Jobe 16

₂“Setinyenti kakhulu

tintfo letinjalo lengitivile.

Nine nonkhe nje nibadvudvuti lababi.

₃Kantsi akasanawuphela yini lamavi enu langumoya?

Nine nihlushwa yini kangako,

kutsi seningalibala kuphikisana nje ngelite?

₄Nami kodvwa empeleni bengingakhuluma kanjalo,

kube nine beningimi nami ngingini.

Nami bengingakhuluma ngimelane nani

ngemavi lamanyenti, ngininikinele inhloko.

₅Kodvwa umlomo wami bewunganikhutsata.

Indvudvuto lebeyingaphinyiselwa tindzebe temlomo wami

beyingaba kuphumula emiphefumulweni yenu.

₆“Noko nome ngikhuluma,

iminjunju yemahlaba lakimi ayikagobi,

kantsi nome bengingatibamba, ngiticinise, ayikapheli.

₇Awu! Empeleni, Nkulunkulu, sewungigugisile.

Empeleni ubhubhise umndeni wami wonkhe.

₈Ungibambile, loko sekube ngubona bufakazi.

Nalokuba ngumkhehlekhehle kwami

kuya ngekuya kuyandza kumelana nami.

₉Ngentfukutselo yakhe Nkulunkulu uyanginwabulula,

wehlukanisa sankhala nesiphanga,

angibuke ngeliso lelibi.

₁₀Bantfu sebasitakele ngami,

nguleyo ndvodza itisholo lekutsandzako ngami,

banginhlakaya sihlatsi ngekungicoloshela,

sebangakhele luzungu bahlangana ngami.

₁₁Nkulunkulu sewungilahlele kubantfu lababi,

wangijikijela etidladleni talabangakalungi.

₁₂Konkhe bekungihambela kahle,

kodvwa Nkulunkulu ungibambe ngabhongwane,

wangihlantisa konkhe ngekungihlifita,

wangenta inkoyoyo yakhe,

₁₃labanemba ngebutjoki

bangikake ngala nangala.

Ungijijimeta etinsweni

angasenasihawu nami.

Inyongo yami icitsekela phansi emhlabatsini.

₁₄Ungihlaba emaphindze,

angijijimete njengengwazi

lehlanyiswa yinzondo.

₁₅“Ngiyatililela, ngembetse tingubo temasaka.

Ngihleti lapha elutfulini,

ngiyabhuquta njengalosehlulekile.

₁₆Sengikhale ngaze ngabheja ngaba bovu ebusweni.

Emehlo ami asavuvuke aze aba

naletimnyama tingobho.

₁₇Kodvwa noko tandla tami timsulwa ekulweni,

nemkhuleko wami uhlobile.

₁₈“Awu, mhlaba, awusiyigcibedzela ingati yami.

Shangatsi kukhala kwami kungete kwathuliswa.

₁₉Kodvwa nanyalo ukhona fakazi wami ezulwini,

ummeli wami ukulelisetulu live.

₂₀Umncuseli wami ungumngani wami,

ngesikhatsi emehlo ami aphophota

tinyembeti kuNkulunkulu,

₂₁uncengela umuntfu kuNkulunkulu,

njengemuntfu ancengela umngani wakhe.

₂₂“Sekusele iminyakana nje lembalwa kutsi yendlule,

bese nami ngingenela indlela lekuhanjwa ngayo

ungaphindzi ubuye ngayo futsi.”