Lukha 19

₁Jesu wangena eJerikho endlula. ₂Lapho-ke kwakukhona umtselisi lomkhulu kunguZakewu, futsi anjingile. ₃Wetama kubona Jesu, kodvwa wehluleka ngenca yesicumbi ngobe phela abemfisha. ₄Ngako wase ugijimela ngembili wakhwela esihlahleni semkhiwa isikhamore kuze atewubona Jesu, labetakwendlula ngaleyo ndlela. ₅Watsi kube efike lapho Jesu, wase ubuka etulu watsi kuye: “Zakewu, shesha wehle, ngobe kufanele ngiyewungenisa endlini yakho lamuhla.”

₆Ngako-ke Zakewu washesha wehla, wamemukela ngekujabula lokukhulu.

₇Bantfu labakubona loko bacala bavungama basola batsi: “Hhawu-u, lomuntfu bekasivakashi emtini walesoni!”

₈Zakewu wasukuma watsi eNkhosini: “Nkhosi, ngiyawukhipha incenye yalenginako ngenetise labaswele; futsi nakukhona lengimdlelele, ngitakubuyisela sekuphindvwe kane.”

₉Jesu wase utsi kuye: “Lamuhla seyifikile insindziso kulomuti; ngobe phela lendvodza nayo isitukulwane sa-Abrahama. ₁₀Phela, iNdvodzana yeMuntfu itewufuna nekusindzisa lokulahlekile.”

₁₁Basalalele loko, Jesu wachubeka wabatjela lomunye umfanekiso, ngobe abesasondzele eJerusalema, nangobe bantfu base bacabanga kutsi umbuso waNkulunkulu wawutawuvela ngaleso sikhatsi. ₁₂Ngako wase utsi: “Kwakukhona umnumzane labehloniphekile, lowahamba waya eveni lelikhashane kakhulu ayawubekwa inkhosi, bese uyabuya-ke. ₁₃Asengakahambi, wabita tisebenti takhe letatilishumi, nguleso wasinika luhlavu lwegolide, wase utitjela kutsi: ‘Ase nibone kutsi ningatitalisa kangakanani letinhlavu ngesikhatsi ngingekho.’ ₁₄Kantsi takhamiti tatimtondza, ngako tase titfumela tigijimi kutsi tiyewubika tifike titsi: ‘Asimfuni lowo muntfu abe yinkhosi yetfu.’

₁₅“Watsi kube abuye lomnumzane abesabekwe inkhosi kuleyo ndzawo, wase ubita tonkhe tisebenti takhe, labetinike imali, watsi atite titemlandzisa kutsi tase tiyitalise kangakanani. ₁₆Wekucala watsi: ‘Mnumzane, ngitalise letinye tinhlavu letilishumi ngalolo lowanginika lona.’ ₁₇Wase utsi kuye: ‘Wente kahle, sisebenti lesihle. Njengobe wetsembeke kulokuncane, ngitawukubeka wengamele emadolobha lalishumi.’

₁₈“Sisebenti sesibili seta satsi: ‘Mnumzane, ngitalise letinye tinhlavu letisihlanu ngalolo lowanginika lona.’ ₁₉Kulesi wase utsi: ‘Utakwengamela emadolobha lasihlanu.’

₂₀“Lesinye sisebenti seta sefika satsi: ‘Mnumzane, nalu loluhlavu lwakho; ngalugocotela ngeliduku, ngase ngiyalufihla. ₂₁Ngakwesaba ngobe ungumuntfu lonelulaka. Utsatsa lokungesiko kwakho, uvune lapho ungazange uhlanyele khona.’ ₂₂Yase itsi lenkhosi kuso: ‘Wena sisebenti lesibi, ngitakulahla ngelicala ngemavi akho! Uyati kutsi ngingumuntfu lonelulaka, ngitsatsa lokungesiko kwami, ngivune lapho ngingazange ngihlanyele khona! ₂₃Pho, manje, loluhlavu lwami awulufakanga ngani ebhange? Bengitawutsi ngibuya ngilutfole selunentalo.’ ₂₄Wase utsi kulabo lababeme madvutane: ‘Memukeni, ninike lona lonetinhlavu letilishumi.’

