Numeri 12

₁BoMiriyamu na-Aroni bakhuluma kabi ngaMosi, bamsola kutsi abetsetse umfati labengumKushe. Phela Mosi bekashade umfati labengumKushe. ₂Babekhuluma batsi: “Kambe ngabe Simakadze ukhulume ngaMosi kuphela yini? Akakhulumi yini nangatsi futsi?” Simakadze wakuva loko.

₃Mosi bekangumuntfu lotfobekile kwendlula wonkhe umuntfu labekhona emhlabeni.

₄Masinyane Simakadze wakhuluma kuboMosi, na-Aroni, naMiriyamu, watsi: “Phutfumani nobatsatfu nite kimi ethendeni lekuhlangana.” Baphuma bobatsatfu. ₅Simakadze wehla ngensika yelifu, wema emnyango welithende lekuhlangana; wabita boMiriyamu na-Aroni bobabili, basondzela. ₆Simakadze watsi kubo: “Lalelani la kimi: Nakunemphrofethi lapha emkhatsini wenu, ngimi Simakadze lengitibonakalisa ngemibono kuye ngikhulume naye ngemaphupho. ₇Kodvwa angenti njalo kulenceku yami Mosi. Kuyo yonkhe indlu yami wetsembekile. ₈Kuye ngikhuluma umlomo nemlomo, ngikhulume ebaleni, ngingabi ngigega liguma; ubukana nesimo saSimakadze. Nine-ke nisitsatsaphi lesibindzi lesingaka sekukhuluma kabi ngenceku yami, Mosi?”

₉Lulaka lwaSimakadze lwabavutsela; wase uyahamba. ₁₀Latsi lisuka nje lelifu ethendeni lekuhlangana, Miriyamu wabe asamhlophe hhu lokusabulephelo wonkhe umtimba, asamhlophe njengesitfwatfwa. Aroni wagucukela kuMiriyamu, wamkhandza asatse hhu wonkhe umtimba. ₁₁Aroni watsi kuMosi: “Hhawu, nkhosi, mane ungasijezisi ngalesono setfu lesisente ngebulima. ₁₂Mane umente angabi njengeluswane lolutelwe lufile ngekutsi inyama yakhe ibe njengaledlovotekile kwasesiswini senina.”

₁₃Mosi wakhala kuSimakadze atsi: “Mphilise Nkulunkulu, ngiyakuncenga.”

₁₄Simakadze watsi kuMosi: “Kube bekakhafulelwe nguyise ebusweni bakhe bekangetiletfwala yini lelihlazo lakhe emalanga lasikhombisa? Akavalelwe ngephandle kwenkambu ahlale khona emalanga lasikhombisa, kutawutsi emvakwaloko bese niyamngenisa-ke.” ₁₅Ngako-ke Miriyamu wavalelwa ngephandle kwenkambu emalanga lasikhombisa. Sive sonkhe asizange sichubeke nekutfutsa, waze wabuyiswa. ₁₆Emvakwaloko sive satfutsa eHaserothi sayakumisa eHlane lasePharani.