Sililo 3

₁Mine ngingumuntfu lokubonile kuhlupheka

ngendvuku yelulaka lwaSimakadze.

₂Ungicoshile,

wangenta ngahamba ngetinyawo,

ngahamba ebumnyameni

kungesiko ekukhanyeni.

₃Ngempela,

sandla sakhe usiguculele ngakimi,

simelana nami njalo nje,

onkhe emalanga.

₄Usigugisile sikhumba sami nenyama yami,

ematsambo ami uwafohlotile.

₅Ungivimbetele,

wangitungeleta ngalokubabako nangekuhlupheka lokukhulu.

₆Ungihlalise ebumnyameni, nginjengalabo

lasebalala kadzeni emadlizeni.

₇Ungibiyele ngetindvonga,

ngako angikhoni kuphunyula ngibaleke.

Ungibophe ngetinketane letimatima.

₈Ngisho nome sengimemeta, ngikhalela kusitwa,

uyivalela ngaphandle imikhuleko yami.

₉Indlela yami uyivale ngetinguzanguza tematje;

wagwegwisa indlela yami,

yaba matombetombe.

₁₀Njengelibhele lelibhacele inyamatane,

nanjengelibhubesi lelitifihlile,

₁₁ungihudvule endleleni, wangisitila,

wangishiya ngingenamsiti.

₁₂Ujijimete umcibisholo wakhe, wangenta ngaba yinkoyoyo

yemicibisholo yakhe.

₁₃Ugwaze inhlitiyo yami

ngemicibisholo yasengculwini yakhe.

₁₄Ngagucuka ngaba yintfo yekuhlekisa

kubo bonkhe bantfu,

bahlabela tingoma ngami bangihaya lonkhe lilanga.

₁₅Ungesutsise ngemitsi lebabako,

wangigcwalisa ngenyongo.

₁₆Ematinyo ami uwagamule ngelukhetse,

wangigcobagcoba elutfulini.

₁₇Ngidlelelwe kuthula, ngadzimate ngakhohlwa

nekutsi kuyini kuphumelela.

₁₈Nguko ngitsi:

“Bukhosi bami buhambile kanye nako konkhe

lebengetsembele ngako kuSimakadze.”

₁₉Ngikhumbula kushaywa kwami

kanye nekundzindza kwami,

loko kubaba kanye nenyongo.

₂₀Ngikukhumbula kahle,

umphefumulo wami uphansi,

udzabukile ngekhatsi kwami.

₂₁Yebo, noko ngiyakubuyisa

engcondvweni, ngako nginelitsemba:

₂₂Ngenca yelutsandvo lolukhulu lwaSimakadze

asikadliwa sacedvwa,

ngobe sihawu sakhe singeke siphele.

₂₃Sisha onkhe emalanga ekuseni,

kwetsembeka kwakho kukhulu.

₂₄Ngiyatitjela ngitsi:

“Simakadze usabelo sami,

ngako ngitawulindzela yena.”

₂₅Simakadze ulungile kulaba

lababeke litsemba labo kuye,

kulaba labamfunisisako.

₂₆Kuhle kuyilindzela ngekuthula nangekubeketela

insindziso yaSimakadze.

₂₇Kuhle kumuntfu kutsi etfwale lijoko

ngesikhatsi asesemusha.

₂₈Akahlale yedvwa athule,

ngobe nguSimakadze lona lometfwese lona.

₂₉Akembele buso bakhe elutfulini,

mhlawumbe kusengaba khona litsemba.

₃₀Akaniketele sihlatsi sakhe kulowo

longamshaya ngemphama,

atseleke ngemahloni nangelihlazo.

₃₁Ngobe Simakadze bantfu akabalahli kokuphela.

₃₂Nome akuletsa kudzabuka,

kodvwa uyawubuye ahawukele,

lukhulu kangako-ke lutsandvo lwakhe.

