Isaya 33

₁Maye kuwe, wena mbhubhisi, wena losengakabhujiswa!

Maye kuwe, wena lolimbuka, wena losengakatsengiswa!

Nawuyekela kubhubhisa, uyakubhujiswa nawe.

Nawuyekela kutsengisa bantfu, uyakutsengiswa nawe.

₂Awu Simakadze, bani nemusa kitsi;

tsine silangatelela wena.

Bani ngemandla etfu njalo nje ekuseni,

nensindziso yetfu ngesikhatsi selusizi.

₃Ngekubhavumula kweliphimbo lakho,

tive tiyabaleka;

nawuphakama wena,

tive tiyasakateka.

₄Imphango yenu, nine tive, iyavunwa,

kube shangatsi kucatsama inkhasa yesikhonyane;

emadvodza ayayibunganyela,

yebo, njengelibulo lesikhonyane.

₅Simakadze uphakeme,

ngobe uhlala endzaweni lephakeme,

utawugcwalisa iSiyoni ngekwehlulela

ngemtsetfocotfo nangekulunga.

₆Utawuba sisekelo sakho lesingusonasona

ngawo onkhe emalanga akho,

abe lifa lakho lensindziso,

nelekuhlakanipha, nelwati.

Kwesaba Simakadze kungumcebo wakhe.

₇Buka la, emadvodza akubo lanesibindzi

akhala kakhulu ngephandle;

emancusa ekuthula akhala kabuhlungu.

₈Imigwaco lemikhulu idvutjiwe,

kute tihambi letikuleyo migwaco.

Sivumelwane sephuliwe,

bofakazi baso bayedzelelwa,

kute namunye lohlonishwako.

₉Live liyalila ligedvuke,

iLebanoni ihlazekile, iyabuna;

iSharoni ifanana nelihlane i-Arabha,

iBhashani neKhameli kuhhohlota emacembe ayo.

“Nyalo sengitawusukuma,

nyalo sengitawuphakanyiswa,

nyalo sengitakwenyuselwa etulu.

₁₁Nemitsa emakhoba, nitale tibi;

kuphefumula kwenu kungumlilo lonicotfulako.

₁₂Tive tiyakushiswa kube shangatsi ngumcakaco;

njengetihlahla temanyeva letigawuliwe,

tiyawulunyekwa ngemlilo.”

₁₃Nine lenikhashane,

lalelani loku lengikwentile;

nine lenisedvute,

vumani emandla ami!

₁₄Toni taseSiyoni tiyatfutfumela,

kutfutfumela kubabambile labangamesabi Nkulunkulu:

“Ngubani emkhatsini wetfu

longahlala nemlilo locotfulako?

Ngubani emkhatsini wetfu

longahlala nekuvutsa kwaphakadze?”

₁₅Ngulowo lohamba ngekulunga, akhulume lokungiko,

lowo lowala inzuzo yekucindzetela,

logodla sandla sakhe singayemukeli imidizo,

avale tindlebe takhe kulababopha luzungu,

avale emehlo akhe ekubukeni lokubi.

₁₆Ngulowo-ke umuntfu lotawuhlala ekuphakameni,

losiphephelo sakhe kutawuba yinqaba yemadvwala.

Uyakunikwa sinkhwa sakhe,

angawesweli emanti ekunatsa.

₁₇Emehlo akho ayakuyibona inkhosi ebuhleni bayo,

abuke nelive lelingematsafa lamahle.

₁₈Emicabangweni yakho

uyakuzindla ngekwesatjiswa kwakucala:

“Iphi lendvuna lenkhulu?

Uphi lona abetsatsa imitselo?

Iphi yona lendvuna lebeyibala imibhoshongo?”

₁₉Ungeke uphindze usibone lesive lesinebudlova,

labo bantfu belulwimi lolungatiwa kahle,

labalulwimi lwabo lungatiwa futsi lungevakali.

₂₀Buka iSiyoni, lidolobha lemadzili etfu;

emehlo akho ayakuyibona iJerusalema,

indzawo yekuhlala lenekuthula,

nelithende lelingeke lisuswe;

tikhonkhwane talo tingeke tisishulwe,

kungeke kudzabuke ngisho nayinye yetindophi talo.

₂₁Lapho-ke Simakadze uyawuba nguLonemandla wetfu.

Kuyawufanana nendzawo lenemifula lebanti nemifudlana.

Kute sikebhe lesinetigwedlo lesiyawuhamba kuyo,

kute ngisho nemkhumbi lonemandla lotawuntjweza kuyo.

₂₂Ngobe Simakadze ngumehluleli wetfu;

Simakadze nguyena sishayamtsetfo setfu,

Simakadze yinkhosi yetfu,

nguye lotasisindzisa.

₂₃Tindophi takho tekubopha liseyili setiyaceka:

Insika yemkhumbi ayikaboshwa yacina,

liseyili alikendlaleki.

Imphango lenyenti itakwehlukaniswa,

ngisho nalochutako uyakuyitfola imphango.

₂₄Kute lohlala eSiyoni loyakutsi: “Ngiyagula,”

netono talabo labahlala khona tiyawutsetselelwa.