Jobe 7

₁“Umuntfu ute yini umsebenti lomatima lapha emhlabeni?

Khona emalanga akhe

akanjengawo yini emuntfu locashiwe?

₂Njengesigcili silangatelela ematfunti asentsambama,

nanjengemuntfu locashiwe lolindzela ngekulangatelela umholo wakhe,

₃kanjalo nami ngabelwe imihla yekuhlupheka kuletinyanga,

ngabelwe busuku beminjunju kulamalanga.

₄Nangilala phansi, ngiyaye ngicabange ngitsi:

‘Ingabe ngiyawuvuka nini?’

Busuku nabo bunyonyobe kancane,

ngibe mine ngijilajileka kudzimate kudzabuke kusa.

₅Umtimba wami wembetse timphetfu netincwencwe,

sikhumba sami sigatuka

cedze kubundvuke bovu etilondzeni tami.

₆“Emalanga ami agijima njengembane,

efike ekugcineni asangasenalo litsemba.

₇Khumbula, mane ukhumbule, Nkulunkulu,

kutsi imphilo yami ayisilo lutfo,

kodvwa ngumphefumulo nje,

emehlo ami akasayiwuphindza akubone kujabula.

₈Liso lelingibonako nyalo,

alisayiwuphindza lingibone futsi.

Uyawungifuna, kodvwa ngiyawube ngingasekho.

₉Njengelifu lelinyamalalako ligcina lingasekho,

unjalo-ke nemuntfu losaya ethuneni,

akaphindzi abuye.

₁₀Ngeke aphindze abuyele endlini yakhe,

indzawo yakhe ayisayiwuphindza imati.

₁₁“Ngako ngingeke ngithule,

ngitawukhuluma ngikuletinhlungu temoya wami,

ngikhonone kulobumunyu bemphefumulo wami.

₁₂Ngilwandle yini mine,

nome ngingumkhoma waselwandle yini,

kutsi sewungaze uhlale ungigadzile?

₁₃Nangicabanga ngembhedze wami kutsi utangidvudvuta

neluhlaka lwami kutsi lutawupholisa iminjunju,

₁₄wena ngulapho ungesabisa kakhulu khona ngemaphupho akho,

ungetfuse ngemibono yakho,

₁₅sengize nginconota kwekhanywa ngimane ngife

sekunalomtimba wami lengikuwo.

₁₆Sengiyayeya imphilo yami.

Ngingamane ngingete ngaphila iminyaka leminyenti.

Ngiyekele ngisale ngedvwa,

emalanga ami akasesilo lutfo kimi.

₁₇“Uyini umuntfu kutsi ungadzimate umnakekele kangaka

nekutsi ungaze umnake kangaka,

₁₈ngekutsi umvakashele onkhe malanga ekuseni,

umvivinye ngawo onkhe ematfuba?

₁₉Ungeke yini sewumane unginike litfutjana

ngike ngehlise liphukuphuku?

₂₀Nangabe ngonile, ngenteni kuwe,

wena Mlondvoloti webantfu?

Wenteleni kutsi ngibe yinkoyoyo yakho?

Wenteleni kutsi ngibe ngumtfwalo kuwe?

₂₁Awuticoleli ngani tiphambuko tami,

utsetselele tono tami?

Ngobe mine sengitawulala elutfulini masinyane;

maye, utase uphenye sewungifuna mine ngingasekho!”