Gideyoni uhlasela emaMidiyani
1Ngakusasa ekuseni ngeluvivi, Jerubhali, labenguGideyoni, nawo onkhe emadvodza labehamba nawo bemisa emtfonjeni waseHarodi. Inkambu yabakaMidiyani yayingasenyakatfo esigodzini lesasisedvute neNtsaba iMore. 2Simakadze wakhuluma kuGideyoni, watsi: “Lamadvodza lohamba nawo manyenti kakhulu kutsi nginganikela emaMidiyani etandleni tawo, funa baka-Israyeli batishaye tifuba batsi: ‘Sitisindzise ngemandla etfu.’ 3Ngako memetela kulamadvodza utsi: ‘Nakukhona lowesabako nalongenwa ngemanti emadvolweni, akasuke lapha eNtsabeni iGileyadi, ancandzeke, abuyele ekhaya.’ ” Ngako kwancandzeka emadvodza lati-22 000, kwasala lati-10 000.
4Kodvwa Simakadze wakhuluma kuGideyoni, watsi: “Asemanyenti lamadvodza. Watsatse wehlele nawo emfuleni, ngitakuhlungela wona khona lapho. Nangitsi: ‘Lona utawuhamba nawe,’ kufanele ahambe, kodvwa nangitsi: ‘Lona angeke ahambe nawe,’ kufanele angahambi.”
5Ngako Gideyoni watsatsa lamadvodza wehlela emfuleni. Nasefike lapho, Simakadze wakhuluma kuye, watsi: “Yehlukanisa labo labanatsa ngekucapha lamanti njengenja, kulabo labaguca phansi nabanatsako.” 6Emadvodza lanatsa emanti ngekuwakhaphatela nangekuwacapha aba ngema-300. Onkhe lawa lamanye emadvodza aguca phansi ngemadvolo anatsa.
7Simakadze wakhuluma kuGideyoni, watsi: “Ngalamadvodza langema-300 lanatse ngekucapha ngitanisindzisa, nginikele emaMidiyani etandleni takho. Hambisa onkhe lawa lamanye emadvodza, ngulowo nalowo abuyele kubo.” 8Ngako Gideyoni onkhe lamadvodza wawabuyisela emathendeni awo, kodvwa wasala nalawa langema-300, latsatsa imiphako nemacilongo alawa lamanye.
Inkambu yemaMidiyani yayingentasi kwakhe, esigodzini. 9Kubo lobo busuku Simakadze wakhuluma kuGideyoni, watsi: “Vuka, wehlele enkambu, ngobe ngitayinikela esandleni sakho. 10Nawesabako kuhlasela, yehlela enkambu nenceku yakho, Phura, 11ulalele kutsi batsini. Emvakwaloko utawuba nesibindzi sekuyihlasela lenkambu.” Ngako yena naPhura, inceku yakhe, behlela kulabo lababegadze inkambu. 12EmaMidiyani, nema-Amaleki, nato tonkhe tive tangasemphumalanga tatimise esigodzini, titse gwacalala njengemabulo esikhonyane. Emakamela ato abengeke asabaleka, abesafanana nesihlabatsi selusentse lwaselwandle.
13Gideyoni wefika ngesikhatsi lenye indvodza isalandzisa umnganayo liphupho itsi: “Ngibhudze sinkhwa sebhali lesiyindingilizi sita sigicikela enkambu yemaMidiyani. Sifike sashaya lithende ngemandla laze lasiphuka, lafohloka.”
14Lomnganakhe waphendvula watsi: “Phela loko kungeke kusho lutfo ngaphandle kwenkemba yaGideyoni, umsa waJowashi, waka-Israyeli. Nkulunkulu unikele emaMidiyani nenkambu yonkhe esandleni sakhe.”
15Watsi kube Gideyoni eve leliphupho kanye nenchazelo, wakhotsama Nkulunkulu, wamkhonta. Wancandzeka wabuyela enkambu yaka-Israyeli, wafike wamemeta watsi: “Vukani! Simakadze unikele inkambu yemaMidiyani esandleni senu!” 16Wahlela lamadvodza langema-300, wawenta emabutfo lamatsatfu. Onkhe lamadvodza wawanika emacilongo nemajeke labengenalutfo, kanye netidlwane lebetisekhatsi emajekeni, watsi ngulowo nalowo akakubambe ngetandla.
17Wabayala watsi: “Nibobuka mine, ningilingise. Nitawutsi nangifika emnyeleni wenkambu, nente njengobe nami ngenta. 18Nangabe mine nalaba labangalapha ngakimi sishaya emacilongo etfu, nani nonkhe, kutungeleta yonkhe inkambu, niboshaya emacilongo enu nimemete nitsi: ‘YaSimakadze neyaGideyoni.’ ”
19Gideyoni nalamadvodza lalikhulu labehamba naye befika emnyeleni wenkambu ekhatsi nebusuku nabasandza kuntjintja laba lababegadze inkambu. BoGideyoni bashaya emacilongo abo, bafohlota lamajeke labebawaphetse ngetandla. 20Onkhe-ke lamabutfo lamatsatfu ashaya emacilongo awo afohlota nalamajeke awo, abambe letidlwane ngesancele, ngesekudla aphetse lamacilongo labewashaya, amemeta atsi: “Inkemba yaSimakadze naGideyoni!” 21Kwatsi bonkhe bantfu baseme etindzaweni tabo batungelete lenkambu, onkhe emaMidiyani abaleka, akhalela etulu.
22Atsi kube lamacilongo langema-300 akhale, Simakadze wasanganisa onkhe lawo madvodza labekuleyo nkambu yemaMidiyani, agucukelana odvwana, agwazana. Imphi yonkhe yesuka yabaleka yacondza eBhethi Shitha kuya eSerera, kuze kuyewufika emnyeleni we-Abela Mehola, eceleni kweThabhathi. 23Ema-Israyeli akaNaftali, newaka-Asheri, nawo onkhe akaManase amenyetwa, acosha emaMidiyani. 24Gideyoni wakhipha tigijimi kulo lonkhe live letintsaba laka-Efrayimu, watsi: “Yehlani nihlasele emaMidiyani, niyekuwavimbetela etindzaweni tonkhe temanti nasematubukweni emfula iJordane asengakefiki, nize niyewufika eBhethi Bhara.”
Ngako onkhe emadvodza aka-Efrayimu amenyetwa ahamba ayawuvimba tonkhe tindzawo letatinemanti nasematubukweni emfula iJordane, kuze kuyewufika eBhethi Bhara; 25adzimate atfumba nebaholi lababili bemaMidiyani, bo-Orebi naZebi. Orebi yena bambulalela edvwaleni lase-Orebi, kwatsi Zebi yena bambulalela etjeni lekuhlutela liwayini lelaliseZebi. EmaMidiyani bawacosha, baze babuya netinhloko tabo-Orebi naZebi, bafike batinika Gideyoni, labamkhandza ngesheya kwemfula iJordane.