₃₃Ngobe bantfu akabahluphi ngobe atsandza kubevisa buhlungu

nome-ke kubadzabukisa.

₃₄Kuhlifita ngetinyawo tonkhe tiboshwa eveni,

₃₅nekudlelela umuntfu emalungelo akhe embikwaSimakadze

Longetulu Kwako Konkhe,

₃₆nekudlelela umuntfu lilungelo lakhe

lekwehlulelwa ngebucotfo bemtsetfo,

kungabe Simakadze angeke yini atibone tintfo letinjengaleto?

₃₇Ngubani longakhuluma,

ente kwenteke,

nangabe Simakadze angakakumiseli kutsi kube njalo?

₃₈Akuphumi lokuhle nalokubi yini emlonyeni wakhe,

Longetulu Kwako Konkhe?

₃₉Umuntfu nje lophilako ukhononelani,

nakajeziswa ngenca yetono takhe?

₄₀Asihlolisise tindlela tetfu sitivivinye,

bese sibuyela kuSimakadze.

₄₁Asiphakamisele tinhlitiyo tetfu kanye netandla tetfu etulu,

sitiphakamisele kuNkulunkulu, sitsi:

₄₂“Sonile sahlubuka, awukatsetseleli.

₄₃“Utimbonye ngelulaka,

wasisukela wasicosha,

wabulala ngaphandle kwesihawu.

₄₄Utimbonye ngelifu,

kuze kutebate umthandazo longefika kuwe.

₄₅Usente emagwebu netilahlwa emkhatsini wetive tonkhe.

₄₆“Tonkhe titsa tetfu

setisikhamisele imilomo lemikhulu.

₄₇Sehlelwe kwesaba neluvalo,

nemigodzi,

kubhujiswa, nekucitfwa.”

₄₈Imifula yetinyembeti iyageleta isuka emehlweni ami,

ngobe bantfu bami babhujisiwe.

₄₉Emehlo ami ayawugobhota angemi,

angabi nako kuphumula,

₅₀adzimate Simakadze abuke phansi asezulwini kutsi abone.

₅₁Loku lengikubonako kuletsa lusizi emphefumulweni wami,

ngenca yabo bonkhe besifazane basedolobheni lami.

₅₂Labo lababetitsa tami ngaphandle kwesizatfu

babengitingela njengenyoni.

₅₃Betama kucedzela imphilo yami emgodzini,

bangijikijela ngematje,

₅₄emanti ayisibekela inhloko yami,

ngacabanga ngatsi akusesingakanani ngincanyulwe.

₅₅Ngalibita Libito lakho, Simakadze,

ekujuleni kwemgodzi lohlokomako.

₅₆Wakuva kuncusa kwami:

“Ungativali tindlebe takho

ekukhaleni kwami;

ngicela kuphunyutwa.”

₅₇Wasondzela kimi nangikubita,

watsi: “Ungesabi.”

₅₈Awu Simakadze,

wayimela indzaba yami,

wayihlenga imphilo yami.

₅₉Awu Simakadze, nawe ukubonile

lokubi lokwentiwe kimi.

Phumelelisa indzaba yami!

₆₀Ukubonile kujula kwemphindziselo yabo,

onkhe emacebo labangibophele wona ngasense.

₆₁Awu Simakadze,

utivile tinhlamba tabo,

onkhe emacebo abo labangimisele wona,

₆₂loko titsa tami letikuhlebako,

tingumtela ngami lonkhe lilanga.

₆₃Tibuke! Natihleti nome timile,

tiyangihaya nangetingoma tato.

₆₄Awu Simakadze, buyisela kuto loko lokufanele tandla tato.

₆₅Mbonya tinhlitiyo tato ngendvwangu,

shangatsi sicalekiso sakho singaba setikwato!

₆₆Ticoshe ngentfukutselo yakho,

utibhubhise, tingaphindzi tibe khona

ngaphansi kwemazulu aSimakadze.