Isaya 60

₁“Vuka, Jerusalema, ukhanye njengelilanga,

ngobe kukhanya kwakho kufikile.

Inkhatimulo yaSimakadze iphumela etikwakho.

₂Buka la, bumnyama buyawusibekela umhlaba,

nebumnyama lobumatima busetikwetive,

kodvwa Simakadze uyaphuma etikwakho,

nenkhatimulo yakhe ibonakala etikwakho.

₃Tive tiyawusondzela ekukhanyeni kwakho

nemakhosi ete ebukhatikhatini bekusa kwakho.

₄“Phakamisa emehlo akho,

ucalate ubone:

Bahlangane bonkhe bete kuwe,

emadvodzana akho aphuma khashane,

emadvodzakati akho wona etfwelwe ngemkhono.

₅Utawube sewuyabuka umoyitele,

inhlitiyo yakho iyawugcumagcuma,

inetsetele ngenca yekujabula.

Imicebo leselwandle iyawuletfwa kuwe,

bunjinga betive buyawuta kuwe.

₆Imihlambi yemakamela iyawugcwala eveni lakho,

emakamela lamancane akaMidiyani newase-Efa.

Bonkhe baseSheba bayawuta,

betfwele igolide nemphepho,

bamemetela ludvumo lwaSimakadze.

₇Yonkhe imihlambi yaseKhedari iyawubutsanela kuwe,

tihhanca takaNebayothi tiyawukukhonta,

tibe ngiminikelo leyemukeleka elatini lami,

ngiyawulihlobisa lithempeli leludvumo lwami.

₈“Bobani laba labandiza etulu njengemafu,

nanjengematuba aya etidlekeni tawo?

₉Nayi imikhumbi yetichingi icondza kimi,

kuhamba embili imikhumbi yaseThashishi,

iletse emadvodzana akho laphuma khashane

labuya nesiliva negolide yawo,

atewudvumisa Simakadze Nkulunkulu wakho,

longuLongcwele waka-Israyeli,

ngobe ukwetfwese inkhatimulo.

₁₀“Betive bayawutivusa tibondza takho,

emakhosi abo ayawuhlehla kuwe.

Noko ngakushaya ngenca yekutfukutsela,

ngebubele bami ngiyawukuhawukela.

₁₁Emasango akho ayawuhlala avulekile,

ngeke aze avalwe, busuku nemini,

kuze emadvodza aniletsele lemicebo yetive,

emakhosi ato achutjwe atiboshwa.

₁₂Ngobe sive nome umbuso longayiwuhlehla kuwe,

uyakufa wona, uyawubhubha uphele.

₁₃“Tihlahla telikhetselo taseLebanoni tiyakuta kuwe,

sipheshula, nemferi, nemsayipuresi konkhe kanyekanye,

kutewuhlobisa indzawo yami lengcwele.

Ngiyakuyikhatimulisa indzawo yetinyawo tami.

₁₄Emadvodzana ebacindzeteli bakho

ayawuta kuwe akhotsama,

bonkhe laba labakwedzelelako

bayawukhotsama etinyaweni takho,

bayawukubita batsi uLidolobha laSimakadze,

Siyoni waLongcwele waka-Israyeli.

₁₅“Noko uke walahlwa, watondvwa,

kungekho muntfu lowendlula kuwe,

ngiyawukwenta ligcabho laphakadze,

nenjabulo yato tonkhe titukulwane.

₁₆Uyawunatsa lubisi lwetive,

umunyiswe emabeleni ebukhosi.

Uyawube sewuyati-ke kutsi mine,

Simakadze, nginguMsindzisi wakho,

nekutsi Somandla wakaJakobe unguMhlengi wakho.

₁₇Ngiyawukuletsela igolide esikhundleni selitfusi,

nesiliva esikhundleni sensimbi.

Esikhundleni selukhuni ngiyawukuletsela litfusi,

nensimbi esikhundleni sematje.

Kuthula ngiyawukwenta kube ngumbusi wakho,

kulunga ngikwente kube ngumholi wakho.

₁₈Akuseyiwuba nekulwa eveni lakho,

kuyawubate incitsakalo nembhubhiso

emikhawulweni yelive lakho.

Kodvwa uyawubita tibondza takho

ngekutsi yiNsindziso,

nemasango akho ngekutsi Ludvumo.

₁₉Lilanga aliseyikuba kukhanya kwakho emini,

ngisho nekukhanya kwenyeti

kungeke kusakukhanyisela wena,

ngobe Simakadze uyawuba

kukhanya kwakho kwaphakadze,

Nkulunkulu wakho abe ludvumo lwakho.

₂₀Lilanga lakho alisayiwuphindza lishone,

nenyanga yakho ayisayiwuphindza ifiphale.

Simakadze uyawuba kukhanya kwaphakadze kuwe,

emalanga akho ekudzabuka ayawuphela.

₂₁Lapho-ke bonkhe bantfu bakho bayawuba ngulabalungile,

bayawuba banikati belive kokuphela.

Bangimiliba lengiyihlanyele,

umsebenti wetandla tami,

wekubonakalisa inkhatimulo yami.

₂₂Lomncane wenu uyawuba yinkhulungwane,

lophansi kakhulu abe sive lesinemandla.

NginguSimakadze, ngesikhatsi sako

ngiyawukwenta loko ngekushesha lokukhulu.”