Makho 15

₁Kwanelela kwasa nje kwabutsana lonkhe Liqoqo, baphristi labakhulu, netibondza, netati, kanye nalamanye emalunga alo, bahlanganisa inkhulumo. Babopha Jesu bamchuba bayawumetfula kuPhilatu. ₂Philatu wambuta watsi: “Ungiyo yini inkhosi yemaJuda?”

Jesu wamphendvula watsi: “Sewushito wena.”

₃Baphristi labakhulu bambeka emacala lamanyenti. ₄Waphindza Philatu wambuta watsi: “Ute yini imphendvulo longayisho? Buka kutsi bakubeka emacala lamanyenti kangakanani!”

₅Kodvwa Jesu akabange asamphendvula ngalutfo. Loko kwammangalisa kakhulu Philatu.

₆Kulomkhosi-ke Philatu abevamise njalo nje kubakhululela siboshwa sibe sinye lesicelwe ngulesicuku. ₇Ngaleso sikhatsi bekunesiboshwa ejele lesasinguBharaba, sasiboshwe kanye nalabanye lababevukele umbuso: ngekususa tiphitsiphitsi nangekubulala. ₈Sicuku sebantfu sasondzela kuPhilatu samncenga kutsi asentele leso sisa njengasemihleni. ₉Philatu wase uyababuta utsi: “Niyafuna yini kutsi nginikhululele inkhosi yemaJuda?” ₁₀Philatu abesabonile kutsi baphristi labakhulu babephetfwe ngumona nje lokutsi baze baletse Jesu la kuye.

₁₁Kodvwa baphristi labakhulu basifaka umoya lesicuku kutsi sicele Philatu asikhululele Bharaba, hhayi Jesu. ₁₂Philatu waphindza watsi kubo: “Ngitakwentani ngalomuntfu lenitsi yinkhosi yemaJuda?”

₁₃Bamemeta kakhulu futsi batsi: “Mbetsele esiphambanweni!”

₁₄Philatu watsi kubo: “Ngani, wenteni lengakalungi?”

Kodvwa bamemeta kakhulu kunakucala batsi: “Mbetsele esiphambanweni!”

₁₅Ngako-ke Philatu atsandza kujabulisa ticumbi, wabakhululela Bharaba. Jesu asabhanjabuliwe, Philatu wabe sewumnikela esicukwini kutsi siyewumbetsela esiphambanweni.

₁₆Emasotja achuba Jesu amngenisa ngekhatsi kwesigodlo saPhilatu, ase abita yonkhe imphi yemasotja. ₁₇Amembatsisa umjiva lobovu webukhosi, eluka umchele lonemanyeva, awuhlisibetela enhloko yakhe. ₁₈Ase amshayela sihlutfu atsi: “Bayethe! Nkhosi yemaJuda!” ₁₉Abehle amshaya enhloko ngendvuku yenhlangamlambo, amkhafulele ngematse, aguce embikwakhe amkhotsamele. ₂₀Asamphukutile aze enela, ase ayamkhumula lomjiva lobovu webukhosi, amembatsisa tingubo takhe. Amkhiphela ngephandle aya kumbetsela esiphambanweni.

₂₁Emasotja asesendleleni ahlangana nendvodza yaseSirene, libito layo lalinguSimoni. Beyiphuma emaphandleni ite edolobheni. Beyinguyise wabo-Alekzanda naRufusi. Emasotja ayicindzetela kutsi yetfwale siphambano saJesu.

₂₂Achuba Jesu amyisa endzaweni lekwakutsiwa yiGolkotha, lokusho kutsi: “YiNdzawo yeSikobho”. ₂₃Wanikwa liwayini lelalibhicwe nemure, kodvwa wala kulinatsa. ₂₄Emasotja ambetsela esiphambanweni, abelana ngetingubo takhe, entelana inkatho kuze kubonakale kutsi lilinye belitawutfolani. ₂₅Bekuli-awa lemfica ekuseni nababetsela Jesu esiphambanweni. ₂₆Satiso selicala lakhe lesasibhalwe esiphambanweni besitsi: “INKHOSI YEMAJUDA.” ₂₇Kwabetselwa kanye naye tigelekece letimbili, lesinye ngesekudla, lesinye ngesancele sakhe.

