Jona 2

₂“Ekuhluphekeni kwami ngakhala kuwe, Simakadze,

wangiphendvula;

ngamemeta ngisematfunjini emhlaba,

ngicela lusito, wena waliva livi lami.

₃Wangijikijela ekujuleni,

enhlitiyweni yetilwandle, emanti angitungeleta;

onkhe emagagasi nemanti endlula etikwami.

₄Ngase ngitsi: ‘Sengicoshiwe emehlweni akho;

noko, ngiyawuphindze ngibuke lithempeli lakho lelingcwele.’

₅Emanti angimbonya, angihisha; kujula kwangitungeleta,

tindzembuluka tangitsandzela enhloko.

₆Ngehlela emajukujukwini emhlaba,

live lelimasango alo ahlala akhiyiwe kuze kube phakadze;

kodvwa imphilo yami wayenyula emgodzini,

Simakadze, Nkulunkulu wami.

₇Ngesikhatsi umphefumulo wami uphelelwa ngemandla

ngakukhumbula wena, Simakadze.

Umthandazo wami wafinyelela kuwe, ethempelini lakho lelingcwele.

₈Labo labakhonta bonkulunkulu labalite

bamshiyile Nkulunkulu sibili lophatsana ngemusa.

₉Kepha mine ngiyawuhlabela kuwe ngelivi lekubonga,

nginikele ngemihlatjelo;

loko lengikufungele ngiyawukufeza.

Insindziso ivela kuSimakadze.”