₂₅“Base batsi kuye: ‘Mnumzane, ingani lona unetinhlavu letilishumi.’ ₂₆Wabaphendvula watsi: ‘Nginitjela kutsi: Ngulowo lonako, uyakwengetelwa; kodvwa lowo longenalutfo, uyakwemukwa naloko lokuncane lanako. ₂₇Njengamanje nje, tonkhe letitsa tami betingafuni kutsi ngibe yinkhosi yato, tiletseni la nitibulale embikwami.’ ”

₂₈Jesu watsi kube acedze kukusho loko, wase uchubekela embili alibangise eJerusalema. ₂₉Kwatsi lapho Jesu asasondzela eBhethifage naseBhetani, eNtsabeni yetihlahla temiNcumo, watfumela bafundzi lababili, ₃₀wabayala watsi: “Hambani niye edolobhaneni lelisembikwenu, nisangena kulo nitawubona sidonkana lesingazange sesigitjelwe, sikhungiwe. Nifike nisitfukulule nisiletse lapha kimi.

₃₁“Nakukhona lonibutako atsi: ‘Nisitfukululelani?’ nibomtjela nitsi: ‘INkhosi iyasidzinga.’ ”

₃₂Bahamba-ke, bakhandza kunjengobe Jesu abebatjelile. ₃₃Basasitfukulula sidonkana, baniyo baso batsi kubo: “Nisitfukululelani?”

₃₄Babaphendvula batsi: “INkhosi iyasidzinga.” ₃₅Base basimikisa kuJesu. Bagaca tingubo tabo etikwaso, bamkhweta kuso. ₃₆Asasigibele, bendlala tingubo tabo endleleni embikwakhe.

₃₇Nase asatawufika, edvute neJerusalema, lapho indlela yehlela khona eNtsabeni Yemincumo, sicuku lesikhulu sebafundzi bakhe sacala sabonga Nkulunkulu samemeta kakhulu, njengobe base babone timangaliso letikhulu, ₃₈batsi:

₃₉Khona lapho labanye baFarisi bakhuluma kuJesu esicukwini batsi:

“Mfundzisi, yekhuta bafundzi bakho babindze!”

₄₀Jesu wabaphendvula watsi: “Ngiyanitjela ngitsi: Nababindza laba, ematje lucobo atawumemeta.”

₄₁Asasondzela eJerusalema wayibuka wayililela. ₄₂Watsi: “Kube mane lamuhla bewati lokudzingwa kuthula! Kodvwa manje kufihlakele emehlweni akho. ₄₃Ngobe ayeta emalanga lapho titsa takho tiyawukuhlasela, tikuvimbetele tikuvalele ndzawo tonkhe. ₄₄Tiyawukubhidlita uphele nya kanye nebantfu labangekhatsi kwakho; alikho nome linye litje leliyawusala ngetulu kwalelinye, ngobe awusicaphelisisanga sikhatsi Nkulunkulu lakuhambela ngaso.”

₄₅Jesu wangena ethempelini wacala wacosha labo bebatsengisa, ₄₆watsi kubo: “Kubhaliwe emiBhalweni kutsi: ‘Indlu yami iyawuba yindlu yemthandazo.’ Kodvwa nine seniyigucule, nayenta yaba ngumgedze wetigebengu.”

₄₇Jesu abefundzisa ethempelini onkhe emalanga. Baphristi labakhulu nebafundzisi bemtsetfo, nebaholi bebantfu bamtingela bafuna kumbulala, ₄₈kodvwa behluleka kukwenta loko, ngobe bonkhe bantfu babenamatsele kuye, bangafuni kulahlekelwa nome ngulinye livi lakhe.