Jobe 3

₃“Shangatsi lilanga lengatalwa ngalo lingabhubha,

lisuswe nebusuku lekwabikwa ngabo

kwatsiwa: ‘Kutelwe umfana!’

₄Shangatsi lelo langa lingaba mnyama,

shangatsi naNkulunkulu losezulwini angete alinaka,

shangatsi nekukhanya kungete kwakhanya kulo.

₅Shangatsi bumnyama nelitfunti lekufa

kungatfumba lelo langa,

shangatsi lingambonywa lifu,

shangatsi bumnyama bungasibekela kukhanya kwalo.

₆Shangatsi lobo busuku bungabanjwa bumnyama lobukhulu,

shangatsi bungete babalwa kanye nalamanye emalanga emnyaka,

bungete bafakwa ngisho nakuyinye inyanga.

₇Shangatsi lobo busuku bungabate

namunye umuntfu lowemitfwa ngabo,

nekujabula kungevakali kubo.

₈Shangatsi labo labacalekisa emalanga

bangacalekisa lelo langa,

tingcweti letingavusa Leviyathani.

₉Shangatsi tinkhanyeti talo tentsatsakusa tingaba mnyama;

shangatsi busuku balo bungemela kukhanya lokungeke kufike,

bungaboni ngisho nemisebe yentsatsakusa,

₁₀ngobe abuzange buyivale iminyango

yesisu samake lowangitala,

kutewufihla inhlupheko emehlweni ami.

₁₁“Kodvwa kwentiwa yini kutsi ngingafi mhlazana ngitalwa?

Angifanga ngani mhlazana ngiphuma esiswini?

₁₂Angemukelelani lawo madvolo?

Wona lawo mabele angimunyiselani?

₁₃Ngobe manje ngabe ngitilalele ngekuthula;

yebo, ngabe ngitilalele ekuphumuleni.

₁₄Ngabe ngitiphumulele nemakhosi netindvuna temhlaba

labatakhela tindzawo tabo lesetabhidlika.

₁₅Ngabe ngitiphumulele nebabusi lababenegolide,

bagcwalisa tindlu tabo ngesiliva.

₁₆Nome lokungenani-ke angifihlwanga ngani emhlabatsini

njengeluswane lolutelwe lufile,

ngibe njengeluswane lolungazange

selukubone kukhanya kwelilanga?

₁₇Lapho-ke ngulapho lababi bayekela khona budlova,

nalabakhatsatekile lapho bayaphumula.

₁₈Lapho netiboshwa titfola kuthula,

atisaliva ngisho neliphimbo lalabacindzetelako.

₁₉Labancane nalabakhulu bakhona lapho, bafanana bonkhe,

nesigcili sikhululekile kumphatsi waso.

₂₀“Kukhanya kunikelwani bantfu labaselusizini?

Kona kuphila kunikelwani

umuntfu lomphefumulo wakhe udzabukile?

₂₁Kunikelwani bantfu labakulangatelelako kufa,

kodvwa kungefiki,

bakuphenyisise kwendlula umcebo lofihliwe?

₂₂Kunikelwani bantfu labakujabulelako kufika ethuneni,

batsakase nabafinyelela emadlizeni?

₂₃Unikelwani imphilo umuntfu londlela yakhe ifihlakele,

umuntfu lovinjetelwe nguNkulunkulu?

₂₄Sibibitfwane sesikudla kwami,

kububula kwami kugeleta njengemanti.

₂₅Loko bengikwesaba kakhulu sekungehlele,

lebengikwesabisa inyoka sekwenteke kimi.

₂₆Angisenakuthula, nakuphola, nakuphumula.

Anginakuphumula, ngiphetfwe kukhatsateka kodvwa.”