Isaya 48

₁“Lalelani lapha, ninendlu yakaJakobe,

nine lenibitwa ngelibito la-Israyeli,

futsi niyintalelwane yakaJuda,

nine lenenta tifungo egameni laSimakadze,

nikhonte Nkulunkulu wema-Israyeli,

kodvwa kungabi ngeliciniso nangekulunga,

₂nine lenitibita ngekutsi nitakhamiti

tasedolobheni lelingcwele,

netsembele kuNkulunkulu wema-Israyeli,

Simakadze longuSomandla libito lakhe,

lalelani naku:

₃Ngakhuluma ngetintfo takucala tingakefiki,

ngakhuluma ngato kadzeni,

umlomo wami watimemetela, ngatenta tatiwa;

ngase ngiyatenta masinyane,

tavele tenteka.

₄Ngobe nganginati kutsi ninenkhani kangakanani.

Imisipha yetintsamo tenu kutinsimbi,

nemabunti enu kungewelitfusi.

₅Nginitjele tonkhe-ke letintfo kadzenidzeni,

kucala tingakenteki ngatimemetela kini,

kuze ningetikusho kutsi:

‘Tithico tami takwenta loku;

titfombe tami tetigodvo

nabonkulunkulu lababunjwe ngensimbi bakulayeta.’

₆Nitivile tonkhe-ke letintfo,

tibukeni tonkhe.

Ningete nativuma yini?

“Kusukela nyalo sengitabonitjela tintfo letinsha,

tintfo letifihlakele kini, leningatati,

₇tintfo letidalwe nyalo, hhayi kadzeni,

anizange senive ngato phambilini.

Ngako-ke ningeke nisho kutsi:

‘Yebo, mine ngangivele ngati ngato.’

₈Anikeva, futsi anikacondzi,

kusukela endvulo tindlebe tenu

tatisolomane tivalekile.

Empeleni bengati kahle hle kutsi naniyengana kanjani,

nanibitwa ngekutsi nibahlubuki kusukela ekutalweni.

₉Ngenca yeLibito lami ngiyalwephutisa lulaka lwami,

ngenca yeludvumo lwami ngiyalubamba,

ngingalwehliseli kini,

kuze ngingetikunicedza.

₁₀Bukani la, nginicolisisile,

noko hhayi njengesiliva;

nginivivinyile ngemlilo wetinhlupheko.

₁₁Ngenca yami, nangekwami ngiyakwenta loku.

Ngingeke ngivume kutsi Libito lami lihlazeke.

Ngingeke nginike lomunye inkhatimulo yami.”

₁₂“Lalela kimi, wena Jakobe,

wena Israyeli lengakubita: Nginguye.

Ngiwekucala, futsi ngiwekugcina.

₁₃Tandla tami tatibeka tisekelo temhlaba.

Sandla sami sangesekudla sawendlala emazulu;

nangikubita, kuyavela konkhe kanyekanye.

₁₄“Butsanani nonkhe, nitewulalela:

Ngusiphi saletithico

lesake satisho letintfo tingakenteki?

Sihlobo lesikhetsiwe saSimakadze

siyakuyifeza injongo yakhe simelane neBhabhulona.

Ingalo yaso iyawumelana nebaseBhabhulona.

₁₅Mine, yebo mine ngekwami, sengishito,

yebo sengimbitile, ngitamletsa,

futsi utawuphumelela kulomsebenti wakhe.

₁₆“Sondzelani edvutane nami, nilalele naku:

“Kusukela esimemetelweni sekucala

angizange ngikhulume emasitseleni,

ngalesikhatsi nakwenteka,

mine ngisuke sengikhona.”

Manje-ke, iNkhosi Simakadze

ingitfumile kanye naMoya wayo.

₁₇Naku lokushiwo nguSimakadze,

uMhlengi wenu, Longcwele waka-Israyeli, utsi:

“NginguSimakadze Nkulunkulu wenu,

longuyena anifundzisa kutsi ngukuphi

lokuncono kunako konkhe kini,

lonilayela indlela lekufanele nihambe ngayo.

₁₈Kube mane naniyilalela imiyalo yami,

kuthula nenhlalakahle yenu ngabe kunjengemifula,

kulunga kwenu kube njengemagagasi elwandle.

₁₉Titukulwane tenu ngabe tingangetihlabatsi.

Bantfwabenu ngabe bangangetinhlavu letingenakubalwa,

emabito abo abengayiwuncanyulwa lutfo,

abengayiwubhujiswa embikwami.”

₂₀Sukani lapha eBhabhulona.

Wabalekeleni emaBhabhulona.

Kumemeteleni loku ngenjabulo lenkhulu, nikubabate,

kutfumeleni emikhawulweni yemhlaba, nitsi:

“Simakadze umhlengile Jakobe, inceku yakhe.”

₂₁Abazange sebome ngesikhatsi abahola ehlane;

wabavulela emanti agobhota edvwaleni,

wacheketa lidvwala, kwampompota emanti.

₂₂Simakadze utsi: “Kute kuthula kulababi.”