Jeremiya 50

₂“Memetelani nikhulume emkhatsini webetive,

phakamisani siboniso semphi, nimemetele,

ningafihli lutfo, kodvwa tsanini:

‘IBhabhulona itawutfunjwa,

Bheli utawuhlazeka,

Maduki yena agcwale kwesaba.

Titfombe tayo tiyawuhlazeka

netithico tayo tigcwale kwesaba.’

₃Sive lesichamuka enyakatfo siyawuyihlasela,

live layo silishiye lingenalutfo.

Kute muntfu loyawuhlala kulo,

bantfu netilwane kuyawulibalekela.”

“Kulawo malanga, nangaleso sikhatsi,

bantfu baka-Israyeli nebantfu bakaJuda

bayawuhamba kanyekanye,

bonkhe bayawukhala tinyembeti

sebahamba bafunana naSimakadze Nkulunkulu wabo.

₅Bayawubuta indlela leya eSiyoni,

emabombo abo bawabhekise khona.

Bayawuta batetibophela bona kuSimakadze

ngesivumelwane saphakadze

lesingeke siphindze sikhohlakale.

₆“Bantfu bami babetimvu letilahlekile,

belusi bato batedukisile,

batenta tasabalala etulu etintsabeni.

Babezulazula etikwetintsaba nemagcuma,

baze bayikhohlwa nendzawo yabo,

lapho baphumula khona.

₇Bonkhe lababatfola babadla,

titsa tabo tatsi: ‘Site tsine licala,

ngobe bona kuSimakadze labelidlelo labo sibili,

Simakadze, litsemba laboyisemkhulu.’

₈“Balekani niphume eBhabhulona;

lishiyeni lelive lemaBhabhulona,

nibe njengetiphongo letihola umhlambi.

₉Ngobe ngiyawuchukuluta

letive letinemandla ngitiletse titewusukela

iBhabhulona tiyihlasele,

tichamuka emaveni angasenyakatfo,

tiyawutihlela kahle ize itfunjwe.

Imicibisholo yato

ifanana neyetingcweti tetihlabani

letingabuyeli emuva tilengisa tandla.

₁₀Live lemaBhabhulona liyawuphangwa,

bonkhe labaliphangako bayakwesutsa,”

kusho Simakadze.

₁₁“Njengobe nijabula futsi nitsakase,

nine leniphanga lifa lami,

njengobe niyatjakadvula njengesitfokati nasibhula kolo,

ninhinhile njengetinkunzi temahhashi,

₁₂unyoko iBhabhulona uyawutseleka ngemahloni,

lowo lowanitala uyawuhlazeka.

Uyawuba ngulomncane emkhatsini wetive,

abe lihlane, indzawo lelugwadvule.

₁₃Ngenca yentfukutselo yaSimakadze

angeke asahlalwa bantfu,

kodvwa sewuyawusala ayedvwa.

Bonkhe labendlula eBhabhulona

bayakwetfuka bafe, bahleke lusulu,

ngenca yawo onkhe emanceba ayo.

₁₄“Manini ngemumo,

nitungelete iBhabhulona,

nonkhe nine lenijijimeta ngemicibisholo.

Yijijimeteni, kungasali namunye umcibisholo,

ngobe yonile kuSimakadze.

₁₅Hlabani umkhosi kuyo yonkhe indzawo!

Iphakamisa tandla,

imibhoshongo yayo iyawa,

tibondza tayo tihhihlitelwa phansi.

Njengobe loku kukuphindzisela kwaSimakadze,

yikhipheleni sibhongo,

yentani kuyo njengobe nayo yentile kulabanye.

₁₆Susani umhlanyeli eBhabhulona

nemvuni lobambe lisikela lakhe ngesikhatsi sekuvuna.

Ngenca yenkemba yemcindzeteli,

akube ngulowo nalowo abuyele kubakubo,

ngulowo nalowo akabalekele eveni lakubo.”

₁₇“Israyeli unjengemhlambi wetimvu letisakatekile

ticoshwe ngemabhubesi.

Lekucala lelamudla kwaba yinkhosi yase-Asiriya;

lekugcina lelabhoba ematsambo akhe,

kwaba nguNebukhadnezari, inkhosi yaseBhabhulona.”

“Ngitayijezisa inkhosi yaseBhabhulona nelive layo,

njengobe ngajezisa inkhosi yase-Asiriya.

₁₉Kodvwa Israyeli ngitambuyisela

emuva edlelweni lakhe,

uyawuklaba eKhameli naseBhashani.

Kukhanuka kudla kwakhe kuyakweneliseka

etintsabeni taka-Efrayimu nakaGileyadi.

₂₀Kulawo malanga, nangaleso sikhatsi,

kuyawuphenywa ngelicala laka-Israyeli,

kodvwa aliyiwutfolakala,

kuphenywe nangetono takaJuda,

kodvwa kute nasinye lesiyawutfolakala,

ngobe ngiyakuyitsetselela insali

lengayishiya,” kusho Simakadze.

₂₁“Hlasela live laseMerathayimu

nalabo labahlala ePhekodi.

Bacoshe, ubabulale, ubabhubhise ubacedze.

Wente konkhe lengikuyale ngako,” kusho Simakadze.

₂₂“Kukhona umsindvo wemphi eveni,

umsindvo wembhubhiso lenkhulu!

₂₃Maye, kubhidlitwa nekuhhohloka

kwesandvo sawo wonkhe umhlaba!

Maye, icitsiwe iBhabhulona emkhatsini wetive!

₂₄Ngakubekela lugibe,

wena Bhabhulona,

wavele wabhajwa ungakati ngalo,

watfolakala, wabanjwa,

ngobe wemelana naSimakadze.

