Jobe 12

₂“Vele, kuyabonakala

kutsi nine nibantfu, kuhlakanipha kuyakufa nani!

₃Kodvwa nami nginengcondvo njengani,

kute lenincono ngako kunami.

Ngubani nje longatati tonkhe letintfo?

₄Sengiyinhlekisa ngisho nakubangani bami,

lite nome Nkulunkulu angiphendvula nangikhala kuye,

ngaba yintfo yekuhlekwa nje,

lite nome ngilungile futsi ngingenacala.

₅Bantfu labahleti kahle abamnaki lohluphekile,

yena lowo lobisha ekuhluphekeni.

₆Emakhaya etigebengu akaphazanyiswa lutfo,

nalabo labacunula Nkulunkulu baphephile,

yebo, labo labaphetse nkulunkulu wabo ngetandla tabo.

₇“Kodvwa hamba ubute etilwaneni, titakufundzisa,

nome ubute tinyoni telizulu, titakutjela.

₈Khuluma kuwo umhlaba, utakufundzisa;

buta nasetinhlantini taselwandle, titakwatisa.

₉Ngukuphi emkhatsini wako konkhe loku

lokungati kutsi konkhe loku kwentiwa nguSimakadze?

₁₀Kuphila kwato tonkhe tidalwa kusesandleni sakhe,

kanjalo nemiphefumulo yabo bonkhe bantfu bemhlaba.

₁₁Indlebe ayikuva yini lokukhulunywako,

njengobe nelulwimi lukunambitsa kudla?

₁₂Kuhlakanipha akutfolakali yini kulabadzala?

Imphilo lendze ayikuletsi yini kucondza?

₁₃“Kuhlakanipha nemandla kwaNkulunkulu,

kweluleka nekucondza kwakhe.

₁₄Loko lokubhidlitwe nguye,

kute longaphindze akwakhe kabusha,

umuntfu lamfake ejele

angeke akhululwe ngumuntfu.

₁₅Nakabamba imvula kuba nesomiso,

utsi angawayekela lamanti, ente umonakalo.

₁₆Emandla nekuncoba kwaNkulunkulu,

umkhohliswa nemkhohlisi, bobabili bakhe.

₁₇Wenta babusi batiphatsise kwetilima,

ente behluleli babe tilima.

₁₈Ukhumula emakhosi emajiva awo ebukhosi,

awegabise tindophi tekubopha tigcili netiboshwa.

₁₉Wenta baphristi bahambe bate tembatfo,

aketule bantfu bebasetikhundleni sikhatsi lesidze.

₂₀Ubindzisa beluleki labetsembekile,

esuse inhlakanipho yebaholi.

₂₁Utfululela lihlazo kulabahloniphekile,

abalahlise phansi tikhali labanemandla ekulwa.

₂₂Wembula tintfo letijulile tebumnyama,

aletse ematfunti lamnyama kakhulu ekukhanyeni.

₂₃Wenta tive tibe tinkhulu, aphindze atibhubhise,

wandzisa tive, aphindze atisakate.

₂₄Babusi betive temhlaba ubemuka kuhlakanipha,

abayekele bazulazule ehlane bangayiboni indlela,

₂₅badvukute ebumnyameni nekukhanya kungekho,

abente badzayitele njengetidzakwa.”