Jobe 20

₂“Ngihlushwa ngimicabango yami

letsi angiphendvule nami,

ngobe sengiphatamiseke kakhulu.

₃Ngiva emagama layinhlamba kimi,

ngiko nje ingcondvo yami seyitsi angitiphendvulele.

₄“Empeleni nawe uyati kutsi bekunjani, kwakadzeni nje,

kusukela nakubunjwa umuntfu emhlabeni,

₅kutsi kujabula kwalababi kwesikhashana nje,

nekutfokota kwalabangenaNkulunkulu

kuba kwesikhashana nje.

₆Nome kuphakama kwalomubi

kuze kuphikelele emazulwini nje,

nenhloko yakhe itsi ayitsintse emafu,

₇uyawubhubha kokuphela njengemangcoliso akhe;

labo lababeke bambona bayawubutana, batsi: ‘Uphi?’

₈Njengeliphupho uyandiza angaphindzi atfolakale,

anyamalaliswe njengembono wasebusuku.

₉Liso lelalike lambona alisayiwuphindze limbone futsi.

Indzawo yakhe ingeke iphindze imbone.

₁₀Bantfwabakhe kufanele bahlawule kulabamphofu,

tandla takhe kufanele tibuyisele umcebo wakhe.

₁₁Emandla ebusha lagcwele ematsanjeni akhe

ayawulala kanye naye elutfulini.

₁₂“Naloku umonakalo unongotela emlonyeni wakhe,

nome awufihla ngaphansi kwelulwimi lwakhe nje,

₁₃naloku angeke akumele nje kuwukhiphela ngephandle,

alibele kuvalela lomonakalo emlonyeni wakhe,

₁₄kodvwa lokudla kwakhe kutaba munyu esiswini sakhe,

kutawugucuka kube sihlungu setinyoka

sekungekhatsi ematfunjini akhe.

₁₅Utabukhafula bonkhe lobunjinga labumita,

Nkulunkulu utamhlantisa bonkhe lapha esiswini sakhe.

₁₆Utawumunya lesihlungu setinyoka;

abulawe ngematinyo elibululu.

₁₇Angeke atfokote ngemifudlana nemifula

legeleta luju nelulata.

₁₈Loko lakushikashikanelako uyawukubuyisa konkhe

angakadli lutfo lwako.

Akasenayidla intalo yako konkhe

lokusebenta kwakhe lokungaka lakwentile.

₁₉Ngobe ubacindzetele labamphofu, wabashiya beswele,

ubadle netindlu tabo langazange asatakhe.

₂₀“Ngempela akayikuba nako kuphumula kwemphefumulo

ekulangateleni kwakhe.

Angeke akhone kutisindzisa kwayena ngalomcebo wakhe.

₂₁Sekute nalokuncane lokusele yena langakudla,

bunjinga bakhe ngeke buphumelele bume.

₂₂Asesekutamaseni kwakhe lusizi luyawumhlasela,

emandla lamakhulu elusizi ayawumehlela.

₂₃Uyawutsi nase agcwalise umkhaba wakhe,

Nkulunkulu ehlisele intfukutselo yakhe etikwakhe,

ehlisele nemvula yemijijimeto yakhe etikwakhe.

₂₄Nome abalekela silimato sensimbi,

umcibisholo welitfusi uyakumhlaba.

₂₅Uyakuwudvoncula emhlane wakhe,

kudla kwawo kuphume esibindzini,

kwesaba kuyawumehlela.

₂₆Bumnyama lobuphatsekako bumlalele endleleni

bufune umcebo wakhe.

Umlilo longakavutselwa uyakumshwabudzela umcedze,

ukudle konkhe lokusele ekhaya kakhe.

₂₇Emazulu ayawulenekela lilanga licala lakhe,

umhlaba nawo uyawumvukela indlwabane.

₂₈Sikhukhula siyakwemukisa likhaya lakhe,

emagagasi alitfumbe

ngelilanga lelulaka lwaNkulunkulu.

₂₉Sinjalo-ke siphetfo Nkulunkulu lasabele lababi,

lifa lelingulona balibekelwa nguNkulunkulu.”