[ ₂₈Ngako kwagcwaliseka umBhalo lotsi: “Wabalwa kanye netoni.”]

₂₉Bantfu labendlulako lapho babemetfuka banikine tinhloko batsi: “Wo! Wena longabhidlita lithempeli ubuye ulakhe ngemalanga lamatsatfu! ₃₀Tisindzise phela, wehle lapho esiphambanweni!”

₃₁Nebaphristi labakhulu kanye netati temtsetfo bebahlekisa ngaye, batsi: “Wabasindzisa labanye, kodvwa akasakwati kutisindzisa yena. ₃₂Nango-ke, Khristu, iNkhosi yaka-Israyeli! Sale wehla lapho esiphambanweni, kuze sitewubona sikholwe.”

Nalaba lababebetselwe kanye naye nabo babemetfuka.

₃₃Kwatsi ngeli-awa leli-12 emini kwaba mnyama emhlabeni wonkhe, kwaze kwaba li-awa lesitsatfu. ₃₄Ngalelo awa Jesu wakhala ngelivi lelikhulu, watsi: “Eloyi! Eloyi! Lama sabakthani?” lokusho kutsi: “Nkulunkulu wami! Nkulunkulu wami! Ungishiyeleni?”

₃₅Labanye labebeme khona lapho nabamuva batsi: “Ase nimuve, ubita Elija.” ₃₆Lomunye wagijima watsatsa siponji wasicwilisa ewayinini lelimunyu, wasihloma endvukwini yenhlangamlambo, wamnatsisa, atsi: “Ase nime sesibone kutsi lo-Elija utawuta yini atemsita, ametfule lapha etulu.”

₃₇Jesu waphindze wamemeta ngelivi lelikhulu, wase uyafa.

₃₈Indvwangu yesihenco leyayilenga ethempelini yadzabuka ekhatsi kusukela etulu kwaya kuphuma phansi. ₃₉Kwatsi indvuna yelikhulu lebeyime lapho imbuka nakafa ngalendlela, yavuma yatsi: “Ngempela lomuntfu abengiyo iNdvodzana yaNkulunkulu.”

₄₀Bekukhona nebafati lababebuka beme bucalu, emkhatsini wabo bekukhona Mariya waseMagdala, naSalome, naMariya, unina waboJosese naJakobe labemncane. ₄₁Labo-ke ngulababenaye aseseGalile, babemsita, bamkhonta. Bekukhona nalabanye nje-ke bafati labanyenti, lababete kanye naye eJerusalema.

₄₂Kwase kucalile kuhwalala. Phela kwakulilanga lekwenta emalungiselelo, lokusho kutsi kwakunguLesihlanu, kutakusa kuliSabatha. ₄₃Josefa wase-Arimathiya, umhlonishwa walelo Liqoqo, labe ngulomunye walababelindzele umbuso waNkulunkulu, wacunga sibindzi waya kuPhilatu ayewucela sidvumbu saJesu. ₄₄Philatu wamangala kwekutsi Jesu sewufile; wabita indvuna yemasotja wabuta kutsi ngabe sesikhatsi lesingakanani Jesu afile. ₄₅Watsi kube atfole imphendvulo endvuneni, wase uyavuma kutsi Josefa asitsatse lesidvumbu. ₄₆Josefa watsenga indvwangu yelineni, wasetfula sidvumbu saJesu, wasigocota ngalendvwangu, wayawusibeka ethuneni lelalimbiwe edvwaleni, wagicitela litje wavala ngalo umnyango walelithuna. ₄₇BoMariya waseMagdala naMariya, unaboJosese, babona lapho angcwatjwa khona Jesu.