₂₅Simakadze ugwabule umphandza wakhe wetikhali,

wakhipha tikhali telulaka lwakhe,

ngobe iNkhosi Simakadze lenguSomandla

inemsebenti letawenta eveni lebantfu baseBhabhulona.

₂₆Lelive lisukeleni nilihlasele,

nisuka emikhawulweni yalo.

Gwabulani tingungu talo,

nilimpongise njengetindvundvuma talokutinhlavu.

Libhubhiseni nilicedze,

ningalishiyeli nalencane insali.

₂₇Bulalani tonkhe tinkunzi talo letisetincane:

Tehliseleni ekuhlatjweni.

Maye kubo! Ngobe lilanga selifikile,

sikhatsi sabo sekutsi bajeziswe.

₂₈Lalelani lababalekako nebakhoseli

labesuka eBhabhulona,

bamemetela baseSiyoni kutsi Simakadze Nkulunkulu wetfu

utiphindziselele kanjani,

atiphindziselela ngenca yelithempeli lakhe.

₂₉“Butsani banembi bamelane neBhabhulona,

bonkhe labakwati kujijimeta ngebutjoki,

niyitungelete yonkhe,

kubete lophunyulako.

Yikhokheleni njengetento tayo;

yentani kuyo njengobe nayo yenta.

Ngobe yedzelele Simakadze,

longuLongcwele waka-Israyeli.

₃₀Ngako-ke emajaha ayo ayawufela etitaladini tayo,

onkhe emabutfo ayo ayawubhujiswa

ngalelo langa,” kusho Simakadze.

₃₁“Buka la, ngimelene nawe, live lemaBhabhulona,

awu, wena lotiphakamisako,

ngobe lilanga lakho selifikile,

sikhatsi sakho sekutsi ujeziswe,”

kusho iNkhosi Simakadze lenguSomandla.

₃₂“Lotiphakamisako utawukhubatela awe,

kute namunye lotamsita amsukumise;

ngiyawulumeka umlilo emadolobheni akhe,

umlilo loyawudla bonkhe labakhelene naye.”

“Bantfu baka-Israyeli bacindzetelekile,

kanye nebantfu bakaJuda futsi.

Bonkhe batfumbi babo babankonkoshele,

bayala kubayekela bahambe.

₃₄Noko uMhlengi wabo unemandla;

nguSimakadze Somandla libito lakhe.

Uyakumela indzaba yabo ngemandla,

kuze atewuletsa kuphumula eveni labo,

kodvwa kungabi nakuthula

kulabo labahlala eBhabhulona.

₃₅“Kulengela inkemba etikwemaBhabhulona!

Ilengela etikwalabo labakhile eBhabhulona,

nasetikwetiphatsimandla takhona netihlakaniphi tayo!”

kusho Simakadze.

₃₆“Kulengela inkemba etikwebaphrofethi bayo bemanga,

bayawuba tilima.

Inkemba ilengela etikwemabutfo ayo,

agcwale kwesaba.

₃₇Inkemba ilengela etikwemahhashi ayo

nasetikwetincola takhona temphi,

nasetikwato tonkhe tihambi etigabeni tato!

Bayawuba njengebafati.

Inkemba ilengela etikwemcebo weBhabhulona!

Bayawuphangwa.

₃₈Kulengela somiso etikwemanti ayo!

Ayawukoma, ngobe kulive letithico,

bantfu balo bahlanyiswa kwesaba leto tithico.

₃₉“Ngako-ke tidalwa tasehlane netimphisi

kuyawuhlala khona lapho,

nesahhukulu siyakwakhela khona.

Akusayiwuphindze kwakhe muntfu,

nome ahlale khona,

titukulwane ngetitukulwane.

₄₀Njengobe Simakadze agumbucela

iSodoma neGomora kanye nemadolobha

labomakhelwane bayo,

kanjalo sekuyawubate namunye lohlala lapho,

kute muntfu loyakwakha kuyo,” kusho Simakadze.

₄₁“Bukela,

kuchamuka imphi enyakatfo;

sive lesikhulu nemakhosi lamanyenti

achukulutiwe emikhawulweni yemhlaba.

₄₂Bahlome ngebutjoki nangetikhali;

bavutsa lulaka, abanamusa.

Bevakala njengekudvuma kwelwandle

sebagibele emahhashini abo;

beta ngeticheme temabutfo emphi,

bete kutawuhlasela wena, Ndvodzakati yaseBhabhulona.

₄₃Inkhosi yaseBhabhulona ive imibiko ngabo,

nyalo imikhono yayo seyiyalenga nje,

kucacamba kwenhlitiyo sekuyibambile,

iminjunju lenjengeyemfati nakaphetfwe ngumhelo.

₄₄Njengelibhubesi nalichamuka

emahlatsini aseJordane

liya eveni lelinemadlelo laluhlata,

ngiyawubatuma baseBhabhulona,

ngibacoshe eveni labo.

Ngubani lokhetsiwe, lengiyawumbekela loku?

Ngubani lonjengami?

Kona nje ngubani longangicela insayeya?

Ngumuphi umelusi longamelana nami?”

₄₅Ngako-ke, vanini losekulungiswe nguSimakadze

engcondvweni yakhe ngeBhabhulona,

loko lasatimisele kukwenta

kulabo labahlala eBhabhulona:

Ematfole emhlambi ayawuhudvulwa,

uyakuwabhubhisa awacedze emadlelo abo ngenca yabo.

₄₆Umhlaba uyawutfutfumela ngemsindvo

wekutfunjwa kweBhabhulona;

kukhala kwayo kuyawuhokoma emkhatsini wetive.