Jobe 18

₂“Utawuticedza nini letinkhulumo?

Ase ubuyise ingcondvo,

sitabe sesiyakhuluma-ke.

₃Wentiwa yini lokutsi usitsatse njengetinkhomo nje,

shangatsi tsine sesitilima takho?

₄Wena ngobe nguwe lotidzabula ube ticucu

ngalokutfukutsela kwakho,

usho kutsi sekungalahlwa wonkhe lomhlaba

ngenca yakho nje wedvwana?

Nome-ke usho kutsi sale kusimuka emadvwala

asuswe etindzaweni tawo?

₅“Sibane salomubi sicinyiwe,

lilangabi lemlilo wakhe alisavutsi.

₆Kukhanya kwasekhaya lakhe sekubumnyama;

sibane lesiseceleni kwakhe siyacisha.

₇Emandla etinyatselo takhe asayancipha;

emacebo akhe asamjika phansi.

₈Netinyawo takhe setimkhaceke elugibeni,

sewubatse uyazubalata luyamtongoletela.

₉Lugibe selumbambe ngesitsendze sakhe,

sifu simntfonyile akasatsi khwasha.

₁₀Bambophele lifindvo endleleni yakhe leyenile,

lugibe lusemkhondvweni wakhe.

₁₁Tesabiso timetfusa ndzawana tonkhe,

timhleli etitsendzeni.

₁₂Inhlekelele ilambele yena,

inhlekelele ikhamisele yena,

nakatsi nje uyawa.

₁₃Itakudla sikhumba sakhe,

litubulo lekufa lichobote

ematsambo etitfo temtimba wakhe.

₁₄Ukhishiwe ekuvikelekeni kwasekhaya lakhe,

washuciswa wamikiswa enkhosini yekufa.

₁₅Ekhaya lakhe sekubusela umlilo,

sibabule lesivutsako sisakatwe lapho ahlala khona.

₁₆Timphandze takhe tiyoma lapha ngaphansi kwakhe,

nemagala akhe asayabuna lapha ngetulu.

₁₇Kukhunjulwa kwakhe sekuyafiphala kulomhlaba,

akasenabito lapha emhlabeni.

₁₈Sewucoshiwe ekukhanyeni wayiswa ebumnyameni,

ulahliwe futsi lapha kulomhlaba.

₁₉Akasenabantfwana,

nabatukulu sewute emkhatsini webantfu bakubo;

kute insali lapho ake wahlala khona.

₂₀Emadvodza asenshonalanga

asemangele ngalesehlakalo sakhe;

emadvodza asemphumalanga abanjwe kwesaba.

₂₁Ngempela injalo

indzawo lapho kuhlala lomubi khona,

lena yindzawo lehlala umuntfu

longatani naNkulunkulu.”