Levithikusi 12

₁Simakadze wakhuluma kuMosi, watsi: ₂“Khuluma kuma-Israyeli utsi: ‘Nangabe umfati akhulelwa bese utala indvodzana, utawuba ngulongcolile ngekwemtsetfo emalanga lasikhombisa, njenganakaye esikhatsini usuke angcolile. ₃Ngelilanga lesiphohlongo lijwabu lalomfana lotelwe liyawujutjwa. ₄Lomfati kufanele ahlale esikhundleni, kuze kuphele emalanga lengema-33, kuze ahlambuluke ekopheni kwakhe. Akukafaneli atsintse lutfo lolungcwele nome aye endzaweni lengcwele, kuze kuphele emalanga akhe ekuhlanjululwa. ₅Kodvwa nangabe atele intfombatana, utawuba ngulongcolile kuze kuphele emaviki lamabili, njenganakaye esikhatsini. Emvakwaloko kufanele ahlale esikhundleni, kuze kuphele emalanga langema-66, kuze ahlambuluke ekopheni kwakhe.

₆“ ‘Nangabe sekwendlule lamalanga akhe ekuhlanjululwa nome utele umfana nome intfombatana, kufanele aye kumphristi ekungeneni kwelithende lekuhlangana aletse lizinyane lemvu lelinemnyaka munye libe ngumnikelo wekushiswa, nelivukutfu nome lituba, libe ngumnikelo wesono. ₇Umphristi utakunikela loku kube yinhlawulo yekubuyisana kuSimakadze, ngaloko utawuhlanjululwa ekopheni kwengati yakhe. Lena-ke ngimitsetfo lemacondzana nemfati lobeleke umfana nome intfombatana.

₈“ ‘Nangabe ehluleka kutfola lizinyane lemvu, kufanele aletse emavukutfu lamabili nome ematuba lamabili lasemancane, lelinye libe lemnikelo wekushiswa, lelinye libe lemnikelo wesono. Umphristi utawumentela inhlawulo yekubuyisana kuSimakadze, utawube sewuyahlambuluka.’ ”