

sangoma nemholi,

₃indvuna yema-50 nendvodza lenesikhundla,

umeluleki nengcweti lenelikhono,

kanye nemtsakatsi lohlakaniphile.

₄Ngiyakwenta bafana babe tindvuna tabo;

bayawuphatfwa bantfwana nje.

₅Bantfu bayawucindzetelana,

umuntfu acindzetele lomunye,

makhelwane acindzetele makhelwane.

Labasha bayawuvukela labadzala,

bantfu phaca bavukele lababaphetse.

₆Lomunye uyawubamba umnakabo

emtini weyise, atsi:

“Wena unelijazi,

bani ngumholi wetfu;

busa etikwanansi imfuhlululu!”

₇Kodvwa ngalelo langa uyawukhala atsi:

“Ngeke ngibe ngumphilisi!

Ngite kudla nekwekwembatsa endlini yami;

ungangenti umholi wesive.”

₈IJerusalema iyayendza, Juda uyawa;

emavi abo kanye netento tabo

kuphambene naSimakadze,

bedzelela nebukhosi bakhe.

₉Kukhetsa kwabo buso ekwehluleleni

kubufakazi lobumelene nabo;

bashengetisa ngesono sabo njengeSodoma,

abasifihli nakancane.

Maye kubo!

Batiletsele inhlekelele etikwabo.

₁₀Tjelani labalungile kutsi kutabahambela kahle,

ngobe bayawudla titselo tetento tabo.

₁₁Maye kulababi!

Inhlekelele isetikwabo!

Kuyawuphindziselwa kubo

njengekwenta kwetandla tabo.

₁₂Awu, sive sami,

nicindzetelwa bantfwana,

bafati babusa etikwenu.

Awu, sive sami,

labo baholi benu bayanedukisa;

banikhipha endleleni,

lenifanele nihambe ngayo.

₁₃Simakadze utilungiselele kutsetsa emacala;

uyasukuma atekwehlulela sive.

₁₄Simakadze ungena ekwehluleleni,

wehlulela labadzala nebaholi besive sakhe, utsi:

“Ngini lenicedze sivini sami,

imphango leniyitsetse kulabamphofu

igcwele etindlini tenu.

₁₅Nisho kutsini ngalokupitjita sive sami,

nigaye buso balabamphofu?”

kusho iNkhosi, Simakadze longuSomandla.

“Bafati baseSiyoni bayatigcabha;

bahamba belule tintsamo,

bacwashacwashata ngemehlo abo,

nabahambako, bashayela etulu,

emacakaleni abo kukhehleta

imihlobiso labayigabile.

₁₇Ngako-ke Simakadze utawuveta tilondza

etinhloko tebafati baseSiyoni;

Simakadze utawucotfula tinhloko tabo,

tibe timphandla.”

₂₄Esikhundleni sekunuka kwemakha,

kutawunuka luboti;

esikhundleni semijijimba kube tintsambo,

esikhundleni setinwele letentiwe kahle

kutawuba nemphandla;

esikhundleni setembatfo letinhle

kutawuba ngemasaka;

esikhundleni sebuhle kutawuba nesishadza.

₂₅Emadvodza akho ayawubulawa ngenkemba,

tihlabani takho tifele emphini.

₂₆Emasango aseSiyoni ayawukhala alile,

lidolobha selisiganga,

yebo, bantfu balo batawuhlala phantsi emhlabatsini.