Makho 5

₁Base bewelela ngesheya kweLwandle LwaseGalile eveni laseGerasa. ₂Watsi Jesu uyaphuma nje esikebheni, wahlangabetwa yindvodza lebeyinelidimoni iphuma emathuneni, ₃lapho yase ihlala khona. Kwase kute namunye umuntfu labengakhona kuyibopha ngisho nangetinketane. ₄Beyike yetanywa ngaphambili kutsi iboshwe ngetindilimo nangetinketane, kodvwa beyitidzabula incamule naletinketane tibe ticucu. Kute labenemandla ekuyehlula. ₅Busuku nemini beyikhala impongoloze etintsabeni nasemathuneni, itihhwebhe ngematje.

₆Yatsi nayibona Jesu abucalu, yesuka ngematubane yaya kuye yafika yamkhotsama ikhuleka. ₇Yamemeta ngelivi lelikhulu yatsi: “Ufunani kimi wena, Jesu, Ndvodzana yaNkulunkulu Losetikwako Konkhe? Mane ungangihluphi!” ₈Yakusho loku, ngobe Jesu abesatsite kuyo: “Phuma dimoni kulomuntfu!”

₉Jesu wase uyabuta utsi: “Ungubani libito lakho?”

Yamphendvula yatsi: “Libito lami nguSibanyenti, ngobe silibutfo.” ₁₀Emadimoni ase ancenga Jesu kutsi angawacoshi kulelo live.

₁₁Bekukhona umhlambi lomkhulu wetihhontji kuleyo ndzawo utse bhidli, udla eceleni lentsaba. ₁₂Yase iyatincengela lemimoya lemibi itsi: “Mane usitfumele lapha etihhontjini singene kuto.” ₁₃Wayivumela. Yaphuma-ke imimoya lemibi kulowo muntfu yangena etihhontjini. Wonkhe lowo mhlambi lowawungahle ube tihhontji letiti-2 000 wagijima, wahholokoshela eweni, wagcumkela elwandle, wacwila, wafa.

₁₄Bantfu lababeluse letingulube babaleka bayawubika kubantfu edolobheni nasemaphandleni. Bantfu beta batawutibonela loko lokwase kwentekile. ₁₅Befika kuJesu bayibona lendvodza lebeyikadze inemadimoni, lebeyibitwa ngekutsi nguSibanyenti. Beyihleti phansi, yembetse kahle, isangulukile nasemcondvweni. Betfuka, besaba. ₁₆Labo lababebonile babachazela konkhe lokwakwentekile kulomuntfu labenemadimoni, nalokwakwentekile etihhontjini.

₁₇Base bancenga Jesu kutsi akesuke eveni labo.

₁₈Kwatsi Jesu nakakhwela esikebheni, lendvodza lebeyinemadimoni yacela kuJesu kutsi ihambe naye.

₁₉Kepha Jesu wala, watsi kuyo: “Buyela ekhaya kubantfu bakini, ubatjele kutsi iNkhosi ikwentele tintfo letinkhulu kangakanani, nekutsi ikuhawukele kanjani.”

₂₀Yahamba-ke lendvodza yacala kumemetela eDekhapholisi kutsi Jesu uyentele tintfo letinkhulu kangakanani. Bonkhe bamangala nabakuva loko.

₂₁Jesu wewela ngesikebhe wabuyela ngesheya kwelwandle. Sicuku lesikhulu sebantfu seta kuye ngaselwandle. ₂₂Kwefika kuye indvodza, libito layo kunguJayiru, umphatsi welisinagoge, yanelela kubona Jesu yatilahla phansi embikwakhe. ₂₃Yamncenga yatsi: “Indvodzakati yami lencane igulela kufa, sekubonwa ngekusa. Mane ute uteyibeka tandla itekusindza iphile.”

₂₄Jesu wavuma wahamba nayo. Sicumbi lesikhulu sebantfu samlandzela simkakile.

₂₅Bekukhona umfati labegula, aphetfwe sifo sekopha, lesase sicedze iminyaka leli-12 simphetse.

₂₆Abesagule kakhulu, asaphelelwe timali kulabelaphako, angasenalutfo esandleni, kodvwa kujinge kubete buncono, kugula kuya embili. ₂₇Abesake weva tidvumo ngaJesu, ngako watfumbeleta ngemuva kwaJesu watsintsa ingubo yakhe, ₂₈ngobe wacabanga watsi: “Nangingamane nje ngitsintse ingubo yakhe, ngitawuphila.”

₂₉Kopha kwancamuka khona lapho, wativa asaphilile esifeni lebesimphetse. ₃₀Masinyane Jesu wativela kutsi kukhona emandla lasaphumile kuye, wagucuka, wacalata, watsi: “Ngubani lotsintse ingubo yami?”

₃₁Bafundzi bakhe batsi kuye: “Hhawu, ungatsi usibona nje lesiminyaminya lesikukakile ube utsi: ‘Ngubani lotsintse ingubo yami?’ ”

₃₂Wacalata afuna kubona kutsi ngubani lona lomtsintsile. ₃₃Kodvwa lomfati ati kahle kutsi kwentekeni kuye, wasondzela ngembili achachatela, ngenca yekwesaba, waguca phansi embikwakhe, wamtjela lonkhe liciniso.

₃₄Jesu watsi kuye: “Ndvodzakati yami, kukholwa kwakho kukuphilisile. Hamba ngekuthula, uphile esifeni sakho.”

₃₅Asakhuluma nje Jesu, kwefika tigijimi tiphuma kaJayiru tambikela tatsi: “Indvodzakati yakho seyifile. Sale umyekela loMfundzisi, ungasamhluphi.”

₃₆Kodvwa Jesu, angakunaki loku letatikusho, watsi kuJayiro: “Ungesabi, kholwa kuphela.” ₃₇Jesu wesuka lapho wahamba; wabalela bonkhe kutsi bamlandzele, ngaphandle kwaboPhetro, naJakobe, naJohane, umnakaboJakobe. ₃₈Batsi nabefika endlini yalomphatsi welisinagoge, beva sililo kutse mpu, bantfu bakhala. ₃₉Watsi kube angene, watsi kubo: “Nikhalelani, nidzindza sililo nje? Lomntfwana akafi, ulele.”

₄₀Bamane bamhleka bulima nje. Wabakhiphela ngephandle bonkhe, watsatsa uyise nenina walomntfwana, nalabo labebanaye, wangena nabo lapho bekunemntfwana khona. ₄₁Wafike wabamba lomntfwana ngesandla, watsi kuye: “Thalitha, khumi,” lokusho kutsi: “Ntfombatana, ngitsi kuwe: Vuka!”

₄₂Intfombatana yasukuma masinyane, yahamba. Bese ineminyaka leli-12 budzala. Masinyane bantfu behlelwa kwesaba nekumangala lokukhulu. ₄₃Jesu wabayalisisa kutsi bangatjeli muntfu ngaloku. Watsi abayiphe kudla lentfombatana.