Mikha 3

₁Lalelani, nine baholi baka-Israyeli!

Bekufanele ngabe ninakekela kutsi esiveni sakini

konkhe kwentiwe ngendlela lefanele;

₂kodvwa esikhundleni saloko

nitondza kulunga, nitsandze lokubi.

Nihlinza bantfu bami,

nihlube inyama yabo ematsanjeni abo.

₃Nidla inyama yemitimba yesive sami,

nihlube inyama yaso ematsanjeni aso

nihlahlele ematsambo aso,

nicobe inyama yemitimba yabo

njengenyama icotjelwa kufakwa ebhodweni.

₄Siyeta sikhatsi

lapho nitawukhala khona kuSimakadze,

kodvwa angeke aniphendvule.

Angeke ayilalele imithandazo yenu,

ngobe nente lokubi kuye.

₅Sive sami sedukiswa

baphrofethi labetsembisa kuthula

kulabo lababapha imali,

kantsi labo labangabadizeli

babetsembisa babasongele ngemphi.

₆“Baphrofethi,

sekusele kancane kuniphelele;

yebo, selinishonele lilanga.

Njengobe naku nedukisa sive sami,

ningeke niphindze

nibe netiphrofetho temibono,

futsi ningeke nikwati

kukubona lokutako kusengakefiki.”

₇Labo lababona lokutako kusengakefiki

bayawuhlazeka bative badliwa ngemahloni

ngenca yekwehluleka kwabo.

Bayawujabha,

ngobe Nkulunkulu angasabaphendvuli.

₈Kepha mine, Simakadze ungigcwalisa

ngaMoya nangemandla akhe,

anginike luvelo lwekwenta

tintfo ngekulunga,

anginike nesibindzi

sekutjela Israyeli lapho one khona

nekutsi tono takhe ngutiphi.

₉Lalelani la kimi,

nine babusi baka-Israyeli,

nine lenitondza kuvikela lokulungile

bese niguculela lokuhle kube kubi.

₁₀Nine nakha iJerusalema,

likhaya laNkulunkulu,

etikwesisekelo sekubulala

kanye nekwenta tintfo ngekungalungi.

₁₁Babusi balamadolobha

bawabusa ngekudizelwa,

kanjalo nebaphristi bayatsengwa

kuze bachaze bahumushe nemtsetfo,

nebaphrofethi imibono netembulo tabo

batichaza ngekudizelwa;

noko basajinge bachoshe

ngekutsi Simakadze unabo,

batsi: “Kute lokutasehlela,

ngobe Simakadze unatsi.”

₁₂Ngako-ke ngenca yenu,

iSiyoni iyawulinywa njengensimi,

iJerusalema iyakuba yincumbi yencitsakalo,

intsaba yelithempeli ibe lihlatsi.