Jona 4

₁Kwamkhuba kakhulu loko Jona, ngako watfukutsela kakhulu. ₂Wathandaza kuSimakadze watsi: “Awu, Simakadze! Akusiko yini loku lengakusho ngiseseveni lakitsi kutsi kutakwenteka? Ngiko ngabaleka ngaya eThashishi; ngobe ngangati kutsi wena unguNkulunkulu lonemusa nesihawu, uyephuta kutfukutsela, unelutsandvo loluphuphumako, uyatisola ngekutfumela lokubi. ₃Ngako-ke Simakadze, ngiyakuncenga kutsi ukususe kuphila kwami kimi; ngobe kuncono kimi kutsi ngife kunekutsi ngiphile.”

₄Simakadze wamphendvula watsi: “Unalungelo lini lekutfukutsela?”

₅Jona waphuma kulelidolobha wayawuhlala ngasemphumalanga yalo, watentela lidlangala lapho. Wahlala emtfuntini ngaphansi kwalo, kute atewubona lokwase kutakwenteka kulelidolobha laseNineve. ₆Simakadze Nkulunkulu wamilisa umhlafutfo, wawukhulisa etikwaJona kutsi umentele umtfunti, kuze kuphele kutfukutsela kwakhe; Jona wamjabulisa lomhlafutfo. ₇Ngakusasa nakudzabuka kusa, Nkulunkulu walungisa imphehla, yawuphehla lomhlafutfo, wabuna. ₈Nakuphuma lilanga, Nkulunkulu walungisa umoya loshisako wasemphumalanga; lilanga lashaya enhloko yaJona, wadzimate waba nesiyeti, wafisa kufa; wase utsi: “Kuncono ngimane ngife kunekutsi ngiphile.”

₉Kodvwa Nkulunkulu watsi kuJona: “Unalungelo lini lekutfukutselela lomhlafutfo?”

Yena-ke watsi: “Ngenta kahle kutsi ngitfukutsele; ngitfukutsele kutsi angife ngitsi saka!”

₁₀Simakadze watsi: “Wena uyawuhawukela umhlafutfo longakawujulukeli nome longakawukhulisi, lomile ebusuku bunye, waphindze wafa ebusuku lobulandzelako. ₁₁Pho, mine bengingeke ngiyihawukele yini iNineve, lelidolobha lelikhulu kangaka, lapho kukhona bantfu labangakwati kwehlukanisa sandla sabo sekudla nesancele, labati-120 000, kanye netinkhomo letinyenti kangaka?”