Isaya 63

₁Ngubani lona lochamuka ka-Edomu,

lobuya eBhosra,

lonetingubo letibhocwe ngalokubovu njengengati?

Ngubani yena lona,

lowembetse umjiva webukhosi lokhatimulako,

lohamba acanase ngebukhulu bemandla akhe?

“Ngimi, lengikhuluma ngekulunga,

lonemandla ekusindzisa.”

₂Tentiwa yini tingubo takho kutsi tibe bovu

njengetemuntfu lobekahluta emagelebisi?

₃“Nginyatsele sikhamo seliwayini ngingedvwa;

kuto tonkhe tive kute namunye labekanye nami.

Ngibagcobagcobile ngentfukutselo yami,

ngabapitjita ngelulaka lwami.

Ingati yabo yasaphatela tembatfo tami;

ngatingcolisa tonkhe timphahla tami.

₄Ngobe lilanga lekuphindzisela

belisenhlitiyweni yami;

nemnyaka wekuhlenga labangebami sewufikile.

₅Ngabuka, kodvwa kwabate namunye labengasita.

Ngamangala kakhulu kutsi kubete lowelekelelako,

ngako umkhono wami wangentela insindziso yami,

nelulaka lwami lwangisekela.

₆Ngagcobagcoba tive ngentfukutselo yami;

ngelulaka lwami ngatenta tadzakwa,

ngatfululela ingati yato emhlabatsini.”

₇Ngiyawukhuluma ngebukhulu bemusa waSimakadze,

ngibonge tento takhe lekufanele advunyiselwe tona,

ngidvumise konkhe loko Simakadze lasentele kona,

yebo, tintfo letinyenti letinhle latentele

indlu yaka-Israyeli,

ngesihawu sakhe nangemusa wakhe lomkhulukati.

₈Watsi: “Ngempela, basive sami,

emadvodzana langeke angiyenge;”

ngaloko-ke waba nguMsindzisi wabo.

₉Kuko konkhe kukhatsateka kwabo naye abekhatsatekile,

ingilosi yebukhona bakhe yabasindzisa,

ngelutsandvo lwakhe nangemusa wakhe wabahlenga.

Wabatsatsa wabetfwala

kuwo onkhe emalanga akadzeni.

₁₀Noko, bamhlubuka,

badzabukisa Moya wakhe Longcwele.

Ngako-ke wagucuka waba sitsa sabo,

yena cobo lwakhe walwa nabo.

₁₁Sive sakhe sase siyawakhumbula emalanga akadzeni,

emalanga aboMosi kanye nesive sakhe, batsi:

“Uphi lowa lowabeweta lwandle lolubovu

bona kanye nebelusi bemhlambi wetimvu takhe?

Uphi lowa lowafaka Moya wakhe

Longcwele emkhatsini wabo,

₁₂lowatfumela umkhono wakhe lonemandla lamangalisako,

kutsi ube ngasesandleni saMose sekudla,

lowehlukanisa emanti embikwabo,

aze atakhele yena Libito lelineludvumo lwaphakadze?

₁₃“Uphi lowa lowabahola badzabula ekujuleni kwelwandle?”

Njengelihhashi eveni lelibekile, abazange sebakhubatele.

₁₄Njengetinkhomo letehlela ematsafeni,

banikwa kuphumula ngaMoya waSimakadze.

Wasihola kanjalo-ke sive sakho,

watakhela wena Libito lelinebukhosi.

₁₅Buka phansi usezulwini lakho, ubone,

usesihlalweni sakho sebukhosi lesingcwele.

Kuphi kushisekela kwakho nemandla akho?

Kunakekela kwakho nesihawu sakho

kugodliwe kitsi.

₁₆Kodvwa wena unguBabe wetfu,

nome nje Abrahama angasati tsine,

na-Israyeli angasemukeli tsine,

kodwva wena, Simakadze,

unguBabe wetfu, uMhlengi wetfu;

kwasemandvulo lelo Libito lakho.

₁₇Awu Simakadze, usivumelelani

kutsi seduke etindleleni takho,

utenteleni kutsi tibe lukhuni tinhlitiyo tetfu,

kuze singetikuhlonipha wena?

Mane ubuye ngenca yetinceku takho,

tive letilifa lakho.

₁₈Kwaba sikhashana nje sive sakho

saba tindlalifa tendzawo yakho lengcwele,

kodvwa nyalo titsa tetfu

setiyinyatsele phansi

indlu yakho lengcwele.

₁₉Tsine sibakho kusukela kadzenidzeni;

kodvwa shangatsi wena awukabusi etikwetfu,

asikaze sabitwa ngeLibito lakho.